បន្ទាយមានជ័យ ៖ ព្រឹក ថ្ងៃទី៦ ខែមករា ឆ្នាំ២០១៩នេះនៅមុខមន្ទីរពាណិជ្ជកម្មខេត្តបន្ទាយមានជ័យ ស្ថិត នៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ អាជីវករមកគ្រប់ទិសទីចំនួន២០០នាក់ បាននាំគ្នាចូលរួមបោះឆ្នោតជ្រើសរើសសមាជិកជ្រើសតាំងប្រធានថ្មី ជំនួសសមាជិកផុតអាណត្តិ១១រូបលើ១៥រូប នៃអាណត្តិទី២លើកទី២ សមាជិកជ្រើសតាំងថ្មីនេះ បានបោះឆ្នោតជ្រើសរើសលោកឧកញ៉ា លី អ៊ុតនី ជាប្រធាន១អាណត្តិទៀតមានរយៈពេល៣ឆ្នាំនិងបានបោះឆ្នោតជ្រើសរើសហិរញ្ញឹក ព្រមទាំងអនុប្រធាន៥នាក់១លោកឆាន់ ប៊ុនម៉ាន ២លោកឈឿង ឈីវអៀន ៣លោកស៊ាង តូហ៊ី ៤លោកហ៊ុយ ឡេង និងអ្នកស្រី សូរ្យ ចន្ធូរ សម្រាប់ដឹកនាំការិយាល័យប្រតិបត្តិនៃសភាពាណិជ្ជកម្មខេត្តបន្ទាយមានជ័យនេះ បន្តសភាពាណិជ្ជកម្មខេត្តបន្ទាយមានជ័យអះអាងថា នឹងបង្កើនសកម្មភាពលទ្ធផលនិងប្រសិទ្ធភាពការងារ ក្រោយពីជ្រើសរើសសមាជិកជ្រើសតាំងនិងប្រធានថ្មី។
ដោយមានការចូលរួមឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម លោកស្រីប៉ុក ណាឌី អភិបាលរងខេត្ត លោកប៉ុក ឡាយជី ប្រធានមន្ទីរពាណិជ្ជកម្មនិងអ្នកពាក់ព័ន្ធជាច្រើននាក់ទៀត។
លោកឆាន់ ប៊ុនម៉ាន់ លោក ឈឿង ឈីវ អៀន អនុប្រធានចាស់និងថ្មីក្នុងនាមខ្លួនផ្ទាល់និងក៏ក្នុងនាមប្រធានអាណត្តិថ្មី បានបង្ហាញការប្តេជ្ញាចិត្តទាំងការខិតខំប្រឹងប្រែងលើការងារផ្ទៃក្នុងនិងការងារប្រមូលផ្តុំបង្កើតមុខរបរ អាជីវកម្ម ពាណិជកម្ម សេវាកម្ម ក៏ដូចជាទាក់ទាញវិនិយោគក្នុងនិងក្រៅខេត្ត ក្រៅប្រទេសមកដាក់ទុនរកស៊ី បង្កើតចំណូល បង្កើតការងារជូនប្រជាពលរដ្ឋនិងកំណើនសេដ្ឋកិច្ចខេត្ត។ លោកម៉ៅ ថូរ៉ា បានមានប្រសាសន៍ថា យោងតាមលិខិតលេខ ៣៨០៧ ព.ណ អវឯ ចុះថ្ងៃទី២២ ខែតុលា ឆ្នាំ២០១៨ របស់ក្រសួងពាណិជ្ជកម្ម ស្ដីពីការរៀបចំបោះឆ្នោតសភាពាណិជ្ជកម្ម ក្នុងអាណត្តិបន្ត ដើម្បីបន្តនិរន្តរភាពជាសមាជិកជ្រើសតាំងសភាពាណិជ្ជកម្មខេត្តបន្ទាយមានជ័យ ត្រូវបានផុតអាណត្តិសភា ពាណិជ្ជកម្មខេត្ត បានរៀបចំបោះឆ្នោតសភាពាណិជ្ជកម្មខេត្តអាណត្តិទី២ លើកទី២ ស្របតាមការណែនាំរបស់ក្រសួងពាណិជ្ជកម្ម។
លោកបានបន្តថា សភាពាណិជ្ជកម្ម គឺជាក្បាលម៉ាស៊ីនយ៉ាងសំខាន់ ក្នុងការជួយដល់ការអភិវឌ្ឍវិស័យពាណិជ្ជកម្ម ឲ្យកាន់តែមានភាពរីកចម្រើន។ពិសេសវាបានជួយស្រូបយកវិស័យឯកជនទាំងក្នុង និងក្រៅស្រុក ក្នុងការពង្រីងវិស័យពាណិជ្ជកម្ម ក៏ដូចជាផ្តល់ឱកាសការងារឲ្យយុវជនមានការងារធ្វើ៕
Source: Kampuchea Thmey Daily
0 Comments