ភ្នំពេញ ៖ ក្នុងនាមរាជរដ្ឋាភិបាលសម្តេចតេជោ ហ៊ុន សែន បានសម្តែងនូវការកោតសរសើរនិងវាយតម្លៃខ្ពស់ ចំពោះការខិតខំប្រឹងប្រែងយ៉ាងសកម្មរបស់ថ្នាក់ដឹកនាំក្រសួងមហាផ្ទៃ មន្ត្រីរាជការស៊ីវិល កងកម្លាំងនគរបាលជាតិ និងរដ្ឋបាលគ្រប់ថ្នាក់នៅថ្នាក់ក្រោមជាតិដែលបានខិតខំបំពេញភារកិច្ចប្រកបដោយការទទួលខុសត្រូវធ្វើឲ្យក្រសួងមហាផ្ទៃសម្រេចបានបេសកកម្មសំខាន់ៗរបស់ខ្លួននិងសមិទ្ធផលការងារជាច្រើនដែលបានរួមចំណែកធ្វើឲ្យរាជរដ្ឋាភិបាលនីតិកាលទី៥នៃរដ្ឋសភាអនុវត្តដោយជោគជ័យនូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី ៣ ព្រមទាំងកម្មវិធីកែទម្រង់នានាដែលបានកំណត់។
ជាការពិតរយៈពេលពេញមួយឆ្នាំ ២០១៨ ដែលទើបតែកន្លងផុតទៅថ្មីៗកម្ពុជាបានពុះពារជំនះប្រកបដោយជោគជ័យគ្រប់ឧបសគ្គតូចធំ និងឧបាយកលដ៏គ្រោះថ្នាក់របសក្រុមជ្រុលនិយមមួយក្តាប់តូច ដែលទទួលបានការគាំទ្រនិងការលើកទឹកចិត្តពីមជ្ឈដ្ឋានមួយចំនួននៅក្រៅប្រទេសដែលប៉ុនប៉ងបំផ្លាញសន្តិភាព ស្ថិរភាពនយោបាយ និងការបោះឆ្នោតដោយសេរីនៅកម្ពុជាក្នុងគោលបំណងបន្ទច់បង្អាក់ដំណើរការអភិវឌ្ឍនិងភាពរស់នៅដោយសុខសាន្តរបស់ប្រជាជនកម្ពុជា។ ប៉ុន្តែពេលនោះរាជរដ្ឋាភិបាលកម្ពុជាបានខិតខំរួមគ្នាធ្វើឲ្យមានស្ថិរភាពនយោបាយ និងសន្តិសុខដ៏ល្អប្រសើរ សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី ៤ និងការបោះឆ្នោតជ្រើសតាំងតំណាងរាស្ត្រនីតិកាលទី ៦ តាមអាណត្តិដែលបានកំណត់ក្នុងរដ្ឋធម្មនុញ្ញនិងច្បាប់បោះឆ្នោតដោយសេរី ត្រឹមត្រូវ យុត្តិធម៌ មានតម្លាភាព និងមានសុវត្ថិភាព ជាពិសេសប្រជាពលរដ្ឋចំនួន ៨៣,០២% នៃអ្នកដែលមានឈ្មោះក្នុងបញ្ជីបោះឆ្នោតបានចេញទៅបោះឆ្នោតដោយសេរីនិងមានទឹកមុខសប្បាយរីករាយក្នុងឋានៈជាម្ចាស់ឆ្នោតដើម្បីអនាគតប្រទេសជាតិ និងបន្តថែរក្សាសុខសន្តិភាពឲ្យបានគង់វង្សដែលកត្តានេះធ្វើឲ្យឧបាយកលក្រុមជ្រុលនិយម និងមជ្ឈដ្ឋានអគតិមួយចំនួនដែលប៉ុនប៉ងបំផ្លាញដំណើរការលទ្ធិប្រជាធិបតេយ្យ និងការបោះឆ្នោតនៅកម្ពុជាត្រូវទទួលបរាជ័យទាំងស្រុង។
ប្រមុខរាជរដ្ឋាភិបាលកម្ពុជាបានមានប្រសាសន៍ថា យុទ្ធសាស្ត្រចតុកោណដំណាក់កាលទី ៤ គឺជាត្រីវិស័យសម្រាប់តម្រង់ទិសសកម្មភាពការងាររបស់រាជរដ្ឋាភិបាលក្នុងការបំពេញភារកិច្ចបម្រើជាតិ និងប្រជាជនក្នុងនីតិកាលទី ៦ នេះ។ យុទ្ធសាស្ត្រនេះរក្សាទុកនូវរចនាសម្ព័ន្ធដដែល ប៉ុន្តែពង្រឹង និងពង្រីកនូវវិសាលភាព ហើយសម្រិតសម្រាំងបន្ថែមទៀតនូវយន្តការអនុវត្តដើម្បីធ្វើឤទិភាវូបនីយកម្មមុំនីមួយៗនៃយុទ្ធសាស្ត្រតុកោណឲ្យកាន់តែប្រសើរឡើង។ ទន្ទឹមនេះ រាជរដ្ឋាភិបាលបានដាក់ចេញនូវវិធានការកែទម្រង់ថ្មីៗទៀតក្រោមបាវចនា «កែទម្រង់ខាងក្នុងកសាងមិត្តខាងក្រៅ ដោយឈរលើមូលដ្ឋានឯករាជ្យ» ដើម្បីលើកកម្ពស់ការប្រកួតប្រជែងរបស់កម្ពុជាសំដៅកសាងមូលដ្ឋានគ្រឹះចាំបាច់ដើម្បីប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០និងជាប្រទេសដែលមានចំណូលខ្ពស់នៅឆ្នាំ ២០៥០។
ក្នុងពិធីបិទសន្និបាតបូកសរុបការងារឆ្នាំចាស់និងលើកទិសដៅការងារឆ្នាំថ្មីរបស់ក្រសួងមហាផ្ទៃនៅថ្ងៃទី១៤ ខែកុម្ភៈ ឆ្នាំ២០១៩ សម្តេចតេជោ ហ៊ុន សែន បានផ្តល់នូវគោលការណ៍ណែនាំលើកិច្ចការសំខាន់ៗជាអាទិភាពដែលក្រសួងមហាផ្ទៃនិងរដ្ឋបាលគ្រប់ថ្នាក់នៅថ្នាក់ក្រោមជាតិ ត្រូវយកចិត្តទុកដាក់ខិតខំសម្រេចឲ្យបានដូចខាងក្រោម៖
ទីមួយ-ត្រូវបន្តថែរក្សាសុខសន្តិភាព ស្ថិរភាពនយោបាយ អធិបតេយ្យភាព បូរណភាពទឹកដី ប្រឆាំងដាច់ខាត នូវបដិវត្តន៍ពណ៌ និងរាល់សកម្មភាព ដែលប៉ុនប៉ងជ្រៀតជ្រែកចូលកិច្ចការផ្ទៃក្នុងរបស់ជាតិយើង។ ទន្ទឹមនេះ កងកម្លាំងនគរបាលជាតិ និងគណៈបញ្ជាការឯកភាពរដ្ឋបាលគ្រប់ថ្នាក់ ត្រូវសហការជាមួយ ក្រសួងស្ថាប័ន និងសមត្ថកិច្ចពាក់ព័ន្ធដទៃទៀត ការពារសន្តិសុខជាតិ ទប់ស្កាត់ និងបង្ក្រាបឲ្យទាន់ពេលវេលារាល់សកម្មភាព ចលាចល និងភាពវឹកវរក្នុងសង្គម។
ទីពីរ-អគ្គស្នងការដ្ឋាននគរបាលជាតិ និងគណៈបញ្ជាការឯកភាពគ្រប់ថ្នាក់ ត្រូវបន្តរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម តាមរយៈការពង្រឹងសមត្ថភាពជំនាញ វិន័យ និងក្រមសីលធម៌ វិជ្ជាជីវៈដល់កងកម្លាំងនគរបាលជាតិ ប្រកបដោយប្រសិទ្ធភាព តម្លាភាព និងគណនេយ្យភាព។ ទន្ទឹមនេះ ក្រសួងស្ថាប័ន ឤជ្ញាធរថ្នាក់ក្រោមជាតិ សង្គមស៊ីវិល វិស័យឯកជន ប្រជាពលរដ្ឋគ្រប់ស្រទាប់ជាន់ថ្នាក់ រួមគ្នាទប់ស្កាត់ បង្ក្រាបបទល្មើសគ្រឿងញៀនខុសច្បាប់ សកម្មភាពលួចឆក់ ប្លន់ និងបន្តពង្រឹងច្បាប់ស្តីពីចរាចរណ៍ផ្លូវគោក បង្ការទប់ស្កាត់អគ្គិភ័យ ដើម្បីអនុវត្តន៍គោលនយោបាយភូមិ ឃុំមានសុវត្ថិភាព និងការរស់នៅរបស់ប្រជាជនប្រកបដោយសុខសន្តិភាព និងសុវត្ថិភាព។
ទីបី-ត្រូវបន្តកិច្ចសហប្រតិបត្តិការជាមួយឤជ្ញាធរ កងកម្លាំងមានសមត្ថកិច្ច និងប្រទេសជិតខាង ក្នុងតំបន់ និងអន្តរជាតិ ដើម្បីរួមគ្នាទប់ស្កាត់ និងបង្ក្រាបឲ្យទាន់ពេលវេលា សកម្មភាពភេរវកម្ម ឧក្រិដ្ឋកម្មអន្តរជាតិ ឧក្រិដ្ឋកម្មព័ត៌មានវិទ្យា និងបទល្មើសឆ្លងកាត់ព្រំដែនគ្រប់ប្រភេទ ដើម្បីពង្រឹងសន្តិសុខ និងសណ្តាប់ធ្នាប់ក្នុងសង្គម។
ទីបួន-ត្រូវបន្តពង្រឹងការទទួលខុសត្រូវ ក្នុងការគ្រប់គ្រងជនបរទេសអន្តោប្រវេសន៍ តាមរយៈការយកចិត្តទុកដាក់ និងការលើកម្ពស់ការគ្រប់គ្រងការចេញចូលតាមច្រកទ្វារព្រំដែន ទាំងផ្លូវគោក ផ្លូវទឹក និងផ្លូវអាកាស។ ទន្ទឹមនេះ ត្រូវបង្កើនកិច្ចសហការក្នុងការគ្រប់គ្រងការស្នាក់នៅ ការប្រកបមុខរបរ និងសកម្មភាពជនបរទេស ជនបរទេសអន្តោប្រវេសន៍នៅក្នុងប្រទេស ស្របតាមច្បាប់អន្តោប្រវេសន៍ ច្បាប់ការងារ និងលិខិតបទដ្ឋាននានាជាធរមាន នៃព្រះរាជាណាចក្រកម្ពុជា។
ទីប្រាំ-អំពីការកែទម្រង់វិមជ្ឈការ និងវិសហមជ្ឈការ ត្រូវបន្តការយកចិត្តទុកដាក់ជំរុញការផ្ទេរមុខងារធនធានពីក្រសួងស្ថាប័ននានាទៅរដ្ឋបាលថ្នាក់ក្រោមជាតិតាមរយៈការប្រគល់ការធ្វើប្រតិភូកម្មអំណាច ការចាត់ចែងអនុវត្តមុខងារដែលបានផ្ទេរប្រកបដោយប្រសិទ្ធភាព តម្លាភាពនិងគណនេយ្យភាពដើម្បី ឆ្លើយតបសេចក្តីត្រូវការរបស់ប្រជាជនតាមមូលដ្ឋាននីមួយៗ។ ទន្ទឹមនេះនៅថ្ងៃទី ២៦ ខែ ឧសភា ខាងមុខ កម្ពុជានឹងរៀបចំបោះឆ្នោតជ្រើសរើសក្រុមប្រឹក្សារាជធានីខេត្ត ក្រុង ស្រុក ខណ្ឌ លើកទី ៣ ស្របតាមឤណត្ដិដែលបានកំណត់ក្នុងច្បាប់។ ខ្ញុំសូមឲ្យក្រសួងស្ថាប័ននានា រដ្ឋបាលថ្នាក់ក្រោមជាតិ និងអ្នកពាក់ព័ន្ធនានាចូលរួមក្នុងដំណើរការបោះឆ្នោតឲ្យបានពេញលេញ និងត្រឹមត្រូវ តាមច្បាប់កំណត់។
ទីប្រាំមួយ-ត្រូវធ្វើឲ្យមានប្រសិទ្ធភាព តម្លាភាព និងគណនេយ្យភាព ក្នុងការផ្តល់សេវាសាធារណៈ ដែលស្ថិតក្រោមដែនសមត្ថកិច្ចរបស់ក្រសួងមហាផ្ទៃ និងរដ្ឋបាលថ្នាក់ក្រោមជាតិ តាមរយៈការពង្រីកការផ្តល់សេវាតាមយន្តការឃុំ/សង្កាត់ ច្រកចេញចូលតែមួយនៅថ្នាក់ក្រោមជាតិ ឲ្យបានកាន់តែទូលំទូលាយ ថែមទៀត ដើម្បីបង្ខិតការផ្តល់សេវានានាឲ្យកៀកជិតប្រជាពលរដ្ឋ។
ទីប្រាំពីរ-ផ្អែកតាមការព្យាករណ៍ឆ្នាំនេះ ប្រទេសយើងនឹងឤចមានឤកាសធាតុក្តៅហួតហែង ហើយរដូវប្រាំងត្រូវអូសបន្លាយយូរជាងឆ្នាំមុនៗ ដូច្នេះ ខ្ញុំសូមឲ្យក្រសួងធនធានទឹក និងឧតុនិយមត្រូវសហការជាមួយរដ្ឋបាលរាជធានី-ខេត្ត ដើម្បីត្រួតពិនិត្យប្រភពទឹកតាមមូលដ្ឋាន ទាំងប្រភពទឹកសម្រាប់ប្រើប្រាស់ ក្នុងជីវភាពប្រចាំថ្ងៃ និងបង្កបង្កើនផលរដូវប្រាំង ដើម្បីមានវិធានការការពារ និងប្រើប្រាស់ប្រភពទឹកដែលនៅសេសសល់សម្រាប់ប្រើប្រាស់ក្នុងជីវភាពប្រចាំថ្ងៃរបស់ប្រជាជន។ ទន្ទឹមនេះ ក្រសួង-ស្ថាប័ននានា និងរដ្ឋបាលថ្នាក់ក្រោមជាតិគ្រប់លំដាប់ថ្នាក់ រួមទាំងកងកម្លាំងប្រដាប់ឤវុធ ត្រូវត្រៀមលក្ខណៈអន្តរាគមន៍ដើម្បីដឹកជញ្ជូនទឹកជូនប្រជាជននៅមូលដ្ឋាន ដោយមិនទុកឲ្យប្រជាជនរងគ្រោះដោយសារការខ្វះខាតទឹកប្រើប្រាស់ប្រចាំថ្ងៃនោះឡើយ។
ជាមួយនេះ ក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទត្រូវសហការជាមួយរដ្ឋបាលរាជធានី-ខេត្ត ណែនាំ អប់រំប្រជាជននៅតាមមូលដ្ឋានឲ្យថែរក្សាសុខភាព ការពារជំងឺឆ្លងរាតត្បាតតាមកសិដ្ឋាននានា និងត្រូវមានវិធានការជួយអន្តរាគមន៍ក្នុងការព្យាបាលជំងឺ ទាំងមនុស្ស និងសត្វឲ្យបានទាន់ពេលវេលា។
ទីប្រាំបី-យើងត្រូវរួមគ្នាធ្វើការ ដើម្បីពង្រីកការលូតលាស់ខាងសេដ្ឋកិច្ច ដើម្បីបន្តពង្រឹងឯករាជ្យភាពខាងនយោបាយរបស់យើង។ យើងមិនត្រូវយកអធិបតេយ្យភាពរបស់យើងទៅដោះដូរជាមួយជំនួយណាមួយនោះឡើយ។ យើងត្រូវប្រែក្លាយការប្រឈមឲ្យទៅជាឱកាស នៃការខិតខំឈានឡើង នៃសេដ្ឋកិច្ចរបស់យើង។ ការព្យួរ EBA ដែលនឹងដឹងបានរយៈពេល ១៨ ខែទៀត បើទោះជាបាត់ ឬនៅមានបន្តក៏មិនអាចធ្វើឲ្យយើងស្លាប់ ឬក្លាយជាអ្នកមានបានដែរ។ EBA មុន និងក្រោយ គង់តែបាត់ដូចគ្នា គ្រាន់តែយូរ និងឆាប់តែប៉ុណ្ណោះ ដូចនេះ ការរកស៊ីបង់ពន្ធឲ្យគេ និងបង់ពន្ធឲ្យយើង គឺជារឿងជៀសមិនរួច ហើយថ្លៃថ្នូរ និងស្ថិរភាពទៀតផង ដែលយើងត្រូវរកគ្រប់វិធីដើម្បីឲ្យសេដ្ឋកិច្ចយើងកាន់តែមានភាពប្រកួតប្រជែងកាន់តែខ្លាំង។ ជនរួមជាតិ ជាពិសេស កម្មករ កម្មការិនី បើនៅតែមានមុខរបរ មានការងារធ្វើ មានប្រាក់ចំណូល សុំកុំខ្វល់ អ្នកណានិយាយពីអ្វី? មន្ត្រីរាជការ កងកម្លាំងប្រដាប់អាវុធ និងនិវត្តជន បើនៅតែទទួលបានបៀវត្ស២សប្តាហ៍ម្តងសុំកុំខ្វល់អ្នកណានិយាយពីអ្វី? គឺត្រូវបន្តតាមពាក្យឆ្កែចេះតែព្រុស មនុស្សចេះតែដើរ។ យើងក៏ចង់មើលឃើញអ្នកដែលកំពុងសប្បាយ ដែលបានឃើញបរទេសធ្វើបាបយើង ហើយដែលកំពុងរង់ចាំនូវការស្លាប់នៃរដ្ឋាភិបាលយើងគេនឹងធ្វើមុខបែបណានៅពេលដែលយើងមិនស្លាប់តាមបំណងរបស់គេ។ បើយើងមិនប្រឹងខ្លួនយើងនោះទេទោះបីមានគេជួយច្រើនយ៉ាងណាក៏នៅតែក្រហើយទទួលនូវការប្រមាថដដែល។ យើងខិតខំដើម្បីជាតិយើង មិនមែនតម្រូវតាមការចង់បានរបស់បរទេសណាមួយនោះ តែយើងក៏ត្រូវការនូវកិច្ចសហប្រតិបត្តិការក្នុងភាពជាដៃគូស្មើភាព និងស្មើសិទ្ធិជាមួយប្រទេសទាំងអស់ដោយគ្មានការរើសអើង៕
Source: Kampuchea Thmey Daily
0 Comments