ភ្នំពេញ ៖ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ នឹងធ្វើការបើកសវនាការកាត់ទោសលោក ថោង សារ៉ាត់ និងអង្គរក្សចំនួន៥នាក់ (ស្លាប់ម្នាក់) នៅព្រឹកថ្ងៃទី១៥ , ១៦ ,និង១៧ ខែមករា ឆ្នាំ២០១៩ខាងមុខនេះ។
នេះបើតាមសេចក្ដីជូនដំណឹងរបស់ក្រុមប្រឹក្សាជំនុំជម្រះសំណុំរឿងព្រហ្មទណ្ឌ ដែលដឹកនាំដោយលោក តុប ឈុនហេង អនុប្រធានសាលាដំបូងរាជធានីភ្នំពេញ និងជាប្រធានក្រុមប្រឹក្សាជំនុំជម្រះ។
ជនជាប់ចោទ ដែលនឹងត្រូវឈរនៅក្នុងរង្វង់ក្រចកសេះ ដើម្បីឲ្យតុលាការវិនិច្ឆ័យសេចក្ដីនោះរួមមាន៖
ទី១.ឈ្មោះ ថោង សារ៉ាត់ ភេទប្រុស អាយុ៣៨ឆ្នាំ ថៅកែក្រុមហ៊ុន៩៩៩ ជាប់ចោទ ពីបទផ្តើមគំនិតក្នុងអំពើឃាតកម្មគិតទុកជាមុន។ ទី២.ឈ្មោះ សៀង វាសនា ភេទប្រុស អាយុ៤៤ឆ្នាំ និង ទី៣.ឈ្មោះ លី សៅ ហៅវី ភេទប្រុស អាយុ ៤២ឆ្នាំ (ស្លាប់) ជាប់ចោទ ពីបទ ឃាតកម្មគិតទុកជាមុន។ ទី៤.ឈ្មោះ កូយ ចាន់ថុល ភេទប្រុស អាយុ២៩ឆ្នាំ, ទី៥.ឈ្មោះ មាស សម្បត្តិ ភេទប្រុស អាយុ២៧ឆ្នាំ និងទី៦.ឈ្មោះ ឈុន ចិត្រា ភេទប្រុស ជាប់ចោទពីបទ សមគំនិតក្នុងអំពើឃាតកម្មគិតទុកជាមុន។
ចំណែកជនរងគ្រោះមានឈ្មោះ អ៊ឹង ម៉េងជឺ ថៅកែក្រុមហ៊ុន ស៊ីម៉ងត៍ពេជ្រ ត្រូវឃាតកបាញ់សម្លាប់ កាលពីម៉ោងប្រមាណជាជាង៧ល្ងាច ថ្ងៃទី២២ ខែវិច្ឆិកា ឆ្នាំ២០១៤កន្លងទៅ នៅមុខតូបលក់ផ្លែឈើស្រស់ ក្បែរផ្សារអូឡាំពិក។
សវនាការនេះ ធ្វើឡើង បន្ទាប់ពីចៅក្រមស៊ើបសួរ លោក លី សុខឡេង បានបិទការស៊ើបសួរ ហើយបញ្ជូនសំណុំរឿងឲ្យចៅក្រមបន្តនីតិវិធីជំនុំជម្រះ។
នាពេលកន្លងមកក្រុមប្រឹក្សាជំនុំជម្រះ បានប្រកាសសាលក្រមចាត់របៀបបង្វិលសំណុំរឿងឲ្យចៅក្រមស៊ើបសួរបើកការស៊ើបសួរនូវចំណុចសង្ស័យមួយចំនួន ដែលនៅសេសសល់ ហើយការស៊ើបសួរនោះ បានពន្យារពេលអស់ជិតមួយឆ្នាំ ទើបចៅក្រមសម្រេចបិទការស៊ើបសួរ និងបញ្ជូនសំណុំរឿងឲ្យចៅក្រមកាត់ទោសជនជាប់ចោទនៅថ្ងៃទី ១៥ ,១៦,និងថ្ងៃទី១៧ ខែមករា ឆ្នាំ២០១៩ខាងមុខនេះ។
សូមរំលឹកថា នាពេលសវនាការច្រើនលើកកន្លងមក ក្រុមជនជាប់ចោទបានបដិសេធថា ពួកគេមិនជាប់ពាក់ព័ន្ធនឹងការសម្លាប់ លោកឧកញ៉ា អ៊ឹង ម៉េងជឺ ទេ ប៉ុន្តែពួកគេមិនមានភស្តុតាងដោះបន្ទុកទាល់តែសោះ។
គួររំឭកដែរថា ជនជាប់ចោទ ឈ្មោះ ថោង សារ៉ាត់ និងឈ្មោះ ថោង ចំរើន (ជាឪពុក) និងឈ្មោះ កែវ សារី (ជាម្តាយ) ក៏ធ្លាប់ត្រូវបាន លោក ឃី ឆៃ ចៅក្រមសាលារាជធានីភ្នំពេញ សម្រេចផ្ដន្ទាទោស ដាក់ពន្ធនាគារ ពី២ឆ្នាំ ទៅ២ឆ្នាំកន្លះ និងពិន័យជាប្រាក់ក្នុងម្នាក់ៗ ៦លានរៀល ចូលជាថវិការដ្ឋ ក្រោមបទចោទប្រកាន់ កាន់កាប់អាវុធដោយគ្មានការអនុញ្ញាត យោងតាមមាត្រា៤៩០ នៃក្រមព្រហ្មទណ្ឌ៕
Source: Kampuchea Thmey Daily
0 Comments