ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅក្នុងហ្វេសបុកផ្លូវការនាថ្ងៃទី១៣ខែកុម្ភៈនេះ បានលើកឡើងថា កម្ពុជាធ្លាប់ក្រីក្រលំបាកខ្លាំងណាស់គឺយើងមិនវិលថយក្រោយជាដាច់ខាត។ ពេលនេះយើងបានងើបឈរដោយខ្លួនឯងបានហើយ ត្រូវតែបន្តប្រឹងប្រែងទៅមុខទៀតជាមួយនឹងក្តីសង្ឃឹមជឿជាក់ដោយមិនត្រូវឲ្យមានអ្វីមករំខានដល់ដំណើរការអភិវឌ្ឍប្រទេសជាតិឡើយ។
សម្តេចតេជោនាយករដ្ឋមន្ត្រី ហ៊ុន សែន បានគូសបញ្ជាក់ថា «ខ្ញុំបានមើលពីក្នុងរថយន្តជាមួយសេចក្តីរំភើបរីករាយដែលបានឃើញបងប្អូនប្រជាពលរដ្ឋនិងក្មួយៗខិតខំប្រឹងប្រែងប្រកបការងារទោះបីការងារនោះតូច ឬ ធំក្តី គឺបងប្អូនធ្វើដោយទឹកមុខសប្បាយរីករាយ ដើម្បីជីវភាពរស់នៅកាន់តែល្អប្រសើរ»។
សម្តេចតេជោបន្តថា «កម្ពុជាធ្លាប់ក្រីក្រលំបាកខ្លាំងណាស់គឺយើងមិនវិលថយក្រោយជាដាច់ខាត។ ពេលនេះយើងបានងើបឈរដោយខ្លួនឯងបានហើយត្រូវតែបន្តប្រឹងប្រែងទៅមុខទៀតជាមួយនឹងក្តីសង្ឃឹមជឿជាក់ដោយមិនត្រូវឲ្យមានអ្វីមករំខានដល់ដំណើរការអភិវឌ្ឍប្រទេសជាតិឡើយ»។
សម្តេចតេជោ ហ៊ុន សែន ក៏បានលើកឡើងដែរថាស្ថានភាពពិភពលោកសព្វថ្ងៃក៏មានការប្រែប្រួល ទន្ទឹមកម្ពុជាកំពុងមានសុខសន្តិភាពនិងរីកចម្រើនប្រទេសមួយចំនួនក៏កំពុងមានសង្គ្រាមបំផ្លាញគ្រប់យ៉ាងហើយពលរដ្ឋគ្មានឱកាសអ្វីទាំងអស់។
សម្តេចតេជោនាយករដ្ឋមន្ត្រីបានអះអាងថា ប្រទេសជាតិដែលមានសុខសន្តិភាពពេញលេញដូចសព្វថ្ងៃ គឺជាអំណោយផលដ៏ល្អសម្រាប់ប្រជាពលរដ្ឋគ្រប់ៗរូប។
ជាការកត់សម្គាល់គេសង្កេតឃើញថា ប្រមុខរាជរដ្ឋាភិបាលកម្ពុជាសម្តេចតេជោហ៊ុនសែន តែងបាន ចេញសារនយោបាយខ្លីៗនៅតាមផេកហ្វេសបុកផ្លូវការរបស់សម្តេចជារៀងរាល់ថ្ងៃ។ សារខ្លីៗរបស់សម្តេចពុំបានសម្ដែងពីការព្រួយបារម្ភអំពីការគំរាមដក EBA របស់សហភាពអឺរ៉ុបពីកម្ពុជានោះទេ។ សម្តេចតែងលើកទឹកចិត្តនិងប្រាប់ទៅពលរដ្ឋអំពីការរីកចម្រើននៃសេដ្ឋកិច្ចកម្ពុជា និង លើកទឹកចិត្តឲ្យប្រជាពលរដ្ឋខ្មែរទាំងអស់ងើបឈរឡើងដោយខ្លួនឯង ដោយមិនត្រូវឲ្យពួកបរទេសមកធ្វើការកៀបសង្កត់បញ្ជាលើក្បាលខ្មែរតទៅទៀតបានទេ កម្ពុជាមិនអាចយកឯករាជ្យភាព និង អធិបតេយ្យភាពជាតិទៅប្តូរជាមួយនឹងជំនួយបរទេសតទៅទៀតទេ។ ប្រវត្តិសាស្ត្រពីអតីតកាលរបស់កម្ពុជាបានបង្ហាញច្បាស់ណាស់ថាដោយសារតែខ្មែរពឹងលើជំនួយបរទេសទើបខ្មែរបែកបាក់ជាតិសាសន៍ខ្លួនសង្គ្រាមហែកហួរគ្នាមិនចេះចប់មិនចេះហើយ។
ក្នុងស្ថានភាពបែបនេះប្រជាពលរដ្ឋកាន់តែយល់ច្បាស់ និង កាន់តែមានជំនឿជឿជាក់ថា គ្មានបរទេសណាស្រឡាញ់ខ្មែរជាងខ្មែរខ្លួនឯងនោះទេ ក្នុងស្ថានភាពកម្ពុជាពេលនេះ កំពុងជួបប្រឈមជាមួយបញ្ហាប្រឈម ធ្វើឲ្យកម្ពុជាកាន់តែក្លាហាន កម្ពុជាកាន់តែមានបទពិសោធន៍ កាន់តែរឹងប៉ឹងនិងចំណុចសំខាន់មួយគឺកម្លាំងមហាសាមគ្គីរបស់ជនជាតិខ្មែរ រួមគ្នាដោះស្រាយបញ្ហា។ ប្រជាពលរដ្ឋនៅតែមានជំនឿលើការដឹកនាំរបស់សម្តេចតេជោ ហ៊ុន សែន។ យើងនៅចាំបានថាកាលពីឆ្នាំ ១៩៧៩ យើងគ្មានអ្វីសោះគឺងើបចេញពីចំណុចសូន្យ សម្តេចតេជោ ហ៊ុន សែន បានប្រឹងដឹកនាំប្រទេសមួយនេះបានរីកចម្រើនមកទល់សព្វថ្ងៃ ជាប្រទេសមានអធិបតេយ្យភាព មានឯករាជ្យ និង បូរណភាពទឹកដី ប្រទេសមានការរីកចម្រើន ប្រែក្លាយពីប្រទេសក្រីក្របំផុតមកជាប្រទេសមានប្រាក់ចំណូលមធ្យមកម្រិតទាបនាពេលបច្ចុប្បន្ននិងឈានជាប្រទេ សមានចំណូលមធ្យមកម្រិតខ្ពស់នៅឆ្នាំ ២០៣០។
បច្ចុប្បន្នយើងមានអ្វីៗគ្រប់យ៉ាងតាំងពីធនធានមនុស្ស សុខសន្តិភាព និង មានធនធានសម្រាប់កិច្ចអភិវឌ្ឍន៍លើគ្រប់វស័យ។ ដូច្នេះប្រជាពលរដ្ឋមានសង្ឃឹមជានិច្ចព្រមទាំងមានភាពកក់ក្តៅក្រោមការដឹកនាំរបស់សម្តេចតេជោនិងគណបក្សប្រជាជនកម្ពុជា៕
Source: Kampuchea Thmey Daily
0 Comments