កាលពីថ្ងៃចន្ទ លោកប្រធានាធិបតី Donald Trump បានជំរុញការប្រយុទ្ធរបស់គាត់លើជញ្ជាំងព្រំដែនអាមេរិក-ម៉ិកស៊ិកដ៏ចម្រូងចម្រាសដោយប្រកាសពីការថ្លែងសុន្ទរកថាដ៏សំខាន់និងដំណើរទស្សនកិច្ចទៅកាន់ព្រំដែន។
ផែនការរបស់លោក Trump សម្រាប់សុន្ទរកថានៅវេលាម៉ោង៩យប់ថ្ងៃអង្គារនិងការធ្វើដំណើរមួយទៅកាន់ព្រំដែននៅថ្ងៃព្រហស្បតិ៍នឹងក្លាយជាការបង្កើនជម្លោះជាមួយសមាជិកសភាគណបក្សប្រជាធិបតេយ្យដែលបានបដិសេធផ្តល់មូលនិធិដល់គម្រោងជញ្ជាំងរបស់គាត់។
ព្រឹត្តិការណ៍នេះនឹងផ្តល់ឲ្យគាត់នូវឱកាសមួយដើម្បីព្យាយាមចាប់យកការគាំទ្រ។
ពួកគេក៏នឹងអនុវត្តតាមការគំរាមកំហែងរបស់គាត់សម្រាប់ការយកអំណាចគ្រាអាសន្នមកប្រើដើម្បីបញ្ជាឲ្យសាងសង់ជញ្ជាំងផងដែរ។
អំណាចទាំងនោះនឹងអនុញ្ញាតឲ្យលោកTrump ស្វែងរកមូលនិធិជំនួសសម្រាប់ជញ្ជាំងហើយប្រហែលជាអាចធ្វើឲ្យគាត់បើកផ្នែកមួយចំនួននៃរដ្ឋាភិបាលសហព័ន្ធសារឡើងវិញបន្ទាប់ពីត្រូវបានបិទដោយសារជម្លោះរបស់គាត់ជាមួយសភា។
ទោះបីជាយ៉ាងណាក៏ដោយ ក្រុមប្រឆាំងប្រាកដជានឹងចោទប្រកាន់គាត់ពីបទរំលោភបំពានតំណែងជាប្រធានាធិបតីហើយឆ្លើយតបមកវិញជាមួយនឹងការដាក់ពាក្យបណ្តឹងនៅតុលាការ។
ទោះបីជាយ៉ាងណាក៏ដោយ រហូតមកដល់ពេលនេះ សេតវិមានមិនបានផ្តល់ព័ត៌មានទាក់ទងនឹងសេចក្តីលម្អិតនៃសាររបស់លោក Trump ទេ។
លោក Trump គ្រាន់តែបង្ហោះ Twitter ថា សុន្ទរកថារបស់គាត់ពីការិយាល័យ Oval នៅថ្ងៃអង្គារនឹងគ្របដណ្តប់លើ “វិបត្តិសន្តិសុខជាតិនិងមនុស្សធម៌នៅតាមព្រំដែនភាគខាងត្បូង”។
អ្នកនាំពាក្យរបស់គាត់គឺលោកស្រីSarah Sanders បាននិយាយថា ដំណើរទស្សនកិច្ចនៅថ្ងៃព្រហស្បតិ៍នឹងក្លាយទៅជាការពិនិត្យវិបត្តិសន្តិសុខជាតិនិងមនុស្សធម៌។ គោលដៅពិតប្រាកដមិនត្រូវបានបង្ហាញជាសាធារណៈទេ។
គួរបញ្ជាក់ថា លោក Trump បានយកបញ្ហានៃការកសាងជញ្ជាំងធ្វើជាប្រធានបទសំខាន់នៃគោលនយោបាយជាតិនិយមរបស់គាត់។
លោកបានចាត់ទុកព្រំដែនម៉ិកស៊ិកថាជាច្រកទ្វារបើកចំហសម្រាប់ឧក្រិដ្ឋជនរួមទាំងអ្នកចាប់រំលោភភេរវជន អ្នកដែលមានជំងឺគ្រោះថ្នាក់និងអ្នកស្វែងរកសិទ្ធិជ្រកកោនផងដែរ៕AFP
Source: Kampuchea Thmey Daily
0 Comments