ភ្នំពេញ ៖ ក្នុងឱកាសប្រារព្ធ ទិវា ទីក្រុងស្អាត សង្កាត់ជ្រោយចង្វា លោកម៉ៅ ប៊ុនថា ចៅសង្កាត់ជ្រោយចង្វា បានអានសារលិខិត សម្ដេចតេជោ ហ៊ុន សែន ដោយបញ្ជាក់ថា ទីក្រុងស្អាត ៖ គឺជាទីក្រុងផ្តល់ភាពកក់ក្តៅ ឆ្លើយតបនឹងប្រធានបទ នៃទិវាជាតិទីក្រុងស្អាត រាជរដ្ឋាភិបាលបានដាក់ឲ្យថ្នាក់ក្រោមជាតិ បន្តខិតខំការងារអាទិភាពចំនួន៦ចំណុច ទី១.ខិតខំចាប់យកកាលានុវត្តភាព នៃការអភិវឌ្ឍសេដ្ឋកិច្ច ឌីជីថល ដោយត្រូវរួមគ្នាឆ្ពោះទៅអភិវឌ្ឍទីក្រុងប្រកបដោយភាពឆ្លាតវៃ។ ២.រៀបចំឲ្យមានសកម្មជនទីក្រុងស្អាតនៅតាមកន្លែងធ្វើការ ស្ថាប័ន សាលារៀន គ្រឹះស្ថានសិក្សា វត្តអារាម ផ្សារ រោងចក្រ សហគ្រាស បុរី ជាដើម សំដៅធ្វើឲ្យកន្លែងទាំងនោះ ប្រកបដោយភាពស្អាត និងបៃតងគ្រប់រដូវកាល បំផុសជាប្រចាំយុទ្ធនាការ (កម្ពុជាស្អាតនៅគ្រប់ទីកន្លែង)។ ៣.ត្រូវយកចិត្តទុកដាក់លើការងារអនាម័យ និងត្រូវរៀបចំឲ្យមានសង្កាត់គំរូនៅតាមទីក្រុង ទីប្រជុំជននិមួយៗ និងមានបង្គន់អនាម័យសាធារណៈ នៅតាមទីសាធារណៈ និងរមណីយដ្ឋានទេសចរណ៍គ្រប់រាជធានី ខេត្ត។៤.ស្របតាមស្តង់ដារទីក្រុងស្អាត រដ្ឋបាលថ្នាក់ក្រោមជាតិ ត្រូវរៀបចំឲ្យមានសួនកុមារ និងទីតាំងសម្រាប់លេងកីឡាឲ្យបានគ្រប់គ្រាន់។ ៥.រដ្ឋបាលថ្នាក់ក្រោមជាតិ ផ្នែកឯកជន និងភាគីពាក់ព័ន្ធ ត្រូវរៀបចំបង្កើតវិថីម្ហូបអាហារ និងពង្រឹងគុណភាពសេវាកម្មតូបលក់ម្ហូបតាមដងផ្លូវស្របតាមស្តង់ដារ ដើម្បីសុខុមាលភាពប្រជាពលរដ្ឋ និងភ្ញៀវទេសចរ និងត្រូវរៀបចំខ្សែក្រវាត់បៃតងនៅតាមទីក្រុងទេសចរណ៍សំខាន់ៗ ក្នុងន័យគាំទ្រដល់យុទ្ធនាការ(ទេសចរណ៍ គឺជាការនាំចេញនៅនឹងកន្លែង។ ទី៦.អាជ្ញាធរគ្រប់លំដាប់ថ្នាក់ រដ្ឋបាលថ្នាក់ក្រោមជាតិ ត្រូវបន្តថែរក្សាឲ្យបាននូវសន្តិសុខ សណ្ដាប់ធ្នាប់ សុវត្ថិភាពសង្គម ស្របតាមទស្សនាទាន(ទីក្រុងស្អាត ៖ ទីក្រុងប្រកបដោយសុខសុវត្ថិភាពល្អ) និង (ទីក្រុងស្អាត ៖ ទីក្រុងមានសណ្ដាប់ធ្នាប់សាធារណៈល្អ)។
ពិធីនេះបានប្រារព្ធធ្វើឡើងកាលពីព្រឹកថ្ងៃទី២៣កុម្ភៈនេះ នៅមុខសង្កាត់ជ្រោយចង្វា ដោយមានការអញ្ជើញចូលរួមពីក្រុមព្រឹក្សាសង្កាត់ មេភូមិ ប្រជាការពារ និងប្រជាពលរដ្ឋចំនួន៥ភូមិ ក្នុងសង្កាត់ជ្រោយចង្វាចំនួន៨៥នាក់។
ជាមួយគ្នានោះ សូមអំពាវនាវដល់គ្រប់ក្រសួងស្ថាប័ន កងកម្លាំងប្រដាប់អាវុធ និងគ្រប់ភាគីពាក់ព័ន្ធទាំងអស់ ចូលរួមអនុវត្តឲ្យបានផុសផុលដោយស្មារតីទទួលខុសត្រូវខ្ពស់នូវចលនាប្រឡងប្រណាំង (ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ) ដើម្បីឲ្យកម្ពុជាជាគោលដៅទេសចរណ៍ប្រកបដោយគុណភាព ចីរភាព និងទាក់ទាញភ្ញៀវទេសចរជាតិ និង អន្តរជាតិសក្ដិសមនិងកិត្តិនាម(កម្ពុជា ៖ ព្រះរាជាណាចក្រអច្ឆរិយៈផ្ដល់ភាពកក់ក្ដៅ)។
លោកចៅសង្កាត់ជ្រោយចង្វា ម៉ៅ ប៊ុនថា បានណែនាំដល់ប្រជាពលរដ្ឋទាំងអស់ត្រូវយល់ដឹងអំពី អនាម័យបរិស្ថានល្អ អាស្រ័យលើការចូលរួមពីយើងទាំងអស់គ្នា និងត្រូវយល់ដឹងអំពីសារៈសំខាន់បរិស្ថាន ដែលវាបានផ្ដល់ផលប្រយោជន៍ដល់យើងនូវសុខភាពទាំងផ្លូវកាយ និងផ្លូវចិត្ត ដោយកុំបោះសំរាមចោលពាសវាលពាសកាលពេលហូប រួចត្រូវវេចខ្ចប់សំរាមទុកដាក់ក្នុងធុង ឬទីកន្លែងប្រមូលផ្ដុំឲ្យបានត្រឹមត្រូវនោះ ទើបធានាបានសុខុមាលភាពល្អប្រសើរឡើង។
បន្ទាប់ពីអានសាររបស់ សម្ដេចតេជោ ហ៊ុន សែន ចប់ លោក ម៉ៅ ប៊ុនថា ក៏បានបែងចែកកម្លាំងជាពីរក្រុម ដើម្បីដើររើសសំរាមតាមទីសាធារណៈ និងនៅតាមផ្លូវនានានៅក្នុងសង្កាត់ជ្រោយចង្វា ដើម្បីអបអរសាទរទិវាទីក្រុងស្អាតដែលក្រោមប្រធានបទ (ទីក្រុងស្អាតនាំមកភាពកក់ក្តៅ)៕
Source: Kampuchea Thmey Daily
0 Comments