កំពង់ឆ្នាំង ៖ មនុស្ស៣នាក់ បានរងរបួសធ្ងន់ និងស្រាល ខណៈពួកគេជិះម៉ូតូម្នាក់១គ្រឿងៗ បានបុកបន្តកន្ទុយគ្នា ដោយសារគេចពីសមត្ថកិច្ចនគរបាលចរាចរណ៍ក្រុង ដាក់ប៉ុស្តិ៍ត្រួតពិនិត្យអ្នកជិះម៉ូតូអត់ពាក់មួកសុវត្ថិភាព។
ហេតុការណ៍នេះ បានកើតឡើងនៅវេលាម៉ោង១០និង០០នាទី ព្រឹកថ្ងៃទី២៨ ខែ កុម្ភៈ ឆ្នាំ២០១៩ ចំណុចសួនច្បារវិមានឯករាជ្យ សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចបានឲ្យដឹងថា អ្នកបើកម៉ូតូ ដែលមានគ្រោះថ្នាក់ខាងលើនេះ មិនបានប្រាប់ឈ្មោះឡើយ អំឡុងពួកគាត់កំពុងបើកបរម៉ូតូ ឃើញសមត្ថកិច្ចនគរបាលចរាចរណ៍ ដាក់ប៉ុស្តិ៍ចាប់អ្នកបើកម៉ូតូអត់ពាក់មួកសុវត្ថិភាព នៅចំណុចសួនច្បារវិមានឯករាជ្យ ដោយពួកគាត់មិនពាក់មួកសុវត្ថិភាព ក៏បានបើកគេចពីសមត្ថកិច្ច ស្រាប់តែត្រូវម៉ូតូ១គ្រឿង បានមកបុកពីក្រោយម៉ូតូគាត់ និងមានម៉ូតូ១គ្រឿងទៀតមកបុកពីក្រោយម៉ូតូដែលបុកគាត់ គឺបុកបន្តកន្ទុយគ្នាទាំង៣គ្រឿងតែម្តង បង្កឲ្យមានគ្រោះថ្នាក់ដល់ក្មេងម្នាក់ និងស្ត្រីម្នាក់។ ក្រោយកើតហេតុ អ្នករបួសត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត។
ទាក់ទងនឹងគ្រោះថ្នាក់ខាងលើនេះ ម្ចាស់ម៉ូតូទាំង៣គ្រឿង កំពុងធ្វើសម្របសម្រួលគ្នា ដើម្បីបញ្ចប់រឿង ដែលគ្រោះថ្នាក់នេះ មកពីខ្លាចសមត្ថកិច្ចចាប់ផាកពិន័យ ទើបគេចពីសមត្ថកិច្ចទៅបុកគ្នាទាំង៣គ្រឿងតែម្តង ថ្ងៃក្រោយ សូមទុកជាមេរៀនទៅចុះ ចំពោះអ្នកបើកម៉ូតូផ្សេងៗទៀត៕
Source: Kampuchea Thmey Daily
0 Comments