ភ្នំពេញ ៖ អគ្គនាយកស៊ីម៉ាក់បានឲ្យដឹងថា នៅឆ្នាំ២០១៨មានជនរងគ្រោះដោយសារគ្រាប់មីននិងយុទ្ធភណ្ឌមិនទាន់ផ្ទុះចំនួន៥៨នាក់ដែលចំនួននេះមានចំនួនប្រហាក់ប្រហែលទៅនឹងឆ្នាំ២០១៧កន្លងទៅដែរ។ប៉ុន្តែគ្រោះថ្នាក់ដោយសារមីន មានការកើនឡើងលើសពីឆ្នាំចាស់ចំនួន៦ករណី។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់)បានបង្ហាញរបាយការណ៍និងសមិទ្ធផលធំៗមួយចំនួន ដែលស៊ីម៉ាក់សម្រេចបានខណៈដែលទិវាជាតិយល់ដឹងពីមីននឹងប្រារព្ធធ្វើថ្ងៃទី២៤ ខែកុម្ភៈ ឆ្នាំ២០១៩ នេះ។
លោកអគ្គនាយកបានបន្តថាឆ្នាំ២០១៨ ស៊ីម៉ាក់រកឃើញ និងកំទេចគ្រាប់មីន និងយុទ្ធភណ្ឌមិនទាន់ផ្ទុះចំនួន៤៥,៤៩៣គ្រាប់ បោះស្លាកសញ្ញាព្រំចំការមីន បានប្រវែង៣៤៦,៧៥៧ម៉ែត្រ ឆ្លើយតបតាមសំណើ (EOD Calls) ៣,៦៨១សំណើនិងបោសសំអាតផ្ទៃដីបានទំហំ ៨៨,៦៦៦,៥៤៦ម៉ែត្រការ៉េ។
លោក ហេង រតនា បានឲ្យដឹងទៀតថា អង្គភាពស៊ីម៉ាក់ ក្នុងនាមជាសេនាធិការរបស់រាជរដ្ឋាភិបាល លើសកម្មភាពកំចាត់មីន បានចូលរួមយ៉ាងសកម្មក្នុងផ្សព្វផ្សាយការអប់រំយល់ដឹងពីមីន ដល់ប្រជាពលរដ្ឋ ដែលរស់នៅតំបន់រងគ្រោះ ដោយសារមីន និងគ្រាប់យុទ្ធភណ្ឌមិនទាន់ផ្ទុះ តាមរយៈការពង្រឹងពង្រីកសមត្ថភាពថ្នាក់ក្រោមជាតិ ថ្នាក់មូលដ្ឋាន និងការងារផ្ទាល់ ជាមួយអង្គការមហាជន។
ជាក់ស្ដែងក្នុងឆ្នាំ២០១៨ ស៊ីម៉ាក់បានធ្វើការអប់រំដល់ប្រជាពលរដ្ឋបានចំនួន៦៦១,៩២៤នាក់ ក្នុងនោះបុរសចំនួន២២៦,៦៤២នាក់, ស្ត្រីចំនួន២៤០,២៧៦នាក់, កុមារចំនួន១៩៤,៨០៦នាក់ និងខ្នងផ្ទះចំនួន១០៨,៦១២ផ្ទះ។អប់រំប្រជាពលរដ្ឋ ដែលប្រើប្រាស់គ្រឿងចក្រធុនធ្ងន់ បានចំនួន៥,២២៤នាក់, អ្នកពង្រីកដីកសិកម្ម ក្នុងតំបន់មីនចំនួន៣,១០០នាក់, អ្នកក្រីក្រប្រឈមនឹងគ្រោះថ្នាក់មីនចំនួន៤,១៣០នាក់, អប់រំជនអ្នកប្រព្រឹត្តិផ្ទាល់ចំនួន ២១១នាក់។
មិនតែប៉ុណ្ណោះបានធ្វើការអប់រំនិងបណ្តុះបណ្តាលវគ្គរំលឹកដល់បណ្តាញមីន/គ្រាប់ចំនួន១៥០នាក់ និងបានបើកយុទ្ធនាការអប់រំប្រជាពលរដ្ឋនៅតំបន់ងាយរងគ្រោះ បានចំនួន៦៤,៣៨០នាក់ ស្ត្រីចំនួន២៥,៥៥៦នាក់ និងកុមារចំនួន ១២,៤២៩នាក់។
ចំពោះការងារអភិវឌ្ឍជួយជនរងគ្រោះដោយសារមីនវិញក្នុងឆ្នាំ២០១៨កន្លងមក គម្រោងអភិវឌ្ឍន៍ជំនួយពីរដ្ឋាភិបាលជប៉ុន បាននឹងកំពុងកសាងផ្លូវលំជនបទ ចំនួន៤ខ្សែ សរុបប្រវែង១៥,១៧០ម៉ែត្រ និងស្ពានបេតុង១កន្លែង ប្រវែង១១ម៉ែត្រ។ជួយសាងសង់អគារសាលាបឋមសិក្សា១ខ្នង និងស្រះទឹកចំនួន៣កន្លែង សង់សំណង់បង្ហៀរទឹកចំនួន៣ លូប្រអប់ចំនួន៤ លូទោលចំនួន៥ និងលូភ្លោះចំនួន៤។
ជាមួយគ្នានេះដែរ ជួយបណ្តុះបណ្តាលជំនាញកសិកម្ម ដល់ប្រជាពលរដ្ឋមានស្តីពីរបៀបដាំដំណាំស្រូវ ដំណាំកាហ្វេ ការចិញ្ចឹមមាន់ការបណ្តុះផ្សិត និងការធ្វើសួនបន្លែ តាមផ្ទះ-ល-បានចំនួន១០វគ្គ ស្មើនឹងចំនួន៦៣០គ្រួសារ។
លោកហេង រតនាបានមានប្រសាសន៍ថា តាមគម្រោងនៅឆ្នាំ២០១៩ខាងមុខនេះស៊ីម៉ាក់មានផែនការគ្រោងរំដោះផ្ទៃដីមានបញ្ហាគ្រាប់មីន និងសំណល់ជាតិផ្ទុះពីសង្គ្រាមឲ្យបានចំនួន១១៦គីឡូម៉ែត្រក្រឡាជាមួយសកម្មភាពអប់រំ ការស្រាវជ្រាវតំបន់គំរាមកំហែង និងការជួយសង្គ្រោះជនពិការដោយសារមីន ដែលនឹងពង្រាយកម្លាំងប្រតិបត្តិការប្រមាណ១៧ ០០នាក់ សុនខ ៦៨ក្បាល គ្រឿងចក្រកំទេចមីនចំនួន៤៥គ្រឿង និងកំលាំងអន្តរាគមន៍ បណ្តាញស្ម័គ្រចិត្តជាង២,៥០០នាក់។
លោកអគ្គនាយកបានបន្តថា ផែនការគ្រោងរំដោះផ្ទៃដីមានបញ្ហាគ្រាប់មីន និងសំណល់ជាតិផ្ទុះពីសង្គ្រាមឲ្យបានចំនួន១១៦គីឡូម៉ែត្រក្រឡាអង្គភាពស៊ីម៉ាក់ត្រូវអនុវត្តគម្រោងនានាចំនួន២៩គម្រោង គិតជាថវិកាមានចំនួនជាង១៦លានដុល្លារអាមេរិក។
ជាមួយគ្នានេះដែរ មជ្ឈមណ្ឌលសកម្មភាពកម្ចាត់មីនកម្ពុជានឹងឈានទៅប្រើសត្វកណ្ដុរសម្រាប់ហិតរាវរកគ្រាប់មីននិងគ្រាប់មិនទាន់ផ្ទុះដែលកប់ក្នុងដីផងដែរ បន្ទាប់ពីបានសាកល្បងធ្វើតេស្តនិងហ្វឹកហ្វឺននៅចំការមីនទទួលបានជោគជ័យរួចមក។
យោងតាមផែនការយុទ្ធសាស្ត្រជាតិសកម្មភាពមីន ឆ្នាំ២០១៨-២០២៥បានឲ្យដឹងថា នៅកម្ពុជាមានផ្ទៃដីសង្ស័យមានផលប៉ះពាល់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង ១៩៧០គីឡូម៉ែត្រការ៉េ ក្នុងនោះប្រមាណ ៨៧៧គីឡូម៉ែត្រការ៉េ ជាដីមានផលប៉ះពាល់ខ្ពស់ដោយសារមីន ៤៩៩គីឡូម៉ែតការ៉េ ជាដីប៉ះពាល់ដោយគ្រាប់បែកចង្កោម និង ៣៣៣គីឡូម៉ែត្រការ៉េ ជាដីមានផលប៉ះពាល់ដោយសារសំណល់ជាតិផ្ទុះពីសង្គ្រាម។
ផ្ទៃដីមានគ្រាប់មីននិងយុទ្ធភណ្ឌមិនទាន់ផ្ទុះជិត២ពាន់គីឡូម៉ែត្រការ៉េនេះកម្ពុជាត្រូវការថវិកាប្រមាណ ៤០៦លានដុល្លារ សម្រាប់បោសំអាតរយៈពេលពីឆ្នាំ ២០១៨ ដល់ឆ្នាំ២០២៥ខាងមុខ៕
Source: Kampuchea Thmey Daily
0 Comments