ភ្នំពេញ ៖ រាជបណ្ឌិត្យសភាកម្ពុជាបាន បង្ហាញគំរោងស្រាវជ្រាវ ស្តីពី «ការគាំទ្របច្ចេកវិទ្យាផលិតនិងប្រើប្រាស់បាយអូឆា (BIOCHARS)ដើម្បីបង្កើនទិន្នផលកសិកម្មនៅកម្ពុជា» នាព្រឹកថ្ងៃទី១៤ ខែកុម្ភៈ ឆ្នាំ២០១៩ ក្រោមការអញ្ជើញចូលរួមពីសំណាក់លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជានិងមន្ត្រីស្ថាប័នពាក់ព័ន្ធរួមទាំងនិស្សិតមួយចំនួនផងដែរ។
លោកបណ្ឌិត យង់ ពៅ បានមានប្រសាសន៍ថា «បច្ចេកវិទ្យាផលិតនិងប្រើប្រាស់បាយអូឆា(BIOCHARS) គឺមានសារៈសំខាន់ណាស់ ដោយយកកាកសំណល់ទៅផលិតជាបាយអូឆា ដែលជួយដល់គុណភាពដីឲ្យបានល្អឡើងវិញ ដែលជាការរួមចំណែកជួយដល់វិស័យកសិកម្ម និង ប្រជាជននៅតាមជនបទបានយ៉ាងច្រើន។ ទន្ទឹមនឹងនោះ ក៏ជួយដល់ប្រជា ជននៅទីក្រុងដែរ ព្រោះអ្នកនៅទីក្រុង ផលិតសំរាមច្រើនជាងគេ ជាពិសេសសំរាមផ្ទះបាយ ដែលអាចយកទៅផលិតបាយអូឆាយ៉ាងល្អ។ ឧទាហរណ៍ នៅរដូវទុរេន ការពិតសម្បកទុរេនទាំងនោះគ្រាន់តែជាកាកសំណល់តែប៉ុណ្ណោះ ប៉ុន្តែបើផលិតជាបាយអូឆា នោះនឹងក្លាយជាវត្ថុមានតម្លៃជាទីបំផុត»។ ហេតុនេះ លោកបណ្ឌិត យង់ ពៅ ស្នើឲ្យមានការដោះដូរយោបល់គ្នារវាងអ្នកដែលចូលរួមក្នុងកម្មវិធីនេះ ឲ្យបានកាន់តែច្រើនដើម្បីស្វែងរកឲ្យឃើញរូបមន្តល្អៗ ដើម្បីជួយដល់ប្រទេសជាតិយើង។
ឆ្លៀតក្នុងឱកាសនោះ លោកបណ្ឌិតបានប្រកាសថា « រាជបណ្ឌិត្យសភាកម្ពុជា មានដៃគូវិទ្យាសាស្ត្រជាច្រើន ទាំងក្នុងស្រុក និងអន្តរជាតិ ដែលអាចជំរុញដល់ការសិក្សាស្រាវជ្រាវឲ្យកាន់តែមានភាពរីកចម្រើន ហើយរាជបណ្ឌិត្យ សភាកម្ពុជាជំរុញនិងបើកចំហចំពោះការសិក្សាស្រាវជ្រាវបែបវិទ្យាសាស្ត្រ។ ជាមួយគ្នានោះ រាជបណ្ឌិត្យសភាកម្ពុជាស្នើឲ្យមានការប្រមូលផ្តុំគ្នាបង្កើតជាស្នាដៃថ្មី ដើម្បីជួយដល់សង្គមជាតិឲ្យមានការរីកចម្រើន ពីព្រោះបើយើងមិនប្រឹងបង្កើតស្នាដៃថ្មីទេ យើងបានត្រឹមតែបង្អួតប្រាង្គប្រាសាទចាស់ៗ ចុះបើរបស់ទាំងនោះសឹករិចរិលអស់ តើយើងបានអ្វីទៅបង្អួតគេទៀត? ហើយបច្ចុប្បន្ន យើងកំពុងប្រើប្រាស់បច្ចេកទេសរបស់គេ ដែលពេលខ្លះបច្ចេកទេសទាំងនោះមិនត្រូវនឹងបរិបទរបស់យើង ដូចនេះបើយើងមិនស្វាគមន៍ការសិក្សាការស្រាវជ្រាវរកឃើញថ្មីៗទេ សង្គមយើងនឹងថយក្រោយហើយ ហើយយើងនឹងរង់ចាំប្រើបច្ចេកទេសរបស់គេរហូត»។
គួរបញ្ជាក់ថា បាយអូឆា គឺជាផលិតផលដែលបានមកពីការដុតមិនផ្ទាល់នូវជីវម៉ាស ឬភាវរស សរីរាង្គដោយអុកស៊ីហ្សែនតិចតួច ឬ គ្មានអុកស៊ីហ្សែន។ វិធីដែលដុតនេះហៅថា វិធីPyrolysis។បាយអូឆាមានប្រយោជន៍ច្រើនដូចជា រក្សាសំណើមក្នុងដី មិនងាយពុកផុយ(រយៈពេលរាប់ឆ្នាំ)ជាជំរករបស់អតិសុខុមប្រាណ បង្កើនអុកស៊ីហ្សែនក្នុងដី និងធ្វើឲ្យដីមានជីជាតិ។ បាយអូឆាដែលសិក្សាស្រាវជ្រាវនេះនឹងយកទៅអនុវត្តលើដំណាំពីរប្រភេទ រួមមានដំណាំស្ពៃខ្មៅនិងដំណាំពោត៕
Source: Kampuchea Thmey Daily
0 Comments