ភ្នំពេញ ៖ តាមប្រភពពីលោកពេជ្រ វុទ្ធី មេភូមិតាងៅបានឲ្យដឹងថា នៅព្រឹកថ្ងៃទី១៦ខែមករានេះលោកបានដឹកនាំកម្លាំងចុះធ្វើអនាម័យនិងបំផ្លាញទីតាំងអ្នកសេពគ្រឿងញៀន។
ទីតាំងនេះគឺស្ថិតនៅដីផ្នូរ១០០ ក្នុងភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ។
លោកមេភូមិបន្តថាដីផ្នូរ១០០នេះ ជាកន្លែងបញ្ចុះសពតាំងពីដើមមក ប៉ុន្តែក៏ក្លាយទៅជាកន្លែងដែលក្រុមអ្នកញៀនថ្នាំយកទីតាំងនេះមកប្រមូលផ្តុំគ្នាសេពថ្នាំញៀននៅពេលយប់យ៉ាងពពាក់ពពូន ដូច្នេះហើយទើបលោកមេភូមិសុំការអនុញ្ញាតពីលោកស្រីចៅសង្កាត់ ធ្វើអនាម័យផងនិងគួបផ្សំបំផ្លាញសំបុកអ្នកមកញៀនថ្នាំផង។
លោកមេភូមិបន្តថា កន្លងមកទីតាំងនេះ គឺយប់អធ្រាត្រឡើងពុំសូវមានប្រជាពលរដ្ឋក្នុងភូមិហ៊ានធ្វើដំណើរឆ្លងកាត់ឡើយ ព្រោះខ្លាចខ្មោចលងតែបច្ចុប្បន្នក្រុមអ្នកញៀនថ្នាំបែរជាយកទីតាំងបញ្ចុះសពនេះ ធ្វើជាកន្លែងប្រមូលគ្នាសំងំជក់ថ្នាំ សូម្បីតែខ្មោចក៏ពុំខ្លាចដែរ អញ្ចឹងទេមានតែបោសសំអាត និង ដុតបំផ្លាញចោលតែម្តង ហើយម្យ៉ាងទៀតជិតដល់ថ្ងៃបុណ្យចូលឆ្នាំចិនផងក្រែងម្ចាស់លោកមិនហ៊ានមកសែនព្រេន ព្រោះខ្លាចក្រុមអ្នកញៀនថ្នាំ៕
Source: Kampuchea Thmey Daily
0 Comments