ក្រុមបាល់ទាត់យុវជនក្រោមអាយុ២២ឆ្នាំ ដែលសមាជិកពានរង្វាន់ជើងឯកតំបន់អាស៊ាន AFF U22 Championshipនៅឆ្នាំ ២០១៩ ទាំង៧ក្រុម បានធ្វើដំណើរមកដល់រាជធានីភ្នំពេញ ដែលជាទឹកដីកណ្ដាលសម្រាប់ប្រកួតប្រជែងដណ្តើមពានរង្វាន់នេះអស់ហើយ ខណៈការប្រកួតនឹងចាប់ផ្តើមធ្វើឡើងពីថ្ងៃអាទិត្យ ចុងសប្ដាហ៍នេះតទៅ។
តាមពិតទៅពានរង្វាន់នេះមានក្រុមចំនួន១១ក្រុមជាសមាជិកប្រទេសតំបន់អាស៊ាន (បូកទីម័រខាងកើត ១ក្រុមទៀតសម្រាប់ផ្នែកកីឡា) ត្រូវចូលរួមប្រកួតប្រជែង។ ប៉ុន្តែដោយសារការប្រកួតនេះសហព័ន្ធកីឡាបាល់ទាត់តំបន់អាស៊ានខកខានរៀបចំជាយូរឆ្នាំមកហើយ ព្រមទាំងមានកាលវិភាគជាន់គ្នានឹងសកម្មភាពប្រទេសតាមប្រទេសជាសមាជិកមួយចំនួនទៀតមានប្រទេសខ្លះមិនបានបញ្ជូនក្រុមមកចូលរួមនោះទេ។ ជាក់ស្តែងមានដូចជាក្រុមមកពីប្រទេសសឹង្ហបុរី,ឡាវ និងប្រ៊ុយណេ ជាដើម។
យោងតាមប្រភពមកពីមន្ត្រីសហព័ន្ធកីឡាបាល់ទាត់កម្ពុជា បានបញ្ជាក់ក្រុមទាំងអស់បានធ្វើដំណើរមកដល់នៅថ្ងៃសុក្រ សប្ដាហ៍នេះដំណាលគ្នាគឺក្រុមទីម័រខាងកើត មកដល់ម៉ោង ៧និង០៥នាទីព្រឹក ហើយម៉ាឡេស៊ី មកដល់ម៉ោង ៩និង៥០ នាទីព្រឹក ក្រុមថៃវិញ មកដល់នៅម៉ោង ១៥និង០០ រសៀល ក្រុម វៀតណាម មកដល់ម៉ោង ១៦និង១៥ នាទីរសៀល ក្រុមឥណ្ឌូនេស៊ី ជាមួយ ហ្វីលីពីន មកដល់ម៉ោង ១៧និង៣០ ល្ងាច និងក្រុមមីយ៉ាន់ម៉ា ដល់ម៉ោង ២០និង៤៥ យប់។
ពានរង្វាន់ AFF U22 Championship មានក្រុមចំនួន៨ចូលរួមដោយក្នុងនោះពូល Aមាន វៀតណាម ថៃ ទីម័រខាងកើត និងហ្វីលីពិន ខណៈឯក្នុងពូល B វិញមានឥណ្ឌូណេស៊ី ម៉ាឡេស៊ី មីយ៉ាន់ម៉ា និងម្ចាស់ផ្ទះកម្ពុជា។ ការប្រកួតធ្វើឡើងពីថ្ងៃទី១៧ ខែកុម្ភៈ ដល់ថ្ងៃទី២ ខែមីនា ឆ្នាំ២០១៩ ក្នុងរាជធានីភ្នំពេញ។ សម្រាប់ប្រកួតបើកឆាកដែលធ្វើឡើងនៅថ្ងៃអាទិត្យ ចុងសប្ដាហ៍នេះគឺវេនរបស់ពូល A ដោយក្រុមវៀតណាម ប៉ះហ្វីលីពីន នៅម៉ោង៣:៣០នាទីរសៀល លើទីលានពហុកីឡដ្ឋានជាតិ ហើយគូបន្ទាប់ក្រុមថៃ ជួបទីម័រខាងកើត នៅវេលាម៉ោង៦និង៣០នាទីយប់លើទីលានជាមួយគ្នា។
តាមពិតទៅពានរង្វាន់ប្រភេទយុវជន U22 នេះត្រូវបាន AFF សហការគ្នាបង្កើតឡើងវិញ នៅឆ្នាំ២០១៩ ខាងមុខ ក្រោយពីខកខានជាយូរមកហើយ ពោលគឺតាំងពីឆ្នាំ ២០០៥ មកម្ល៉េះ។
គណៈកម្មការក៏បានកំណត់ដែលថា ក្រុមខ្លាំងជាងគេចំនួន៤ក្រុម នៃពានរង្វាន់ AFF U22នេះ នឹងទទួលបានកៅអីឡើងទៅលេងក្នុងវគ្គជម្រុះពានបាល់ទាត់យុវជនក្រោមអាយុ២៣ឆ្នាំ (U23) ប្រចាំទ្វីបអាស៊ី (AFC U-23) ផងដែរ៕
Source: Kampuchea Thmey Daily
0 Comments