ភ្នំពេញ ៖ មន្ត្រីនគរបាលថ្នាក់ឧត្តមសេនីយ៍ រួមនិងមន្ត្រីនគរបាល៥នាក់ទៀត ជាកូនចៅត្រូវបានកម្លាំងនគរបាលតម្រួតបទបញ្ជាក្រសួងមហាផ្ទៃមកឃាត់ខ្លួនយ៉ាងតក់ក្រហល់ ដោយចោទប្រកាន់ថា ចុះមកត្រួតពិនិត្យរោងចក្រនិងឃ្លាំងស្តុកបារី មិនបានសហការជាមួយនគរបាលមូលដ្ឋាន។
ហេតុការណ៍ដ៏ភ្ញាក់ផ្អើលនៃការបង្ក្រាបនេះ កើតឡើងកាលពីវេលាម៉ោង១១កន្លះព្រឹកថ្ងៃទី១០ ខែមករា ឆ្នាំ២០១៩ នៅចំណុចមុខរោងចក្រផលិតបារីមួយកន្លែងរបស់ក្រុមហ៊ុនTexas ស្ថិតនៅ តាមផ្លូវភ្នំពេញហាណូយ ក្នុងភូមិចុងថ្នល់ខាងលិច ចំទល់មុខទីស្នាក់ការនគរបាលរដ្ឋបាលសង្កាត់ទឹកថ្លា ខណ្ឌសែនសុខ។
លោកឧត្តមសេនីយ៍ដែលត្រូវបានគាឃាត់ខ្លួននោះឈ្មោះ លោកឧត្តមសេនីយ៍ត្រី ភូ សុផល បម្រើការនៅអង្គភាពគណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានីភ័យខ្ពស់ដល់សុខភាពនិងសុវត្ថិភាពសង្គមនៃក្រសួងមហាផ្ទៃ។
បើតាមប្រភពព័ត៌មានពីមន្ត្រីអាជ្ញាធរមូលដ្ឋានបានឲ្យដឹងថា នៅមុនពេលកើតហេតុ គេឃើញមានកម្លាំងនគរបាលមួយនោះ និងមានការចូលរួម ពីតំណាង មន្ត្រីតុលាការផង ក្រឡាបញ្ជីរបស់លោក ងិន ពេជ្រ ព្រះរាជអាជ្ញារងអមសាលាដំបូងរាជធានីភ្នំពេញ បានចុះមកត្រួតពិនិត្យ ឃ្លាំងស្តុកបារីគ្រប់មុខនៅទីនោះដែលគេបានស៊ើបអង្កេតរកឃើញការសង្ស័យថា មានផលិតបារីក្លែងក្លាយ។
ប្រភពដដែលបានបញ្ជាក់ថា នៅខណៈនោះពួកគេមិនទាន់បានចូល ត្រួតពិនិត្យឃ្លាំង នៅឡើយផង ក៏ស្រាប់តែមានកម្លាំងនគរបាលមូលដ្ឋាន មកអញ្ជើញទៅអធិការដ្ឋានខណ្ឌសែនសុខ។ លុះក្រោយមកស្រាប់តែ មានកម្លាំងតម្រួតបទបញ្ជាប្រដាប់ដោយកាំភ្លើង គ្រប់ដៃចំនួន ២រថយន្តមកនាំខ្លួនមន្ត្រីនគរបាលទាំងនោះ ឡើង រថយន្តដឹកយកទៅបាត់។
លោក ឧត្តមសេនីយ៍ទោ ទូច យុទ្ធា អនុប្រធានលេខាធិការដ្ឋាន និងជាប្រធានប្រតិបត្តិការ នៃគណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានីភ័យខ្ពស់ដល់សុខភាពនិងសុវត្តិភាពសង្គមនៃក្រសួងមហាផ្ទៃ បានឲ្យដឹងថា ការមកនាំខ្លួនមន្ត្រីនគរបាលខាងលើនេះគឺជាការយល់ច្រឡំ ប៉ុន្តែមន្ត្រីនគរបាលដែលឃាត់ខ្លួននោះបានដោះលែងវិញហើយព្រោះការយល់ច្រឡំ។
លោកឧត្តមសេនីយ៍ ក៏បានពន្យល់ឲ្យដឹងពីដំណើររឿងនេះថា នៅមុនពេលកើតហេតុកម្លាំង ខាងសមត្ថកិច្ចរបស់លោកបានទទួលព័ត៌មានមកថាមានរថយន្តមួយគ្រឿង ដឹកបារីក្លែងចូលក្នុងឃ្លាំងរោងចក្រខាងលើ ដោយដាក់ការសង្ស័យថា ជាទីតាំងផលិតបារីក្លែងក្លាយ លោកក៏បានរាយការណ៍ទៅព្រះរាជ្ញារងដើម្បីចុះមកធ្វើការត្រួតពិនិត្យរួមគ្នានៅពេលមកដល់ម្ចាស់បារីនោះមិនសហការទេ។ រីឯកងកម្លាំងរបស់លោកមិនទាន់បានចូលត្រួតពិនិត្យផង បែរជារាយការណ៍ទៅខាងលើប្រើកម្លាំងមកឃាត់ខ្លួនទាំងបំពានបែបនេះទៅវិញ៕
Source: Kampuchea Thmey Daily
0 Comments