គ្រូបង្វឹក​ក្រុម​វិសាខា មិនទាន់​មោទនភាព​ចំពោះ​លទ្ធផល​វិជ្ជមាន​ក្នុង​ប្រកួត​មិត្តភាព​កម្តៅ​សាច់ដុំ​នោះទេ

​បន្ទាប់ពី​ឆ្លងកាត់​ការប្រកួត​មិត្តភាព​ចំនួន​១១​ប្រកួត ក្នុង​រដូវ​កាល​ដើម្បី​ត្រៀម​រដូវ​កាល​ថ្មី ខាងមុខ​ក្លិប​កីឡាបាល់ទាត់​វិសាខា សមាជិក​ពានរង្វាន់​លី​គ​កំពូល​កម្ពុជា (Metfone Cambodian League) ទើបតែ​បរាជ័យ​ម្ដងគត់​។ ទន្ទឹម​នឹង​គ្នា​នេះដែរ​លោក ហុក សុ​ជីវ័ន គ្រូបង្វឹក​បាន​អះអាងថា ទោះបី​ឈ្នះ​ច្រើន​ប្រកួត​មែន តែ​ជ័យជម្នះ​លក្ខណៈ​មិត្តភាព​នេះ មិន​ប្រាកដ​សម​ប្រា​កប​ក្នុង​ការប្រកួត​ផ្លូវការ នៃ​លី​គ​កំពូល​កម្ពុជា​នោះទេ​។



​គ្រូបង្វឹក​កំពុងកាន់​អាជ្ញា​ប័ណ្ណ AFC A License រូប​នេះ​បាន​បន្ត​ថា ​កន្លង​មក​នេះ​គ្រាន់តែ​ជាការ​ប្រកួត​មិត្តភាព​មិនមែន​ជា​ការប្រកួត​ផ្លូវការ​នោះទេ ដោយហេតុនេះ ទាំង​កីឡាករ និង​សមាជិក​ក្រុម​ទាំងអស់ ត្រូវ​បង្កើន​ការ​ខំប្រឹង​បន្ថែម​ទៀត ទើប​ទទួល​បាន​លទ្ធផល​ល្អ នា​រដូវ​កាល​ថ្មី​។ លោក​បាន​បន្តថា «​នេះ​គ្រាន់តែ​ជាការ​ប្រកួត​មិត្តភាព យើង​មិនទាន់​ច្បាស់​នូវ​ទម្រង់​លេង​របស់​ពួកគេ ១០០% នោះទេ អញ្ចឹង​វា​អាច​នឹង​មានការ​ប្លែក​ទៀត។ អ្វី​ដែល​យើង​ធ្វើ​បាន​ពេលនេះ យើង​មិនអាច​ស្មានថា ចូលដល់​លី​គ វា​នឹង​សមប្រកប​សម្រាប់​យើង​នោះ​ទេ យើង​ត្រូវ​ការ​ខិតខំ​ប្រឹងប្រែង​បន្ថែម ពិសេស​កីឡាករ ត្រូវ​បង្កើន​ការយល់​ពី​គ្នា​ទៅវិញទៅមក​ឲ្យ​បាន​ច្រើនជាង​នេះ​»​។



មក​ទល់​ពេល​នេះ​ ក្លិប​កីឡាបាល់ទាត់​វិសាខា បាន​ធ្វើ​ការប្រកួត​មិត្តភាព​ជាតិ និង​អន្ដរជាតិ ដើម្បី​ត្រៀម​រដូវ​កាល​ថ្មី ចំនួន ១១​ប្រកួត​មក​ហើយ ដោយ​បញ្ចប់​ជាមួយ​លទ្ធផល​ឈ្នះ ៨ លើក ហើយ​ស្មើគ្នា​បាន ២​លើក និង​ចាញ់​១​។ សម្រាប់​ប្រកួត​បន្ទាប់​ក្លិប​កីឡាបាល់ទាត់​វិសាខា នឹង​បន្ដ​បើក​ទ្វារផ្ទះ​ស្វាគមន៍​ការប្រកួត​មិ​ត្ដ​ភាព​ទី​១២ របស់ខ្លួន ដោយ​ត្រូវ​ជួប​ក្រុម African All Stars នៅ​កីឡដ្ឋាន​វិសាខា របស់ខ្លួន​។



សូម​រំលឹក​ថា ​ក្លិប​លេខ​៣​ឆ្នាំ​ចាស់​ក្នុង​លី​គ​កំពូល​កម្ពុជា​នេះ ទើបតែ​បញ្ចប់​កម្មវិធី​បោះ​ជំរុំ​ហ្វឹកហាត់ Pre-Season Tour នៅ​ប្រទេស​ថៃ ចាប់ពី​ថ្ងៃទី​៧ ខែមករា ដល់​១៨ ខែមករា ឆ្នាំ​២០១៩ ខណៈ​ក្រុម​នេះ​នៅតែ​បន្ដ​ហ្វឹកហាត់ និង​ប្រកួត​មិត្តភាព​ក្នុងស្រុក​មួយចំនួន ដើម្បី​ត្រៀម​រដូវ​កាល​ថ្មី ទាំង​ការប្រកួត​ក្របខណ្ឌ​លី​គ​កំពូល​កម្ពុជា និង​ពានរង្វាន់​សម្ដេច​តេ​ជោ ហ៊ុន សែន លើក​ទី​១៣ ឆ្នាំ​២០១៩ ខាងមុខ​៕

Source: Kampuchea Thmey Daily