ភ្នំពេញ ៖ លោក គង់ គាំ អតីតឧត្តមទីប្រឹក្សាជាន់ខ្ពស់អតីតគណបក្សសង្គ្រោះជាតិ និងជាអតីតមនុស្សជំនិតរបស់លោក សម រង្ស៉ី ផងនោះ បានដាក់លិខិតស្នើសុំសិទ្ធិធ្វើនយោបាយចូលក្រសួងមហាផ្ទៃហើយ នៅវេលាម៉ោងប្រមាណ១០ព្រឹកថ្ងៃទី០៩ ខែមករា ឆ្នាំ២០១៩ នេះបើតាមការបញ្ជាក់ពីលោក គង់ គាំ។
ការដាក់លិខិតសុំសិទ្ធិធ្វើនយោបាយទៅក្រសួងមហាផ្ទៃរបស់លោក គង់ គាំ បានធ្វើឡើងបន្ទាប់ពីព្រះមហាក្សត្រ បានឡាយព្រះហស្ថលេខា ប្រកាសដាក់ឲ្យប្រើប្រាស់ជាផ្លូវការច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ កាលថ្ងៃទី០២ ខែមករា ឆ្នាំ២០១៩ ដែលជាការបើកផ្លូវឲ្យអ្នកនយោបាយដែលជាប់បំរាម អាចធ្វើសកម្មភាពនយោបាយរបស់ខ្លួនឡើងវិញ។
លោក គង់ គាំ បានថ្លែងប្រាប់កម្ពុជាថ្មី កាលពីរសៀលថ្ងៃទី០៩ ខែមករា ឆ្នាំ២០១៩ថា លោកបានដាក់ទៅក្រសួងមហាផ្ទៃហើយ នៅចន្លោះម៉ោង៩ទៅម៉ោង១០ព្រឹក (លោកជាប់នៅខេត្តហើយបានឲ្យជំនួយការយកទៅដាក់) ហើយការដាក់នៅពេលនេះ មានតែលោកទេ នៅមិនទាន់ដឹងថា មានអ្នកណាខ្លះនោះទេ រង់ចាំមើលជាក់ស្តែង។ លោកបញ្ជាក់ថា “បើអត់មានសិទ្ធិទេ គឺអត់បានធ្វើទេ ខ្ញុំចង់ធ្វើនយោបាយ…ដើម្បីកុំឲ្យដាច់សង្វាក់ (ក្រោយការបោះឆ្នោត២៩ កក្កដា ២០១៨) របបប្រជាធិបតេយ្យ រៀងរាល់៥ឆ្នាំម្តង”។
ទាក់ទងនឹងការគំរាមរបស់លោក សម រង្ស៊ី ដែលមិនចង់ឲ្យមានអតីតថ្នាក់ដឹកនាំ CNRP ទៅសុំសិទ្ធិធ្វើនយោបាយវិញនោះ លោក គង់ គាំ អះអាងថា ដោយសារតែលោក សម រង្ស៊ី សុំក៏អត់បានដែរ ដូច្នេះទើបគាត់និយាយបែបនេះ។ លោកបញ្ជាក់ថា “ក្រុមគាត់ដែលល្មើសសាលដីកា ៥ឆ្នាំហាមមិនឲ្យធ្វើនយោបាយហ្នឹង ហើយកំពុងតែជក់ខ្យល់តាមមេដឹកនាំក្រៅច្បាប់ និងអ្នកដែលជាប់ខ្សែបក្ខពួកជាមួយហ្នឹង បើសុំក៏មិនអាចទទួលបានសិទ្ធិដែរ ដូច្នេះគាត់ឃាត់ គាត់រារាំងអ្នកដទៃ ដើម្បីពួកគាត់បាទ”។
តាមលោក គង់ គាំ ក្រោយពីទទួលសិទ្ធិធ្វើនយោបាយវិញហើយនោះ លោកនឹងធ្វើជាមួយគណបក្សឆន្ទៈខ្មែរ ដែលមានកូនរបស់លោកជាប្រធាន។ លោកបញ្ជាក់ថា “ដូចដែលខ្ញុំបានប្រកាសជាសាធារណជាហូរហែរួចមកហើយ ហើយថ្នាក់ដឹកនាំគណបក្សឆន្ទៈខ្មែរ មានបំណងជាទៀងទាត់ ហើយមូលមាត់គ្នាថា ចង់ឲ្យខ្ញុំទៅជួយគណបក្សឆន្ទៈខ្មែរ ដែលមានកូនប្រុសខ្ញុំជាប្រធាននោះបាទ”។
ទាក់ទងបញ្ហានេះ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ មិនអាចស្វែងរកការបញ្ជាក់ នៅថ្ងៃទី០៩ ខែមករា ឆ្នាំ២០១៩ ដោយទូរស័ព្ទមិនមានអ្នកទទួល ប៉ុន្តែលោកបានប្រាប់អ្នកសារព័ត៌មានថា លិខិតស្នើសុំសិទ្ធិធ្វើនយោបាយឡើងវិញរបស់លោក គង់ គាំ បានចូលដល់ក្រសួងមហាផ្ទៃហើយ នៅវេលាម៉ោងប្រមាណជាង១០ និង៣០ នាទីព្រឹកថ្ងៃទី០៩ ខែមករា។
សូមបញ្ជាក់ថា សេចក្តីស្នើច្បាប់ស្តីពីវិសោធនកម្មមាត្រា ៤៥ថ្មី (ស្ទួន) នៃច្បាប់ស្តីពីគណបក្សនយោបាយ ដែលជាការបើកផ្លូវឲ្យអ្នកនយោបាយជាប់បម្រាម អាចធ្វើសកម្មភាពនយោបាយរបស់ខ្លួនឡើងវិញនោះ ត្រូវបានចុះហត្ថលេខាដោយតំណាងរាស្ត្រចំនួន៨៧រូប ហើយត្រូវរដ្ឋសភាអនុម័តកាលពីថ្ងៃទី១៣ ខែធ្នូ ឆ្នាំ២០១៨ និងត្រូវបានឲ្យយោបល់ឯកភាពទាំងស្រុងដោយ ព្រឹទ្ធសភា កាលពីថ្ងៃទី២៥ ខែធ្នូ ឆ្នាំ២០១៨។
សេចក្តីស្នើច្បាប់នេះ បានបន្ថែមនូវវាក្សខណ្ឌមួយថ្មីក្នុងមាត្រា៤៥ថ្មី (ស្ទួនមួយ) គឺ បុគ្គលត្រូវបានតុលាការសម្រេចហាមឃាត់ការ ធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណា មួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការ សម្រេចហាមឃាត់ការធ្វើសកម្មភាពនយោបាយនេះ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ។
ក្រៅពីលោក គង់ គាំ អតីតតំណាងរាស្ត្រម្នាក់ទៀតរបស់អតីតគណបក្សសង្គ្រោះជាតិ គឺលោក គង់ បូរ៉ា ក៏បានប្រកាស នឹងដាក់ពាក្យស្នើសុំសិទ្ធិធ្វើនយោបាយឡើងវិញផងដែរ។ លោក គង់ គាំ និងលោក គង់ បូរ៉ា រួមទាំងអតីតថ្នាក់ដឹកនាំអតីតគណបក្សសង្គ្រោះជាតិ សរុបចំនួន១១៨នាក់ ត្រូវបានតុលាការកំពូលចេញសាលដីកាប្រកាសមិនឲ្យសកម្មភាពនយោបាយរយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧៕
Source: Kampuchea Thmey Daily
0 Comments