ភ្នំពេញ ៖ យុវជនពីរនាក់ បានរងរបួសធ្ងន់ ដោយម្នាក់ត្រូវបានឡានបង្កបុក ហើយកិនជាមួយនឹងម៉ូតូកល់កង់ឡាន ហើយម្នាក់ទៀតខ្ទាតចេញក្រៅកង់ឡានរបួសស្រាល ដោយសារយុវតីម្នាក់ បើកឡានម៉ាកឡង់គ្រីសស័រ ដឹកក្រុមគ្រួសារ រួមទាំងម្ដាយទៅហាត់ក្បាច់គុនតេក្វាន់ដូ ដល់ពេលជួបគ្រោះថ្នាក់បែបនេះ ទើបស្ដ្រីជាម្ដាយចុះមកទ្វារខាងស្ដាំអះអាងថា ខ្លួនជាអ្នកបើក ដោយមិនទាន់មានអ្នកណាសួរនាំផងនោះ ហើយក្មេងស្រីជាអ្នកបើកបរនោះ ក៏ចុះតាមទ្វារស្ដាំតាមក្រោយម្ដាយដែរ។
ហេតុការណ៍នេះ បានកើតឡើងកាលវេលាម៉ោង៥ល្ងាច ថ្ងៃទី២០ ខែមករា ឆ្នាំ២០១៩ តាមបណ្ដោយផ្លូវ២០០៤ ហៅផ្លូវម៉ៃដា ចំណុចស្តុប វត្តអង្គតាមិញ ដែលស្ថិតនៅភូមិត្រពាំងល្វា សង្កាត់កាកាបទី១ខណ្ឌពោធិ៍សែនជ័យ។
រថយន្តបង្កម៉ាកឡង់គ្រីស័រ ពណ៌ស ពាក់ស្លាកលេខភ្នំពេញ 2AX-6616 ជិះគ្នា៥នាក់ ម្តាយ និងកូនៗ៤នាក់ ស្លៀកពាក់ឯកសណ្ឋានរៀនក្បាច់គុនតេក្ខាន់ដូ បើកក្នុងទិសដៅពីកើត ទៅលិច។ ចំណែកម៉ូតូរងគ្រោះ ម៉ាកហុងដាឌ្រីម សេ១១០ហៅ(សង់បិច) ពណ៌ខ្មៅ ពាក់ស្លាកភ្នំពេញ 1BH-8130 បើកបរដោយយុវជនពីរនាក់ ទិសដៅពីជើងទៅត្បូង ឆ្លងផ្លូវចំណុចស្តុប។
តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ មានយុវជនពីរនាក់ បើកម៉ូតូឆ្លងស្តុបភ្លើងសញ្ញាអាទិភាព ទិសដៅពីជើង ទៅត្បូង ហើយបត់ឆ្វេង បន្ទាប់មក ស្រាប់តែមានរថយន្តម៉ាកឡង់គ្រីស័រ ពណ៌ស ស៊េរីទំនើប បានបើកបរឆ្លងស្តុបដែរ ទិសដៅពីកើតទៅលិច ក្នុងល្បឿនយ៉ាងលឿន បានបុកម៉ូតូជនរងគ្រោះ ហើយកិនម៉ូតូ ព្រមទាំងជនរងគ្រោះជិះខាងក្រោយពេញទំហឹងបណ្តាលឲ្យរថយន្តឡើងកិនលើម៉ូតូ ចំណែកឯជនរងគ្រោះដែលជិះខាងក្រោយ ក៏ត្រូវឡានកិនជាមួយម៉ូតូដែរ តែគងផុតកង់ឡាន រងរបួសធ្ងន់ ហើយរថយន្ត បានរេចង្កូតឡើងខឿនទ្រូងផ្លូវ និងបុកបង្គោលភ្លើងបំភ្លឺផ្លូវ តែមិនធ្ងន់ធ្ងរនោះឡើយ។
ប្រជាពលរដ្ឋបានបញ្ជាក់ទៀតថា ពេលនោះគេបានឃើញក្មេងស្រីតូចជាអ្នកបើកបររថយន្តបង្ក ចុះពីលើរថយន្តតាមទ្វារផ្នែកខាងស្ដាំ តាមក្រោយម្តាយ។ ស្ត្រីជាម្តាយបាននិយាយប្រាប់ថា រូបគាត់ ជាអ្នកបើករថយន្ត ហើយម៉ូតូទេ ដែលបានបើកបុករថយន្តរបស់គាត់ ខណៈពេលគាត់បើកឆ្លងស្តុប។ តែបើតាមសំដី យុវជនអ្នកបើកម៉ូតូដែលរងរបួសស្រាលបាននិយាយប្រាប់ថា រូបគាត់បានបើកឆ្លងផ្លូវ ពេលស្តុបពណ៌ខៀវ ខណៈឆ្លងផុតទៅហើយ ក៏ត្រូវរថយន្តខាងលើបុកតែម្តង។
ប្រភពព័ត៌មានបានបន្តទៀតថា ខណៈគ្រោះថ្នាក់ភ្លាមៗ ជនរងគ្រោះរងរបួសធ្ងន់ខាងលើ ត្រូវបានរថយន្តសាមុយឯកជនសម្ភពរស្មីដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យបានប្រគល់ឲ្យជំនាញ នៃការិយាល័យចរាចរណ៍ផ្លូវគោករាជធានីភ្នំពេញ ធ្វើការវាស់វែង និងយករថយន្ត និងម៉ូតូ យកទៅរក្សាទុក ដើម្បីរង់ចាំការដោះស្រាយថ្ងៃក្រោយ៕
Source: Kampuchea Thmey Daily
0 Comments