ក្លិប​ភ្នំពេញ​ក្រោ​ន បន្ថែម​កម្លាំង​ថ្មី​២​នាក់​ជា​កូន​ខ្មែរ​-​បារាំង ត្រៀម​រដូវ​កាល​ថ្មី​ខាងមុខ

ក្លិប​បាល់ទាត់​ភ្នំពេញ​ក្រោ​ន សមាជិក​ពានរង្វាន់​លី​គ​កំពូល​កម្ពុជា បានប្រកាស​នៅ​ព្រឹក​ថ្ងៃ​សៅរ៍ ទី​២៣ ខែកុម្ភៈ ឆ្នាំ​២០១៩ នេះ​ក្លិប​បានសម្រេច​បន្ថែម​កីឡាករ​ចំណូល​ថ្មី​ពីររូប​ក្នុង​បញ្ជី​ដើម្បី​ត្រៀម​ប្រកួត​ក្នុង​រដូវ​កាល​ថ្មី​ខាងមុខ ដែល​អ្នក​ទាំង​២​ជា​កូន​ខ្មែរ​-​បារាំង​គឺ​កីឡាករ Thomas Sam Sochenn និង​កីឡាករ Pich Owen​។

​យោង​តាម​សេចក្តី​ប្រកាស​នៅលើ​វិ​ប​សាយ​ផ្លូវការ​របស់​ក្លិប​បាន​បញ្ជាក់​ថា ​កីឡាករ Thomas Sam Sochenn មាន​វ័យ​២៥​ឆ្នាំ លេង​ក្នុង​តំណែង​ខ្សែបម្រើ​កណ្តាល​។ មុន​មក​កម្ពុជា រូបគេ​បានចាប់ផ្តើម​លេង​បាល់ទាត់​នៅ​ប្រទេស​បារាំង ជាមួយ​ក្រុម Olympique Marseille រយៈពេល​៣​ឆ្នាំ គឺ​ចាប់ពី​ឆ្នាំ​២០១០ ដល់​២០១៤ ហើយ​បាន​បន្ត​លេង​នៅ​ក្លិប Marignane Gignac F.C ដែលជា​សមាជិក លី​គ​ទី​បី​ប្រទេស​បារាំង​រយៈពេល​២​ឆ្នាំ គឺ​ចាប់ពី​ឆ្នាំ​២០១៦ ដល់​២០១៨​។



​ចំណែក​កីឡាករ Pich Owen វិញ​រូបគេ​ទើបតែ​មាន​វ័យ​ទើបតែ​២០​ឆ្នាំ​ប៉ុណ្ណោះ ហើយក៏​លេង​ក្នុង​តំបន់​កណ្តាល​ដូចគ្នា​។ រូបគេ​បាន​ចាប់ផ្តើម​លេង​បាល់​ក្នុង​ក្រុម​ថ្នាល​របស់​ក្រុម AS Muret នៅ​ឆ្នាំ​២០០៩-២០១៥ ហើយ​បាន​បន្ត​ទៅលេង​នៅ​ក្លឹប AS Tournefeuille ពី​ឆ្នាំ​២០១៥-២០១៧ និង​នៅ​ឆ្នាំ​២០១៨ រូបគេ​បាន​ចូលរួម​លេង​ជាមួយ​ក្លឹប AS Lavernose មុន​ធ្វើដំណើរ​មកកាន់​រាជធានី​ភ្នំពេញ​។

ក្លិប​បាល់ទាត់​ភ្នំពេញ​ក្រោ​ន បាន​ជូនពរ​ដល់​អ្នក​ទាំងពី​រ​ឲ្យ​ទទួលបាន​ជោគជ័យ​ក្នុងការ​ចូលរួម​ជាមួយ​ក្លិប ហើយ ក្លិប​ក៏មាន​សង្ឃឹម​ជឿជាក់ថា​រូបគេ​ទាំងពីរ​នឹង​ជា​កម្លាំង​សំខាន់​ក្នុងការ​ចូលរួម​ជាមួយ​មិត្ត​រួម​ក្រុម​សម្រាប់​រដូវ​កាល​២០១៩​នេះ​ខាងមុខនេះ​ទាំង​ក្នុង​ពានរង្វាន់​លី​គ​កំពូល​កម្ពុជា និង​ពានរង្វាន់​សម្តេច​តេ​ជោ ហ៊ុន សែន​។

​នេះ​ជាការ​បន្ថែម​សមាជិក​ថ្មី​របស់​ក្លិប​ភ្នំពេញ​ក្រោ​ន ដើម្បី​ពង្រឹង​បច្ចេកទេស​ក្រុម​មុន​រដូវ​កាល​ឆ្នាំ​២០១៩​មកដល់ ខណៈ​កាលពី​រដូវ​កាល​ឆ្នាំ​២០១៨ កន្លង​ទៅក្នុង​ពានរង្វាន់​លី​គ​កំពូល​កម្ពុជា ក្រុម​ភ្នំពេញ​ក្រោ​ន រក្សា​ចំណាត់ថ្នាក់​លេខ​៥ ក្នុងចំណោម​សមាជិក​ទាំង​១២ ក្រោយ​ប្រកួត​បាន​២២​លើក ឈ្នះ​បាន​១១​លើក ស្មើគ្នា​៣​លើក​និង​ចាញ់​៨​លើក​មាន​៣៦​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើ​ល រហូតដល់​២០​ពិន្ទុ​។ ភ្នំពេញ​ក្រោ​ន​ទា​ត់ប​ញ្ជូ​ល​ទី​គូប្រកួត​បាន​៤១​គ្រាប់ ហើយ​គេ​ទាត់​ចូល​វិញ​ចំនួន​៣៣​គ្រាប់​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup)​វិញ​ក្រុម​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយ​បាល់​ប៉េ​ណាំង​ទី​កាត់សេចក្តី​៤​ទល់​៣ ក្រោយ​ប្រកួត​ស្មើគ្នា​ទាំង​២​ជើង​៤​ទល់​៤៕

Source: Kampuchea Thmey Daily