ភ្នំពេញ ៖ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ ថា រាជរដ្ឋាភិបាលកម្ពុជា បានផ្តល់ការយកចិត្តទុកដាក់យ៉ាងខ្លាំង ក្នុងការលើកកម្ពស់សមភាពយេនឌ័រ និងពង្រឹងភាពអង់អាចដល់ស្ត្រី និងក្មេងស្រី ដើម្បីឲ្យពួកគេក្លាយជាកម្លាំងចលករចូលរួមក្នុងកិច្ចអភិវឌ្ឍសង្គម និងសេដ្ឋកិច្ច។
ថ្លែងនៅក្នុងពិធីអបអរសាទរខួបលើកទី១០៨ នៃទិវាអន្តរជាតិនារី ៨មីនាកាលពីថ្ងៃទី២៨ខែកុម្ភៈលោករដ្ឋមន្ត្រីបានមានប្រសាសន៍បន្តថា គោលដៅជាយុទ្ធសាស្ត្ររបស់រាជរដ្ឋាភិបាល គឺការពង្រឹងសមភាពយេនឌ័រ និងការគាំពារសង្គម ដើម្បីលើកស្ទួយស្ថានភាពសង្គម-សេដ្ឋកិច្ច និងពង្រឹងតួនាទីស្ត្រី ដែលជាឆ្អឹងខ្នងនៃសេដ្ឋកិច្ច និងសង្គមជាតិ។
ជាមួយគ្នានេះដែរ រាជរដ្ឋាភិបាលបានដាក់ចេញនូវក្របខណ្ឌគោលនយោបាយជាតិគាំពារសង្គម ឆ្នាំ២០១៦-២០២៥ ដែលមានលក្ខណៈទូលំទូលាយ ដោយផ្តោតលើសសរស្តម្ភពីរ គឺប្រព័ន្ធជំនួយសង្គម និងប្រព័ន្ធសន្តិសុខសង្គម។
លោករដ្ឋមន្ត្រីបានបន្ថែមថា ក្របខណ្ឌគោលនយោបាយនេះ នឹងដើរតួនាទីយ៉ាងសំខាន់ក្នុងការបង្កើនលទ្ធភាពទទួលបានសេវាជំនួយសង្គម និងសន្តិសុខសង្គម ដែលជាការគិតគូរចំពោះស្ត្រី មានជាអាទិ៍ ៖ទី១៖ កម្មការិនីសម្រាលកូនបានទទួលប្រាក់ឈ្នួលចំនួន ១២០% ចំនួន៣ខែ។ ចាប់ពីថ្ងៃទី០១ ខែមករា ឆ្នាំ២០១៨ រាជរដ្ឋាភិបាល បានអនុវត្តកម្មវិធីផ្តល់ប្រាក់ឧបត្ថម្ភដល់កម្មការនីសម្រាលកូន ដោយផ្តល់ជូនកូនមួយនាក់ចំនួន ៤០ម៉ឺនរៀល ចំពោះកូនភ្លោះទទួលបាន ៨០ម៉ឺនរៀល និងកូនភ្លោះបីបាន ១លាន២សែនរៀល ព្រមទាំងទទួលបានថវិកាបន្ថែមចំនួន ៥លានរៀល ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតផ្ទាល់។
ទី២៖ នៅពាក់កណ្តាលឆ្នាំ២០១៩ អនុវត្តកម្មវិធីឧបត្ថម្ភស្ត្រីមានផ្ទៃពោះ និងកុមារអាយុក្រោម២ឆ្នាំ នៃគ្រួសារក្រីក្រដែលមាន ៣ដំណាក់កាល គឺដំណាក់កាលទី១ ឧបត្ថម្ភ៤លើក ក្នុង១លើក ៤ម៉ឺនរៀល នៅពេលស្ត្រីមានផ្ទៃពោះទៅទទួលយកសេវាពិនិត្យផ្ទៃពោះ នៅមូលដ្ឋានសុខាភិបាលរបស់រដ្ឋ, ដំណាក់កាលទី២ ឧបត្ថម្ភ២០ម៉ឺនរៀល នៅពេលស្ត្រីសម្រាលកូននៅមូលដ្ឋានសុខាភិបាលរបស់រដ្ឋ និងដំណាក់កាលទី៣ ឧបត្ថម្ភ១០លើក ក្នុង១លើក ៤ម៉ឺនរៀល នៅពេលស្ត្រីជាម្តាយនាំទារកទៅទទួលថ្នាំបង្ការ ឬសេវាគាំពាររហូតដល់កុមារមានអាយុ២ឆ្នាំ។
ទី៣. ការអនុញ្ញាតឲ្យកម្មការិនីជាស្ត្រីដែលមានផ្ទៃពោះ ចេញមុនម៉ោងយ៉ាងតិច១៥នាទី។ លើសពីនេះទៀត គ្រប់រោងចក្រទាំងអស់ត្រូវរៀបចំបន្ទប់បំបៅកូនសម្រាប់កម្មការនី ដែលមានកូនអាយុក្រោម១២ខែនិងត្រូវមានទារកដ្ឋានសម្រាប់កម្មការនី ដែលមានកូនអាយុលើសពី១៨ខែ។ គ្រប់តំបន់សេដ្ឋកិច្ចពិសេស ឬសួនឧស្សាហកម្មត្រូវរៀបចំឲ្យមានទារកដ្ឋានមួយនៅក្នុងតំបន់របស់ខ្លួន។
ទី៤៖ ទន្ទឹមនឹងនេះ គ្រប់រោងចក្រទាំងអស់ បានអនុញ្ញាតឲ្យកម្មករនិយោជិតជាស្ត្រីខ្មែរឥស្លាម អាចប្រើប្រាស់សម្លៀកបំពាក់តាមបែបប្រពៃណីឥស្លាមនិងទី៥៖ រាជរដ្ឋាភិបាលប្រកាសផ្តល់ជូនប្រាក់ឧបត្ថម្ភដល់ស្ត្រីជាមន្ត្រីរាជការស៊ីវិល នគរបាល និងកងកម្លាំងប្រដាប់ឤវុធ ដែលបានសម្រាលកូន ក្នុងនោះកូនមួយទទួលបាន ៨០ម៉ឺនរៀល កូនភ្លោះទទួលបាន ១លាន៦០ម៉ឺនរៀល កូនភ្លោះ៣ ទទួលបាន ២លាន៤០ម៉ឺនរៀល រួមជាមួយនឹងការឈប់សម្រាកលំហែមាតុភាព រយៈពេល៣ខែ ជាមួយប្រាក់បៀវត្ស ១០០%។
លោកបណ្ឌិតអ៊ិត សំហេង បានបញ្ជាក់ថា ទាំងអស់នេះ បានបង្ហាញច្បាស់ថា រាជរដ្ឋាភិបាលតែងបានយកចិត្តទុកដាក់ខ្ពស់ចំពោះស្ត្រី ដោយពីមួយឆ្នាំទៅមួយឆ្នាំ ស្ត្រីតែងទទួលបាននូវផលប្រយោជន៍ផ្ទាល់ខ្លួនច្រើន និងកាត់បន្ថយបន្ទុកគ្រួសារកាន់តែច្រើន ដែលជាការលើកកម្ពស់ដល់សមភាពយេនឌ័រកាន់តែប្រសើរឡើង នៅគ្រប់វិស័យនៅកម្ពុជា។
ក្នុងឱកាសនោះ លោករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះសមិទ្ធផល និងស្នាដៃទាំងឡាយ របស់មន្ត្រីរាជការគ្រប់ជាន់ថ្នាក់នៅក្នុងក្រសួងការងារ និងបណ្តុះបណ្តាលវិជ្ជាជីវៈដែល លទ្ធផលជោគជ័យដ៏ធំធេងនេះមិនអាចកាត់ផ្តាច់បានពីការប្តេជ្ញាចិត្តចូលរួមសហការ និងសាមគ្គី ឯកភាពគ្នាជាធ្លុងមួយរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ទាំង នារី និងបុរស ក្នុងការគ្រប់គ្រងរាល់សភាពការណ៍ និងពុះពារកសាងនូវបរិយាកាសវិជ្ជមាន និងល្អប្រសើរសម្រាប់ធានាដល់ការអភិវឌ្ឍលើគ្រប់វិស័យ។
លោករដ្ឋមន្ត្រី ក៏បានផ្តាំផ្ញើដល់បុរសៗ សូមបន្តយកចិត្តទុកដាក់ចំពោះស្ត្រី ស្របតាមពាក្យស្លោកខ្មែរយើងដែលបានលើកឡើងថា “សំណាបយោងដី-ស្រីយោងប្រុស” ជាពិសេសសូមកុំមានការរើសអើងការងាររវាងស្ត្រី និងបុរស ទាំងការងារក្នុងផ្ទះ និងក្រៅផ្ទះ គឺសុទ្ធសឹងតែមានតម្លៃស្មើគ្នា។
លោកស្រី ខេង សំវ៉ាដា រដ្ឋលេខាធិការក្រសួងកិច្ចការនារីដែលបានចូលរួមនៅក្នុងទិវានាឱកាសនោះបានឲ្យដឹងថា ទិវាអន្តរជាតិនារី ៨មីនា ឆ្នាំ២០១៩ដែលជាខួបលើកទី១០៨នេះធ្វើឡើងក្រោមប្រធានបទ«លើកកម្ពស់សមភាពយេនឌ័រនិងការគាំពារសង្គមដើម្បីអភិវឌ្ឍន៍ធនធានមនុស្ស»ដែលជាប្រធានបទមួយមានសារសំខាន់ក្នុងការយកចិត្តទុកដាក់របស់រាធរដ្ឋាភិបាលដែលតែងតែគិតគូដើម្បីកឬប្រែស្ថានភាពរស់នៅរបស់ស្ត្រីកម្ពុជាឲ្យមានភាពល្អប្រសើរជាលំដាប់។
ជាងនេះទៅទៀត លោកស្រីបានបន្តថា រាជរដ្ឋាភិបាលបានកំណត់ថា ការជួយដល់ស្ត្រីឲ្យមានប្រាក់ចំណូលឲ្យជៀសផុតពីភាពក្រីក្រនឹងជួយឲ្យប្រជាជនរួចផុតពីភាពក្រីក្រ ព្រោះស្ត្រីកម្ពុជាតែងតែយកប្រាក់ចំណូលរបស់ខ្លួនមកផ្គត់ផ្គង់កូនចៅថែទាំចាស់ទុំនៅក្នុងគ្រួសារធ្វើឲ្យគ្រួសារមានជីវភាពកាន់តែល្អប្រសើរ។
គួរបញ្ជាក់ថា បច្ចុប្បន្ននេះមានមន្ត្រីរាជការទាំងអស់ចំនួន២១៧១៧១នាក់ ក្នុងនោះមានស្ត្រីចំនួន៤១ភាគរយ៕
Source: Kampuchea Thmey Daily
0 Comments