កណ្តាល ៖ បុរសវ័យចំណាស់ម្នាក់ បានត្រូវនគរបាលស្រុកស្អាងចាប់ឃាត់ខ្លួន ខណៈធ្វើការជួញដូរគ្រឿងញៀន ប្រព្រឹត្តឡើងនៅថ្ងៃច័ន្ទ ០៨រោច ខែបុស្ស ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី ២៨ ខែមករា ឆ្នាំ២០១៩ វេលាម៉ោង១៥និង៣០នាទី ចំណុចចំការស្វាយ ស្ថិតក្នុងភូមិពោធិ៍លើ ឃុំត្រើយស្លា ស្រុកស្អាង ខេត្តកណ្តាល។
លោកវរសេនីយ៍ សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យ ត្រូវឃាត់ខ្លួនឈ្មោះ ឌូ ស្រី ភេទប្រុស អាយុ៥៦ឆ្នាំ ជនជាតិខ្មែរ មុខរបរ មិនពិតប្រាកដ ទីលំនៅបច្ចុប្បន្នភូមិ ពោធិ៍លើ ឃុំត្រើយស្លា ស្រុកស្អាង ខេត្តកណ្តាល។ រីឯវត្ថុតាងចាប់យកបាន គឺម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន១៦កញ្ចប់តូច។
លោកអធិការបញ្ជាក់ថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ ភ្លាមៗនោះ កម្លាំងផ្នែកប្រឆាំងបទល្មើសគ្រឿងញៀន បានចុះដល់ចំណុចកើតហេតុ ធ្វើការត្រួតពិនិត្យ ឈ្មោះ ឌូ ស្រី បានរកឃើញម្សៅក្រាម ពណ៌សថ្លា សង្ស័យជាសារធាតុញៀន(ម៉ាទឹកកក)ចំនួន១៦កញ្ចប់តូច នៅនឹងខ្លួន រួចឃាត់ខ្លួនជនសង្ស័យ រួមនឹងវត្ថុតាង បញ្ជូនមកអធិការដ្ឋាននគរបាលស្រុកស្អាង ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ឌូ ស្រី បានសារភាពថា គ្រឿងញៀន(ម៉ាទឹកកក)ចំនួន ១៦កញ្ចប់នេះ ជារបស់ ឈ្មោះ យ៉ូ ភេទប្រុស អាយុ៣០ឆ្នាំ ទីលំនៅភូមិ ពោធិ៍លើ ឃុំត្រើយស្លា ស្រុកស្អាង បានឲ្យខ្លួនលក់ក្នុង០១កញ្ចប់តូច តម្លៃ១៥,០០០រៀល។ ពេលលក់គ្រឿងញៀន(ម៉ាទឹកកក)អស់ ឈ្មោះ យ៉ូ បានឲ្យលុយ និងគ្រឿងញៀនមួយចំនួនមកខ្លួន ដើម្បីប្រើប្រាស់(ជក់)។
បច្ចុប្បន្ន ជនសង្ស័យ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្ដអនុវត្តតាមនីតិវិធី ៕
Source: Kampuchea Thmey Daily
0 Comments