ប្រទេសឥណ្ឌូនេស៊ី នឹងចាប់ផ្តើមកិច្ចខិតខំប្រឹងប្រែងស្វែងរកថ្មីមួយនៅថ្ងៃអង្គារដើម្បីស្វែងរកឧបករណ៍ថតសំឡេងក្នុងកាប៊ីននៃយន្តហោះរបស់ក្រុមហ៊ុន Lion Air មួយគ្រឿងដែលបានធ្លាក់ចូលសមុទ្រជ្វាកាលពីខែតុលា។
ប្រធានគណៈកម្មាធិការសុវត្ថិភាពដឹកជញ្ជូនជាតិ (KNKT) លោក SoerjantoTjahjonoបានប្រាប់រ៉យទ័រនៅថ្ងៃអង្គារថា “ប្រសិនបើអាកាសធាតុល្អ កប៉ាល់នឹងចាប់ផ្តើមចាកចេញនៅថ្ងៃនេះ”។
ការធ្លាក់យន្តហោះដែលជាលើកដំបូងគេបង្អស់នៅលើពិភពលោកសម្រាប់យន្តហោះBoeing 737 MAX និងជាគ្រោះថ្នាក់មានអ្នកស្លាប់ច្រើនបំផុតក្នុងឆ្នាំ២០១៨គឺបានសម្លាប់មនុស្សទាំងអស់១៨៩នាក់ដែលជិះក្នុងនោះ។
ក្រុមអ្នកស៊ើបអង្កេតកាលពីសប្ដាហ៍មុនបាននិយាយថា ពួកគេមានគម្រោងប្រើប្រាស់នាវាកងទ័ពជើងទឹកដើម្បីស្វែងរកប្រអប់ខ្មៅទីពីររបស់យន្តហោះនេះបន្ទាប់ពីការប្រឹងប្រែងរយៈពេល១០ថ្ងៃដែលឧបត្ថម្ភថវិកាដោយក្រុមហ៊ុន Lion Air បានបរាជ័យក្នុងការស្វែងរកឧបករណ៍ថតសំឡេងកាប៊ីនយន្តហោះ (CVR) ។
ប្រភព KNKT ដែលនិយាយក្នុងលក្ខខណ្ឌសុំមិនបញ្ចេញឈ្មោះបានប្រាប់រ៉យទ័រថា ក្រុមនេះនឹងមានរយៈពេល៧ថ្ងៃក្នុងការប្រើប្រាស់កប៉ាល់ KRI Spica ដើម្បីស្វែងរក CVR ដែលផ្ទុកភស្តុតាងដ៏សំខាន់ដែលអាចផ្តល់ឲ្យក្រុមអ្នកស៊ើបអង្កេតដឹងអំពីសកម្មភាពរបស់អាកាសយានិក។
ទោះបីជាយ៉ាងណាក៏ដោយ លោក Tjahjonoបានបដិសេធធ្វើអត្ថាធិប្បាយអំពីថាតើមានការកំណត់ពេលវេលាទៅលើការស្វែងរកនេះដែរឬអត់។
គួរបញ្ជាក់ជាថ្មីថា ទំនាក់ទំនងជាមួយជើងហោះហើរ JT610 បានបាត់ក្នុងរយៈពេល១៣នាទីបន្ទាប់ពីវាហោះហើរនៅថ្ងៃទី២៩ខែតុលាចេញពីរដ្ឋធានីហ្សាការតាឆ្ពោះទៅភាគខាងជើងទៅកាន់ទីក្រុងPangkal Pinang។
ប្រអប់ខ្មៅផ្សេងទៀតដែលជាឧបករណ៍កត់ត្រាទិន្នន័យហោះហើរត្រូវបានរកឃើញក្នុងរយៈពេលបីថ្ងៃបន្ទាប់ពីការធ្លាក់៕REUTERS
Source: Kampuchea Thmey Daily
0 Comments