ភ្នំពេញ ៖ រថយន្តដឹកសាកសពមួយគ្រឿង ត្រូវបានគេប្រទះឃើញ មានសពមនុស្ស នៅក្នុងរថយន្តនោះ ហើយចតទុកចោលក្នុងបរិវេណវត្តតាំងកសាងខាងត្បូង១យប់ទល់ភ្លឺ បង្កឲ្យភ្ញាក់ផ្អើល ពីមាត់មួយទៅមួយថា មានរថយន្តដឹកសពយកទៅផ្លុងចោល តែតាមការពិត ជារឿងភ័ណ្ឌច្រឡំ រវាងអ្នកបើកបររថយន្តដឹកសព និងលោកតាអាចារ្យ ដោយសារ រថយន្តដឹកសពមកដល់យប់ជ្រៅពេក ទំនាក់ទំនងទៅលោកអាចារ្យមិនចូលហើយដោយសារ អ្នកបើកបរងងុយដេកផងក៏ចាក់សោរថយន្ត ដើរទៅរកកន្លែងដេកបាត់ រហូតដល់វេលាម៉ោង៨ព្រឹកថ្ងៃទី០៧ ខែមករា ឆ្នាំ២០១៩នេះអត់ដឹងរឿងទើបបង្កឲ្យភ្ញាក់ផ្អើលបែបនេះ។
រថយន្តដឹកសព ម៉ាក ស្តារិច ពណ៌ស មានចាប់ភ្លើង ឧបករណ៍បំពងសម្លេង ពាក់ស្លាកលេខ ព្រះសីហនុ 2A-6516 ដែលគេស្គាល់ថា មានថៅកែឡាន ល្បីល្បាញខាងដើរ ដឹកសព ប្រចាំទីក្រុងភ្នំពេញនោះ ឈ្មោះ ងួន ប្រាក់ធី ហៅ ឌី អ្នកបើកបរ ឈ្មោះ ខួច។ រថយន្តខាងលើ ត្រូវបានឃើញដឹកសពចូលក្នុងបរិវេណវត្តតាំងកសាងខាងត្បូងសង្កាត់កាកាប២ ខណ្ឌពោធិសែនជ័យ តាំងពីរំលងអធ្រាត្រឈានចូលថ្ងៃទី០៧ខែមករា ឆ្នាំ២០១៩មកម្ល៉េះ។
ខណៈដែល កម្លាំងសមត្ថកិច្ចប៉ុស្តិ៍ ខណ្ឌ ជំនាញក្រុង ចុះមកដល់កន្លែងកើតហេតុ កំពុង ត្រួតពិនិត្យ សាកសួរ ស្រាប់តែលេចមុខ អ្នកបើកបរ រថយន្តដឹកសពមកដល់ ហើយធ្វើការបំភ្លឺ ប្រាប់សមត្ថកិច្ចពីដំណើររឿង។
បើតាមអ្នកបើកបររថយន្តខាងលើបានបញ្ជាក់ថា សាកសពក្នុងរថយន្តខ្លួន ជាសពជនរងគ្រោះ ជួបគ្រោះថ្នាក់ចរាចរណ៍ កាលពីវេលាម៉ោង១និង៣០នាទីរំលងអធ្រាត្រ ចូលថ្ងៃទី០៧ ខែមករា ឆ្នាំ២០១៩ នៅចំណុចផ្លូវជាតិលេខ១ ភូមិទួលអំពិល សង្កាត់ក្បាលកោះ ខណ្ឌច្បារអំពៅ រវាងរថយន្តមិនចាំម៉ាក បើកបុកម៉ូតូ សេ១២៥ ស៊េរី២០១១ ពណ៌ខ្មៅ ពាក់ស្លាកលេខ ភ្នំពេញ 1AG-4430 ជិះគ្នា២នាក់ ច្រាសទិស បណ្តាលឲ្យ ស្លាប់ម្នាក់ រងបួសធ្ងន់ម្នាក់ ហើយរថយន្តបង្កបើករត់គេចទៅបាត់ បន្សល់ទុកជនរងគ្រោះ ត្រូវបានដឹកបញ្ជូនទៅមន្ទីរពេទ្យ ហើយសពម្នាក់នេះ ក្រោយពីសមត្ថកិច្ចជំនាញពិនិត្យ ស្លាកស្នាមរួច ខ្លួនបានដឹក យកមកតម្កល់ទុកនៅវត្តតាំងកសាងខាងត្បូង។
យសពមានឯកសារត្រួតពិនិត្យ ទទួលស្គាល់ពីសមត្ថកិច្ចជំនាញខណ្ឌច្បារអំពៅការិយាល័យ ចរាចរណ៍ជើងគោកក្រុងត្រឹមត្រូវ។
ប្រភពបន្ដថា ពេលដឹកសពមកដល់ក្នុងវត្ត បានទំនាក់ទំនងតាមទូរស័ព្ទទៅលោក អាចារ្យដែរ តែមិនចូល ដោយងងុយដេកពេក មិនហ៊ានដាក់សាកសពចុះកុំឲ្យមានការភ័ណ្ឌច្រឡំ សុខចិត្ត ដាក់សពក្នុងរថយន្ត ហើយចាក់សោជាប់ ដើរទៅដេកនៅផ្ទះក្បែរនោះ រហូតដល់ព្រឹកឡើងផ្អើលឆោឡោរឿងបែបនេះតែម្តង។
ក្រោយពីបំភ្លឺ និងយោងតាមឯកសារ ពិនិត្យសកសព ចេញពីកន្លែងកើតហេតុត្រឹមត្រូវ សពត្រូវបានតម្កល់ទុកនៅវត្តតាំងកសាងខាងត្បូង ហើយសមត្ថកិច្ច ខណ្ឌច្បារអំពៅការិយាល័យចរាចរណ៍ជើងគោក បន្តធ្វើការស្រាវជ្រាវ ប្រកាសស្វែងរកសាច់ញាតិ មកទទួលយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments