ភ្នំពេញ ៖ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានមានប្រសាសន៍លើកឡើងថា តួនាទីរបស់អ្នកដឹកនាំគេសំខាន់បំផុតត្រូវបើកចិត្តឲ្យទូលាយ ហើយត្រូវចេះប្រមូលផ្តុំឲ្យសមាជិកខ្លួននៅជុំគ្នា ចេះស្រឡាញ់គ្នា ចេះធ្វើការជាមួយគ្នា។
នៅក្នុងឱកាសបិទសិក្ខាសាលាពង្រឹងសមត្ថភាពថ្នាក់ដឹកនាំស្ត្រីក្រសួងព័ត៌មាន កាលពីល្ងាចថ្ងៃទី១៤ ខែកុម្ភៈនេះ នៅទីស្តីការក្រសួង លោក ខៀវ កាញារីទ្ធបានបញ្ជាក់ថា ប្រធានមិនត្រូវមានការបែងចែកទេ ប្រធានល្អគឺប្រធានចេះរុញកូនចៅទាំងអស់ឲ្យចេះធ្វើការជាមួយគ្នា ប្រកបដោយសុខដុមរមនា។ លោករដ្ឋមន្ត្រីបានលើកឡើងថា ទោះយើងពូកែមានចំណេះដឹងខ្ពស់ តែអត់ចេះធ្វើការក៏មិនអាចទៅរួចដែរ សំខាន់ត្រូវចេះធ្វើការ ចេះដោះស្រាយទំនាស់ ចេះសម្រួលបរិយាកាសសុទ្ធតែជាការចាំបាច់។ លោករដ្ឋមន្ត្រីបានបញ្ជាក់ថា បច្ចុប្បន្នពិតមែនតែនារីមិនមានកាន់តួនាទីច្រើនដូចបុរស ប៉ុន្តែការលើកទឹកចិត្តរបស់រាជរដ្ឋាភិបាលចាត់ទុកនារីជាឆ្អឹងខ្នង ព្រោះស្ត្រីពូកែជាងបុរស។ សិក្ខាសាលាថ្ងៃនេះសំខាន់ណាស់ ជាការជួបជុំដើម្បីទំនាក់ទំនងគ្នា ដើម្បីផ្លាស់ប្តូរបទពិសោធន៍គ្នាទៅវិញទៅមក ដែលធ្វើឱ្យយើងបង្កើនចំណេះដឹងទូទៅ ចំណេះដឹងជំនាញឱ្យកាន់តែរីកចម្រើនបន្តទៀត។ លោករដ្ឋមន្ត្រីសង្ឃឹមថា សិក្ខាសាលារបៀបនេះនឹងមានជាបន្តបន្ទាប់ទៀត។
តាមការលើកឡើងរបស់លោករដ្ឋមន្ត្រីបានឲ្យដឹងថា នៅក្នុងសង្គមកម្ពុជាយើង បើគិតពីសហគ្រាសមធ្យម និងតូច គឺមានប្រមាណ ៦០% នៃអ្នកដឹកនាំ គឺជានារី៕
Source: Kampuchea Thmey Daily
0 Comments