ក្លិប​បឹងកេត បញ្ចប់​កម្ម​វិធី​ចែករំលែក​បទពិសោធន៍​បាល់ទាត់​ដល់​យុវជន​នៅ​ខេត្តកំពង់ចាម

ក្លិប​បាល់ទាត់​បឹងកេត សមាជិក​ពានរង្វាន់​លី​គ​កំពូល​កម្ពុជា (Metfone Cambodian League) បានធ្វើ​ដំណើរ​ទៅ​រៀបចំ​កម្មវិធី​ចែករំលែក​បច្ចេកទេស​បាល់ទាត់ (Football Clinic) រយៈពេល​០២​ថ្ងៃ នៅ​ខេត្តកំពង់ចាម គឺ​នៅ​ថ្ងៃ​សៅរ៍ ទី ២៦ និង​អាទិត្យ ទី​២៧ ខែមករា ឆ្នាំ​២០១៩ ចុង​សប្ដាហ៍​កន្លងទៅនេះ​។



យោង​តាម​ការបញ្ជាក់រ​បស់​ក្លិប​បាន​លើក​ឡើ​ង​ថា ​ក្នុង​ដំណើរ​ឆ្ពោះទៅកាន់​ខេត្ត​ដែល​ជា​មូលដ្ឋាន​កំណើត​របស់​ក្លិប​នេះ ក្រុម​បឹងកេត ធ្វើការ​ប្រកួត​មិត្តភាព​ជាមួយនឹង​ក្រុមបាល់ទាត់​យុវជន​ភូមិ​រការ នៅ​ទីលាន​បាល់ទាត់​ខេត្តកំពង់ចាម ហើយ​ក្រោយមក​ក្រុម​កីឡាករ និង​គ្រូបង្វឹក បាន​ចូលរួម​ចែករំលែក​បច្ចេកទេស​បាល់ទាត់ ដល់​យុវជន​នៅក្នុង​ខេត្ត​ជាច្រើន​នាក់​និង​ការលេង​ហ្គេម​កម្សាន្ត​ថែម​ទៀតផង​។​



លោក បែ មករា អ្នកចាត់ការ​ទូទៅ​ក្លិប​បឹង​កេត ធ្លាប់បាន​លើកឡើង​ជុំវិញ​កម្មវិធី​ចែករំលែក​បទពិសោធន៍​បាល់ទាត់​នេះ​ថា​៖«​ចំណុច​សំខាន់​ទី​១ គឺ​យើង​ចង់​ចែករំលែក​បទពិសោធ​ស្ដីពី​បាល់ទាត់​ដល់​ប្អូនៗ​នៅ​ខេត្តកំពង់ចាម ក៏ដូចជា​ខេត្ត​ផ្សេងៗ​ទៀត​ឲ្យ​យល់ដឹង​កាន់តែ​ទូលំទូលាយ​ពី​បាល់ទាត់​។ ទី​២ គឺ​បន្ទាប់ពី​ពង្រឹងពង្រីក​ពី​វិស័យ​បាល់ទាត់​នៅតាម​បណ្ដា​ខេត្តហើយ យើង​ចង់​បង្ហាញខ្លួន​យើង​ឲ្យ​ហ្វេ​ន​ស្គាល់​បាន​ច្រើន​។ យើង​ក៏​ចង់​បង្ហាញថា យើង​ក៏មាន​ប្រភពពី​ខេត្តកំពង់ចាម​ដែរ​»​។



ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅក្រៅ​ស្រុក​វិញ​ ក្រុម​ដែលមាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើងដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផង​ដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់លំដាប់​ទី​២​ប្រចាំ​ទ្វីប​អាស៊ី​ AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូល​ដូច​គ្នា៕

 

Source: Kampuchea Thmey Daily