ភ្នំពេញ ៖ ជនសង្ស័យ២នាក់ ធ្វើសកម្មភាពលួចម៉ូតូមិនទាន់បានសម្រេចផង ត្រូវសមត្ថកិច្ចធ្វើការឃាត់ខ្លួន កាលពីវេលាម៉ោង ០៤ និង ២០នាទីទៀបភ្លឺ ថ្ងៃទី២៩ ខែមករា ឆ្នាំ២០១៩ នៅចំណុចទល់មុខផ្ទះសំណាក់ខេង ធី ផ្លូវបេតុង បន្ទប់ផ្ទះជួល ភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ។
សមត្ថកិច្ចបានប្រាប់ឲ្យដឹងថា ជនសង្ស័យ -ទី១ឈ្មោះ ហេង សារិន ភេទប្រុសអាយុ៣៨ ឆ្នាំមុខរបរ ដេរស្បែកជើង ស្នាក់នៅចំណុចបន្ទប់ផ្ទះជួលម្ដុំសង្កាត់ទួលសង្កែ ខណ្ឌឫស្សីកែវ។
ទី២ឈ្មោះ សុខ ម៉ៅ អាយុ២៣ ឆ្នាំមុខរបរ មិនពិតប្រាកដ ស្នាក់នៅចំណុចបន្ទប់ជួល ភូមិត្រពាំងឈូក សង្កាត់អូរបែកក្អម ខណ្ឌសែនសុខ។
សមត្ថកិច្ចបានបន្ដទៀតថា មុនពេលកើតហេតុយប់ថ្ងៃទី២៨ ខែមករា ឆ្នាំ២០១៩ ជនរងគ្រោះបានទុកម៉ូតូម៉ាក Fz ពណ៌ខ្មៅដែលពាក់ស្លាកលេខភ្នំពេញ1Bz-4191 ក្នុងរបងមុខបន្ទប់ជួល ដោយបានចាក់សោបូមខាងមុខ មិនបានចាក់សោទ្វាររបងទេ រួចក៏ចូលក្នុងបន្ទប់ដេករហូតដល់ម៉ោង៤ ទៀបភ្លឺ ថ្ងៃទី២៩ ខែមករា ឆ្នាំ២០១៩ ក៏មានជនសង្ស័យ២នាក់ ចូលមកធ្វើសកម្មភាពលួចម៉ូតូដោយជនសង្ស័យម្នាក់ជាអ្នកធ្វើសកម្មភាពនិងម្នាក់ទៀតយាមផ្លូវខាងក្រៅ ស្រាប់តែចៃដន្យកម្លាំងនគរបាលប៉ុស្ដិ៍ស្ទឹងមានជ័យ៣ ល្បាតក្នុងភូមិសាស្ដ្រ ដើម្បីទប់ស្កាត់បទល្មើសផ្សេងៗក៏ប្រទះឃើញជនសង្ស័យក៏ឃាត់ខ្លួនសួរនាំ បន្ទាប់មកទើបដឹងថា ជនសង្ស័យទាំង២នាក់កំពុងធ្វើសកម្មភាពលួចម៉ូតូក៏ឃាត់ខ្លួនយកមកប៉ុស្ដិ៍ដើម្បីសួរនាំតែម្ដង។
វត្ថុតាងដកហូតរួមមាន ម៉ូតូចំនួន២ គ្រឿង ,ទូរសព្ទដៃ១គ្រឿង , ដែកលួសសម្រាប់ឆ្កិះសោចំនួន១។
ក្រោយពេលសួរនាំរួចមកសមត្ថកិច្ចប៉ុស្ដិ៍ស្ទឹងមានជ័យទី៣ បានកសាងសំណុំរឿង បញ្ជូនខ្លួនជនសង្ស័យទាំង២នាក់ ទៅកាន់អធិការនគរបាលខណ្ឌមានជ័យ ដើម្បីចាត់ការបន្ដតាមនីតិវិធី៕
Source: Kampuchea Thmey Daily
0 Comments