ភ្នំពេញ ៖ ជនសង្ស័យចំនួន៥នាក់ ត្រូវបាននគរបាលខណ្ឌឫស្សីកែវឃាត់ខ្លួន បន្ទាប់ពីទាស់ពាក្យសំដីគ្នា ហើយជនទាំងនោះ ព្រួតគ្នាវាយសម្លាប់ជនរងគ្រោះ កាលពីវេលាម៉ោង៨និង០០នាទីយប់ថ្ងៃទី២០ ខែមករា ឆ្នាំ២០១៩ ត្រង់ចំណុចម៧ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ។
សមត្ថកិច្ចឲ្យដឹងថា ជនបង្កមានបក្ខពួក០៥នាក់ ទី១.ឈ្មោះ គឹម ហួន ភេទប្រុស អាយុ៣០ឆ្នាំ ជនជាតិខ្មែរ។ ទី២.ឈ្មោះ ចេវ ដារា ហៅឡុង ភេទប្រុស អាយុ៣៤ឆ្នាំ។ ទី៣.ឈ្មោះ ខាន់ សុខុន ភេទប្រុស អាយុ២៩ឆ្នាំ ជនជាតិខ្មែរ។ ទី៤.ឈ្មោះ ភ័ណ្ឌ តុល ភេទប្រុស អាយុ២០ឆ្នាំ។ ទី៥.ឈ្មោះ ស្រ៊ី វាសនា ហៅពៅ ភេទប្រុស អាយុ១៩ឆ្នាំ ទាំង៥នាក់ ស្នាក់នៅការដ្ឋានសំណង់ ក្រុម៧ ភូមិឡកំបោរ សង្កាត់ស្វាយប៉ាក មុខរបរកម្មករសំណង់។
ចំណែកជនរងគ្រោះឈ្មោះ ខុន ឃីម ភេទប្រុស៣៤ឆ្នាំ ស្នាក់នៅក្រុម៧ ភូមិឡកំបោរ សង្កាត់ស្វាយប៉ាក មុខរបរកម្មករសំណង់ ដូចគ្នារងរបួសបែកក្បាល បញ្ជូនទៅមន្ទីរពេទ្យកាល់ម៉ែត ដោយសារស្ថានភាពរបួសធ្ងន់ធ្ងរពេក គ្រូពេទ្យអស់លទ្ធភាពសង្គ្រោះ ក៏ឲ្យក្រុមគ្រួសារដឹកយកទៅស្រុកកំណើត ហើយជនរងគ្រោះក៏ស្លាប់ ខណៈដឹកដល់ផ្ទះឯស្រុកកំណើតតែម្ដង។
តាមប្រភពដដែលបន្តថា កាលពីវេលាម៉ោងប្រហែល៧និង០០នាទី ថ្ងៃ ខែ ឆ្នាំដដែល ជនបង្កទាំង៥នាក់ខាងលើ បបួលគ្នាទិញស្រាបៀផឹក ហើយឈ្មោះ គឹម ហួន ជាអ្នកទៅទិញ ក៏បានទាស់សំដីជាមួយជនរងគ្រោះនៅកន្លែងទិញស្រា ហើយ គឹម ហួន ត្រឡប់មកកន្លែងវិញ ក៏នាំគ្នាទាំង០៥នាក់ ទៅវាយជនរងគ្រោះនៅកន្លែងកើតហេតុខាងលើតែម្តង បណ្ដាលឲ្យជនរងគ្រោះរងរបួសធ្ងន់យកទៅព្យាបាលនៅមន្ទីរពេទ្យកាលម៉ែត លុះចូលថ្ងៃ២១ ខែមករា ឆ្នាំ២០១៩ វេលាម៉ោង០០មន្ទីរពេទ្យ បានប្រាប់ក្រុមគ្រួសារថា គ្មានសង្ឃឹម ប្រញាប់ដឹកទៅស្រុក ទៅរៀបចំធ្វើបុណ្យ លុះដល់ម៉ោង៤និង០០នាទីទៀបភ្លឺ ជនរងគ្រោះបានស្លាប់នៅភូមិព្រែកប៉ុក ឃុំព្រែកស្តី ស្រុកកោះធំ ខេត្តកណ្តាល។
បច្ចុប្បន្ន ជនសង្ស័យទាំង៥នាក់ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តតាមនីតិវិធី៕
Source: Kampuchea Thmey Daily
0 Comments