វៀតណាម​ ដាក់​ពន្ធនាគា​រ​បុរស​ម្នាក់​រយៈពេល​១៤​ឆ្នាំ ​ដោយសារ​ប៉ុនប៉ង​ផ្តួលរំលំ​រដ្ឋ

ក្រសួង​សន្តិសុខ​សាធារណៈ​បាន​និយាយ​កាលពី​ថ្ងៃ​ពុធ​ថា តុលាការ​នៅ​ប្រទេស​វៀតណាម​បានដាក់​ពន្ធនាគារ​បុរស​ម្នាក់​រយៈពេល​១៤​ឆ្នាំ​ពីបទ​ប៉ុនប៉ង​ផ្តួលរំលំ​រដ្ឋ​ដោយមាន​ដៃគូ​សម្ងាត់​ជាមួយ​ក្រុម​មួយ​ដែលមាន​មូលដ្ឋាន​នៅ​សហរដ្ឋអាមេរិក​។​

ក្រសួង​បាន​និយាយ​នៅក្នុង​សេចក្តីថ្លែងការណ៍​មួយ​លើ​គេហទំព័រ​ព័ត៌មាន​ផ្លូវការ​របស់ខ្លួន​ថា លោក Phan Van Binh អាយុ​៤៧​ឆ្នាំ​ត្រូវបាន​ចោទប្រកាន់​ដោយ​តុលាការ​ពីបទ​ធ្វើការ​ឲ្យ​ក្រុម​មួយ​ដែលមាន​មូលដ្ឋាន​នៅ​រដ្ឋ​កាលីហ្វ័រ​នីញ៉ា​ឈ្មោះថា រដ្ឋាភិបាល​ជាតិ​បណ្ដោះអាសន្ន​នៃ​ប្រទេស​វៀតណាម​ដែលជា​ក្រុមប្រឆាំង​នឹង​គណ​បក្សកុម្មុយនិស្ត​កំពុងកាន់​អំណាច​។​
​
ក្រសួង​បាន​និយាយ​ដោយ​លើកឡើង​ប្រភពពី​រដ្ឋអាជ្ញា​ដែលមាន​វត្តមាន​ក្នុងការ​ជំនុំជម្រះ​រយៈពេល​មួយថ្ងៃ​នៅ​ខេត្ត Khanh Hoa ភាគ​កណ្តាល​ថា “​សកម្មភាព​របស់លោក Binh គឺ​បាន​រំលោភ​យ៉ាងធ្ងន់ធ្ងរ​លើ​ច្បាប់​ដែល​ធ្វើ​ឲ្យ​ប៉ះពាល់​ដល់​ឯកភាព​ជាតិ រំលោភ​លើ​សន្តិសុខ​ជាតិ​និង​ប្រឆាំង​ផលប្រយោជន៍​ជាតិ​”​។​
​
ទោះបី​ជាមាន​កំណែទម្រង់​សេដ្ឋកិច្ច​ទូលំទូលាយ​និង​ការបើកចំហ​កាន់តែខ្លាំង​ចំពោះ​ការផ្លាស់ប្តូរ​សង្គម​ក៏ដោយ គណ​បក្សកុម្មុយនិស្ត​ដែល​កំពុង​កាន់អំណាច​នៅតែ​រក្សា​ការត្រួតពិនិត្យ​លើ​ប្រព័ន្ធ​ផ្សព្វផ្សាយ​យ៉ាង​តឹងរ៉ឹង​និង​មិន​អត់ឱន​ឲ្យ​ការរិះគន់​ទេ​។​
​
ក្រសួង​បាន​និយាយ​នៅក្នុង​សេចក្តីថ្លែងការណ៍​របស់​ខ្លួន​ដោយ​សំដៅ​ដល់​មេដឹកនាំ​បដិវត្តន៍​វៀតណាម​និង​ជា​បិតា​ស្ថាបនិក​ថា លោក Binh បាន​បង្ហោះ​លើ​គណនី Facebook របស់គាត់​ថា “​ប៉ាត​លើ​រូបភាព​របស់​ហូជីមិញ​និង​មេដឹកនាំ​គណបក្ស​និង​រដ្ឋ​”​។​
​
ក្រសួង​បាន​និយាយថា ការ​បង្ហោះ Facebook របស់លោក Binh បានធ្វើ​ឲ្យ​ខូច​ទ្រង់ទ្រាយ​ប្រវត្តិសាស្ត្រ​និង​ការណែនាំ​របស់​បក្ស​ព្រមទាំង​គោលនយោបាយ​និង​ច្បាប់​របស់​រដ្ឋ​ក្នុង​គោលបំណង​ផ្ដួលរំលំ​រដ្ឋបាល​របស់​ប្រជាជន​។​
​
អ្នកនាំពាក្យ​របស់ Facebook បាន​បដិសេធ​ធ្វើ​អត្ថាធិប្បាយ​។​
​ហើយ Reuters មិនអាច​កំណត់​អត្តសញ្ញាណ​និង​ទាក់ទង​មេធាវី​របស់លោក Binh បានទេ​៕ REUTERS

Source: Kampuchea Thmey Daily