ភ្នំពេញ ៖ បុរសម្នាក់បានដួលស្លាប់ភ្លាមនៅកន្លែងតារាងលេងបាល់ទះមួយកន្លែងមានទីតាំង នៅភូមិគោកឃ្លាង សង្កាត់គោកឃ្លាង ខណ្ឌសែនសុខ កាលពីល្ងាចថ្ងៃទី២២ ខែកុម្ភៈ ឆ្នាំ២០១៩ ដែលការស្លាប់នេះត្រូវបានសមត្ថកិច្ចសន្និដ្ឋានថា វាបណ្តាលពី គាំងបេះដូង ឬហៅថា ខ្យល់គ មិនពាក់ព័ន្ធការវាយតប់ធ្វើឃាតអ្វីទេ។
សាកសពជនរងគ្រោះខាងលើឈ្មោះ ណាត ចាន្នី អាយុ២១ឆ្នាំ មុខរបរកសិករ មានទីលំនៅភូមិពោធិ៍និមិត្ត ឃុំលើកដែក ស្រុកកោះធំ ខេត្តកណ្តាល។
សាក្សីដែលជាក្រុមកីឡាករទាំងអស់បាននិយាយបំភ្លឺប្រាប់សមត្ថកិច្ចថា នៅមុនពេលកើតហេតុជនរងគ្រោះ(សាកសព)បានណាត់គ្នាមកលេងបាល់ទះដើម្បីសុខភាព ដែលនៅពេលលេងនោះ មានគ្នាទាំងអស់៨នាក់ចែកជា២ក្រុម១ក្រុមៗមានគ្នា៤នាក់ដូចគ្នា។ លុះមួយស្របក់ក្រោយមកកំពុងតែលេងបាល់ស្រាប់តែជនរងគ្រោះបានដួលដេកលើដីសន្លប់ឈឹងក៏នាំគ្នាដឹកយកទៅពេទ្យ ពេលទៅដល់ពេទ្យគ្រូពេទ្យមិនទទួលទេដោយប្រាប់ថា ជនរងគ្រោះបានស្លាប់បាត់ទៅហើយក៏ដឹកសពយកមកវិញប្រាប់ក្រុមគ្រួសារនិងសមត្ថកិច្ចមូលដ្ឋានឲ្យមកពិនិត្យសព។
ប៉ូលិសជំនាញផ្នែកត្រួតពិនិត្យសាកសពបានសន្និដ្ឋានថា សាកសពជនរងគ្រោះស្លាប់ដោយសារជំងឺគាំងបេះដូង ឬហៅថា ខ្យល់គ ដួលស្លាប់ដោយសារសុខភាពខ្សោយ ដោយការហត់ជ្រុលនៅពេលលេងបាល់ប្រកួតគ្នានោះ ដែលជាការស្ម័គ្រចិត្តរបស់ជនរងគ្រោះខ្លួនមកលេងបាល់ក្នុងន័យដើម្បីសុខភាពប៉ុន្តែមិននឹកស្មានថា បណ្តាលឲ្យគាំងបេះដូងស្លាប់ដូច្នេះទៅវិញនោះ មិនមែនជាអំពើវាយតប់ ឬ ធ្វើឃាតពីជនណាម្នាក់ឡើយ៕
Source: Kampuchea Thmey Daily
0 Comments