ដោយសារ​មាន​ទំនុកចិត្ត​លើ រាជរដ្ឋាភិបាល ធនាគារ ប្រេដ ប៊ែ​ង គ្រោង​វិនិយោគ​ពង្រីក​សាខា​បន្ថែម​នៅ​កម្ពុជា ដើម្បី​ចូលរួម​អភិវឌ្ឍន៍​វិស័យ SME

ភ្នំពេញ​ ៖ លោក Olivier Klein នាយក​ប្រតិបត្តិ​នៃ​ធនាគារ ប្រេដ ប៊ែ​ង បាន​ថ្លែង​ថា ធនាគារ ប្រេដ ប៊ែ​ង (BRED Bank) ដែល​ជា​ស្ថាប័នហិរញ្ញវត្ថុ​ដ៏​ធំ​របស់​ប្រទេស​បារាំង គ្រោង​ពង្រីក​សាខា​បន្ថែម នៅតាម​បណ្តា​ខេត្ត​ ដែល​មាន​សក្តានុពល​មួយ​ចំនួន​ទៀត ដើម្បី​ចូលរួម​អភិវឌ្ឍន៍​វិស័យ​សហគ្រាស​ធុន​តូច និង​មធ្យម (SME) ជាមួយ​រាជរដ្ឋាភិបាល​កម្ពុជា​។

ការ​ថ្លែង​របស់​លោក Olivier Klein បាន​ធ្វើ​ឡើង កាលពី​រសៀល​ថ្ងៃទី​១៧ ខែមករា ឆ្នាំ​២០១៩ នៅក្នុង​ជំនួប ពិភាក្សា​ការងារ​ជាមួយ លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម អំពី​ប្រតិបត្តិការ និង​សេវាកម្ម​ទូទៅ​របស់​ធនា​គារ ប្រេដ ប៊ែ​ង ទាំង​ប្រភេទ​ហិរញ្ញវត្ថុ និង​មិនមែន​ហិរញ្ញវត្ថុ (​ការបណ្តុះបណ្តាល​សហគ្រិន​ភាព ការ​ប្រឹក្សា​យោបល់​ជូន​វិស័យ SME និង​ការ​ចងក្រង​បណ្តាញ​ធុរកិច្ច​)​។



លោកនាយក​ប្រតិបត្តិ បាន​ឲ្យ​ដឹង​ទៀត​ថា នៅក្នុង​ឆ្នាំ​២០១៨ ធនាគារ ប្រេដ ប៊ែ​ង បាន​ផ្តល់​ប្រាក់កម្ចី​ជាង ១០០​លាន​ដុល្លារ ដល់​វិស័យ​ឯកជន ដែល​នៅ​ក្នុងនោះ​ជាង ៨០% គឺជា​កម្មសិទ្ធិ​របស់​ជ​ន​ជាតិខ្មែរ​។ លោក Olivier Klein បានស្នើ​សុំ​យោបល់​ពី លោក រដ្ឋមន្ត្រី ទាក់ទង​ផែនការ​ពង្រីក​វត្តមាន​សាខា​ធានា​គារ ប្រេដ ប៊ែ​ង បន្ថែម ដើម្បី​ចូលរួម​អភិវឌ្ឍន៍​វិស័យ SME នៅក្នុង​ប្រទេស​កម្ពុជា។

​ជា​ការ​ឆ្លើយតប លោក រដ្ឋមន្ត្រី ប៉ាន សូរ​ស័ក្តិ បាន​ថ្លែងអំណរគុណ លោក Olivier Klein ដែល​បាន​ទុកចិត្ត​មក​លើ​ការដឹកនាំ​របស់​រាជរដ្ឋាភិបាល ហើយ​បាន​ជ្រើសរើស​ប្រទេស​កម្ពុជា ធ្វើជា​ទីតាំង​វិនិយោគ ដើម្បី​ចូលរួម​អភិវឌ្ឍន៍​វិស័យ​ធនាគារ និង​វិស័យ SME ដែល​ត្រូវ​បាន​ចាត់ទុកជា​ក្បាលម៉ាស៊ីន​ដ៏​សំខាន់​នៃ​កំណើនសេដ្ឋកិច្ច និង​បាន​ពន្យល់​អំពី​គោលនយោបាយ​គាំពារ​វិនិយោគ និង​គោលនយោបាយ​អភិវឌ្ឍន៍​ឧស្សាហកម្ម (IDP) របស់​រាជរដ្ឋាភិបាល​កម្ពុជា​។



លោក​រដ្ឋមន្ត្រី បាន​ជម្រាប​លោកនាយក​ប្រតិបត្តិ អំពី​គម្រោង​ជំរុញ​ទីផ្សារ​សម្រាប់​កសិកម្ម​ខ្នាតតូច (AIMS) ដែល​ផ្តោត​សំខាន់​លើ​ការ​អភិវឌ្ឍ​ខ្សែ​ចង្វាក់​តម្លៃ​ផលិតផល​ស្រូវ ដំឡូង​មី បន្លែ មាន់​ស្រែ និង​សូត្រ​ប្រណិត ដើម្បី​លើកស្ទួយ​ជីវភាព​ប្រជាកសិករ​ក្រីក្រ និង​បាន​ស្នើ​ធនាគារ ប្រេដ ប៊ែ​ង ជួយ​គាំទ្រ​គម្រោង​នេះ តាមរយៈ​ការ​ផ្តល់សេវា​ពិគ្រោះ​យោបល់ និង​វគ្គ​បណ្តុះបណ្តាល​ផ្សេងៗ ទាក់ទង​ការ​អភិវឌ្ឍ​សហគ្រិនភាព ព្រមទាំង​ប្រាក់កម្ចី ដែល​មាន​អត្រា​ការប្រាក់​ទាប ដល់​សមាគម​កសិករ ក្នុងការ​ពង្រីក​មុខរបរ ដោយ​ផ្អែកលើ​ប្រតិបត្តិការ​ដែល​មាន​កិច្ចធានា (​ប្រើប្រាស់​ផែនការអាជីវកម្ម កសិផល និង​សម្ភារៈ ជំនួស​ឲ្យ​ការ​ដាក់​ទ្រព្យ​បញ្ចាំ​)​។

បន្ថែម​លើស​នេះ លោក​រដ្ឋមន្ត្រី ប៉ាន សូរ​ស័ក្តិ ក៏បាន​សន្យា​ជួយ​គាំទ្រ​ប្រតិបត្តិការ​របស់​ធនាគា​រ ប្រេដ ប៊ែ​ង និង​បាន​សំណូមពរ លោក Olivier Klein ជួយ​កៀងគរ​វិនិយោគិន​បារាំង ឲ្យ​ចូល​មក​បណ្តាក់ទុន​កាន់​តែ​ច្រើន​នៅ​កម្ពុជា ដើម្បី​ធ្វើ​ពិពិធ​កម្ម​ឱកាស​ការងារ​ជូន​ប្រជាជន និង​ព​ន្លឿ​ន​ការអភិវឌ្ឍ​កំណើន​សេដ្ឋកិច្ចជាតិ៕

Source: Kampuchea Thmey Daily