ក្រុម​ភ្នំពេញ​ក្រោ​ន បាន​ត្រឡប់​មកកាន់​ប្រទេស​កម្ពុជា វិញ​ហើយ​ក្រោយ​បញ្ចប់​បេសកម្ម​នៅ​ប្រទេស​ថៃ

ក្រុម​ភ្នំពេញ​ក្រោ​ន សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) បានបញ្ចប់​បេសកកម្ម​ក្នុង​ពានរង្វាន់ Leo Pre-Season Cup 2019 ត្រឹម​វគ្គ​៨​ក្រុម​ចុងក្រោយ នៅ​ប្រទេស​ថៃ​ព្រមទាំង​បាន​ហ្វឹកហាត់​និង​ប្រកួត​មិត្តភាព​កម្តៅ​សាច់ដុំ​នៅ​ប្រទេស​ក្បែរ​ខាង​មួយ​នេះ ដើម្បី​ពង្រឹង​បច្ចេកទេស​កីឡាករ​ត្រៀម​ស្វាគមន៍​រដូវ​កាល​ថ្មី​ខាងមុខនេះ​។



​ក្រុម​ភ្នំពេញ​ក្រោ​ន បាន​ធ្លាក់​ចេញពី​ពានរង្វាន់ Leo Pre-Season Cup 2019 ក្រោយ​ចាញ់​ក្រុម​ម្ចាស់ផ្ទះ​Nakornratchasima Mazda FC ៤​ទល់​០​។ ក្រោយ​ធ្លាក់​ចេញពី​ពានរង្វាន់​នេះ​ក្រុម​ភ្នំពេញ​ក្រោ​ន បាន​បន្ត​ប្រកួត​មិត្តភាព​វិញ គឺ​បាន​យកឈ្នះ​លើ​ក្រុម​Army Regional 2 របស់​ម្ចាស់ផ្ទះ​ថៃ ដោយ​លទ្ធផល​៣​ទល់​២ ព្រមទាំង​បាន​បន្ត​យកឈ្នះ​ក្រុម​ម្ចាស់ផ្ទះ Buriram United សមាជិក​លី​គ​កំពូល​ប្រទេស​ថៃ ៤​ទល់​១ ខណៈ​ប្រកួត​ចុងក្រោយ​បាន​ចាញ់​ក្រុម​ខ្លាំង​Muangthong United ៤​ទល់​១​។



សូម​រំលឹក​ថា ថ្មីៗ​នេះ​ក្រុម​ភ្នំពេញ​ក្រោ​ន បាន​តែងតាំង​ក្បាលម៉ាស៊ីន ថ្មី​ក្រោយ​ជម្រុះ​ថ្នាក់ដឹកនាំ​ចាស់​អស់​បន្ទាប់ពី​ចប់​រដូវ​កាល​ឆ្នាំ​២០១៨​។ ចំណែក​ថ្នាក់ដឹកនាំ​ថ្មី​របស់​ក្លិប​មានដូចជា លោក លី ហៀ​ង ជា​អ្នកចាត់ការ​ទូទៅ​ក្លិប ចំណែក លោក Leonardo Vitorino ជា​គ្រូ​បង្គោល​ថ្មី ស្របពេល​ប្អូនប្រុស​របស់ខ្លួន Luis Fernando Vitorino កាន់តំណែង​ជា​គ្រូបង្វឹក​អ្នកចាំទី​ឈុត​ធំ​។ អតីត​គ្រូ​វេ​ស្ទើ​ន លោក ស៊ុំ វណ្ណា បានទទួល​តំណែង​ជា​គ្រូ​ជំនួយ​ក្រុម​ឈុត​ធំ ខណៈដែល​អតីត​ខ្សែប្រយុទ្ធ កែវ សុខ​ង៉​ន ជា​អ្នកចាត់ការ​ទូទៅ​ក្រុម​ឈុត​ធំ​។



​គេ​នៅ​ចាំបាន​ថា​រដូវ​កាល​ឆ្នាំ​២០១៨ ថ្មីៗ​កន្លងទៅនេះ​ក្នុង​ពានរង្វាន់​លី​គ​កំពូល​កម្ពុជា ក្រុម​ភ្នំពេញ​ក្រោ​ន រក្សា​ចំណាត់ថ្នាក់​លេខ​៥​ក្រោយ​ប្រកួត​បាន​២២​លើក ឈ្នះ​បាន​១១​លើក ស្មើគ្នា​៣​លើក​និង​ចាញ់​៨​លើក​មាន​៣៦​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើ​ល រហូតដល់​២០​ពិន្ទុ​។ ភ្នំពេញ​ក្រោ​ន ទាត់​ប​ញ្ចូល​ទី​គូប្រកួត​បាន​៤១​គ្រាប់ ហើយ​គេ​ទាត់​ចូល​វិញ​ចំនួន​៣៣​គ្រាប់​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup)​វិញ​ក្រុម​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយ​បាល់​ប៉េ​ណាំង​ទី​កាត់សេចក្តី​៤​ទល់​៣ ក្រោយ​ប្រកួត​ស្មើគ្នា​ទាំង​២​ជើង​៤​ទល់​៤៕

Source: Kampuchea Thmey Daily