ក្លិប​បាល់ទាត់​ខេត្តកំពង់ចាម សមាជិក​ពានរង្វាន់​លី​គ​កំពូល​កម្ពុជា ចុះបញ្ជី​កីឡាករ​បរទេស​បាន​៤​នាក់​ហើយ

ក្លិប​បាល់ទាត់​ខេត្តកំពង់ចាម សមាជិក​ថ្មី​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) រដូវ​កាល​ឆ្នាំ​២០១៩ មួយ​ក្នុងចំណោម​១៤ ផ្សេងគ្នា បានសម្រេច​ចុះកិច្ចសន្យា​ជាមួយ​កីឡាករ​បរទេស​ចំនួន​៤​នាក់​រួចរាល់​ហើយ​មុន​រដូវ​កាល​ថ្មី​ខាងមុខ​ដែល​នឹង​ចាប់ផ្តើម​ពី​ពាក់កណ្ដាល​ខែមីនា តទៅ​។

​ប្រភព​មកពី​ក្លិប​បាល់ទាត់​ខេត្តកំពង់ចាម បាន​បញ្ជាក់ថា​ កីឡាករ​ទាំង​៤​នាក់​នេះ​បាន​ស្ម័គ្រចិត្ត​ចូលរួម​ជាមួយ​ក្លិប ក្រោយ​បាន​ចុះ​កិច្ចសហការ​ជាមួយ​ដៃគូ Eselemo Diamond african all stars in Cambodia​។ កីឡាករ​ទាំង​៤​រូប​ ត្រូវ​បាន​បង្ហោះ​នៅលើ​ទំព័រ​ហ្វេ​ស​ប៊ុ​ក​ផ្លូវការ​ឃើញថា​ មាន​កីឡាករ​សញ្ជាតិ​ហ្គា​ណា Osei Tutu ដែល​ធ្លាប់​ជា​អតីត​កីឡាករ​របស់ ក្លឹប​មជ្ឈមណ្ឌល​កំចាត់​មីន​កម្ពុជា និង​អគ្គស្នងការដ្ឋាន​នគរ​បាល​ជាតិ​, កីឡាករ Tcheugoue Edongue សញ្ជាតិ​កា​មេ​រ៉ូ​ន​, កីឡាករ Onar Ibrahim Abdelkhalek Sayed Ahmed វ័យ​២២​ឆ្នាំ និង​កីឡាករ Adnam Abdelrahin Fawzy Elebiary វ័យ​២៦​ឆ្នាំ ទាំងពីរ​រូប​ជា​កីឡាករ​សញ្ជាតិ​អេ​ហ្ស៊ី​ប​។



យោង​តាម​ការ​កំណត់​របស់​សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បាន​បញ្ជាក់​ថា ​ក្លិប​ជា​សមាជិក​របស់​លី​គ​ខ្លួន​មាន​សិទ្ធិ​ចុះបញ្ជី​កីឡាករ​បរទេស​ចំនួន​៥​នាក់ ប៉ុន្តែ​ដាច់ខាត​ក្នុង​នោះ​ត្រូវ​តែ​មាន​កីឡាករ​ជា​ជនជាតិ​សមាជិក​ទ្វីបអាស៊ី ១​រូប​។ យ៉ាងណា​ក្តី​ក្លិប​កំពុង​ធ្វើតេស្ត​កីឡាករ​បរទេស​១​រូប​ទៀត ប៉ុន្តែ​ក៏​កំពុងតែ​ចាំ​ការចចារ​គ្នា​លើ​ចំណុច​មួយចំនួនទៀត​ដែរ​។

តាម​គម្រោង​ពានរង្វាន់​បាល់ទាត់​លី​គ​កំពូល​កម្ពុជា​រដូវ​កាល​ថ្មី​ឆ្នាំ ២០១៩ នេះ​នឹង​ចាប់ផ្ដើម​ពីថ្ងៃ​ទី​១៦ ខែមីនា ដល់​ថ្ងៃទី​១៧ ខែតុលា ឆ្នាំ​២០១៩​។​ ចំណែក​ក្រុម​ដែល​ចូល​រួម​ទាំង​១៤​វិញ​នោះ​មាន​ណាហ្គា​វើ​ល​,​បឹងកេត​,​វិសាខា​,​ក្រសួងការពារជាតិ​,​ភ្នំពេញ​ក្រោ​ន​,​អាស៊ី​អឺរ៉ុប​,​អគ្គស្នងការដ្ឋាន​នគរបាល​ជាតិ​,​អង្គ​រថា​យ​ហ្គឺ​រ​ព្រះខ័ន​រាជ​ស្វាយរៀង​,​សូល​ទី​ឡូ​អង្គរ​,​អគ្គីសនី​កម្ពុជា​។ ចំណែក​ក្រុម​លេចមុខ​ថ្មី​៣​ក្រុម​គឺ គីរីវង់​សុខ​សែន​ជ័យ​,​ខេត្តកំពង់ចាម និង U18 សាលា​បាល់ទាត់​ជាតិ​បាទី​។

យោង​តាម​វិ​ប​សាយ​របស់ CNCC បាន​បញ្ជាក់​ថា ​ការដំឡើង​ក្រុម​ទាំង ៣ ខាងលើ​នេះ​បាន​ធ្វើ​ឡើង បន្ទាប់ពី​កិច្ចប្រជុំ​របស់​គណៈកម្មាធិការ​ប្រតិបត្តិ​នៃ​សហព័ន្ធ​កីឡាបាល់ទាត់​កម្ពុជា នាពេល​ថ្មីៗ​។ ការសម្រេច​របស់ គណៈកម្មាធិការ​ប្រតិបត្តិ ក្នុង​ការ​ដំឡើង គីរីវង់​សុខ​សែន​ជ័យ និង ក្លឹប​បាល់ទាត់​ខេត្តកំពង់ចាម ដោយសារ​មិនមាន​ការប្រកួត​លី​គ​២ នា​ឆ្នាំ​កន្លងទៅ​។ ប៉ុន្តែ គណៈកម្មាធិការ​ប្រតិបត្តិ បាន​ពិនិត្យឃើញថា​ទោះបី ក្រុម ទាំងពីរ​លេង​នៅ​លី​គ ២ ក៏មាន​លទ្ធភាព​អាច​ឡើង​មក លី​គ​កំពូល​បានដែរ​។ ចំណែក ការដាក់បញ្ចូល U18 សាលា​បាល់ទាត់​ជាតិ គឺ ដើម្បី​ឲ្យ​ពួកគេ​សុំា​ទៅ​នឹង​ការប្រកួត​ធំ និង បង្កើន​សមត្ថភាព​ឲ្យ​បាន​ខ្ពស់ ក្នុង​បំណង​ឲ្យ​ពួកគេ​ត្រៀមខ្លួន​រួចរាល់​សម្រាប់​ស៊ី​ហ្គេម ឆ្នាំ ២០២៣ ពេល​កម្ពុជា​ធ្វើជា​ម្ចាស់ផ្ទះ​៕

Source: Kampuchea Thmey Daily