សិស្សប៊ែលធី ២៤១២៧នាក់ ចូលរួមប្រឡងសំណេរក្រោមប្រធានបទ “ទិវាបុណ្យនៃក្ដីស្រឡាញ់”

ភ្នំពេញ ៖ នាថ្ងៃទី១៣ ខែកុម្ភៈ ឆ្នាំ២០១៩ សាលា ប៊ែលធី អន្តរជាតិ បានរៀបចំការប្រឡងសំណេររបស់សិស្សចំណេះទូទៅពីថ្នាក់ទី៧ ដល់ទី១២ ក្រោមប្រធានបទ “ទិវាបុណ្យនៃក្ដីស្រឡាញ់” នៅគ្រប់សាខាសាលា ប៊ែលធី អន្តរជាតិទាំងអស់ ដើម្បីឱ្យសិស្សានុសិស្សបានស្វែងយល់កាន់តែច្បាស់ពីអត្ថន័យពិតនៃទិវានេះ។

តាមរបាយការណ៍លោក ប៊ុត ឌីម៉ង់ ប្រធានការិយាល័យចំណេះទូទៅនៃសាលាប៊ែលធីអន្តរជាតិ បានឲ្យដឹងថា សាលា ប៊ែលធី អន្តរជាតិ បានបង្កើត កម្មវិធីសិក្សាបន្ថែមធំៗ ចំនួន ៨ សម្រាប់ថ្នាក់ចំណេះទូទៅ និងភាសាអង់គ្លេសទូទៅ រួមមាន៖
ទី១.កម្មវិធីបង្កើនចំណេះដឹងទូទៅ
ទី២.កម្មវិធីពង្រឹងស្មារតី
ទី៣.កម្មវិធី ទស្សនកិច្ចសិក្សា
ទី៤.កម្មវិធិសិក្សាតាមទូរទស្សន៍
ទី៥.កម្មវិធីប្រឡងសំណេរ
ទី៦.កម្មវិធីប្រកួតប្រជែងគណិតវិទ្យា
ទី៧.កម្មវិធីប្រកួតប្រជែងទេពកោសល្យ
ទី៨.កម្មវិធីកីឡា។

លោក ប៊ុត ឌីម៉ង់ បានឲ្យដឹងទៀតថា ជារៀងរាល់ឆ្នាំសាលាតែងតែធ្វើការផ្សព្វផ្សាយពីអត្ថន័យ នៃទិវាបុណ្យនៃក្ដីស្រឡាញ់ ជូនដល់សិស្សប៊ែលធី ទាំង ១៩សាខា នៅតាមថ្នាក់ និងពេលគោរពទង់ជាតិ ហើយថ្ងៃទី១៣ កុម្ភៈនេះ សាលាបានរៀបចំឲ្យសិស្សចំណេះទូទៅពីថ្នាក់ទី៧ ដល់ទី១២ ចំនួន ២៤១២៧នាក់ ប្រឡងសំណេរ ក្រោមប្រធានបទ “ទិវាបុណ្យនៃក្ដីស្រឡាញ់” ដោយយកពិន្ទុប្រឡងនេះ គឺត្រូវបូកបញ្ចូលជាមួយពិន្ទុប្រឡងប្រចាំខែ មុខវិជ្ជាសីលធម៌-ពលរដ្ឋ។

ក្នុងឱកាសនោះ លោក លី ប៊ុនឆៃ អគ្គនាយករង ប៊ែលធីគ្រុប និងជាប្រធានគណៈគ្រប់គ្រងនាយកសាខាបានមានប្រសាសន៍ ការប្រឡងនេះ ធ្វើឡើងក្នុងគោលបំណងឲ្យសិស្សានុសិស្សទាំងអស់ នៃសាលា ប៊ែលធី អន្តរជាតិ បានយល់ដឹងកាន់តែច្បាស់អំពីអត្ថន័យទិវាបុណ្យនៃក្ដីស្រឡាញ់ នៅថ្ងៃទី១៤ កុម្ភៈ។ ដោយកន្លងមកមានការយល់ច្រឡំថា ទិវានេះជាទិវាបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍ ដែលហេតុធ្វើឲ្យភ្លេចការសិក្សា បាត់បង់សេចក្ដីថ្លៃថ្នូររបស់ខ្លួន និងក្រុមគ្រួសារ ប្រាសចាកវប្បធម៌ និងប្រពៃណីជាតិដ៏ផូរផង់របស់ខ្មែរយើង។ ម្យ៉ាងវិញទៀតទិវានេះពុំមែនជាពិធីបុណ្យប្រពៃណីរបស់ជនជាតិខ្មែរយើងទេ ទើបសាលា ប៊ែលធី អន្តរជាតិ រៀបចំកម្មវិធីប្រឡងនេះឡើង ដើម្បីទប់ស្កាត់សកម្មភាពមិនប្រក្រតីក្នុងទិវាបុណ្យនៃក្ដីស្រឡាញ់នេះ និងឲ្យសិស្សានុសិស្សយល់ពីអត្ថន័យពិតនៃទិវានេះ។

សូមបញ្ជាក់ថា សាលា ប៊ែលធី អន្តរជាតិ ទទួលចុះឈ្មោះចាប់ពីថ្ងៃនេះតទៅ នៅគ្រប់ទីតាំងប៊ែលធី ទាំង ១៩សាខា ថ្នាក់ចំណេះទូទៅ ឆមាសទី២ និង ថ្នាក់ភាសាអង់គ្លេស វគ្គថ្មីចូលរៀនថ្ងៃទី ០៤ មីនា ២០១៩ បង់ថ្លៃសិក្សា ១វគ្គ ផ្តល់ជូន សៀវភៅគូល័រច្បាប់ដើម ១ឈុត ផងដែរ៕