ភ្នំពេញ ៖ ក្រសួងអប់រំ យុវជន និងកីឡា បានចាប់ផ្តើមបណ្ដុះបណ្ដាលដល់នាយកសាលា ជាលើកដំបូង ដើម្បីគ្រប់គ្រងសាលា និងការបង្រៀនឲ្យកាន់តែមានប្រសិទ្ធភាព សំដៅលើកកម្ពស់គុណភាពអប់រំនៅកម្ពុជាឲ្យកាន់តែប្រសើរឡើង។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការបណ្ដុះបណ្ដាលដល់នាយកសាលានេះ គឺផ្តោតទៅលើការគ្រប់គ្រងសាលាឲ្យបានល្អ អភិបាលកិច្ច គុណភាព ការបង្រៀន ការរៀន និងការវាយតម្លៃការសិក្សារបស់សិស្ស ការរៀបចំផែនការ ការអនុវត្តផែនការ ការរៀបចំថវិកា និងអធិការកិច្ចតាមសាលានីមួយៗជាដើម។
លោក រស់ សុវាចា បានថ្លែងប្រាប់កាលពីថ្ងៃទី៧ ខែកុម្ភៈ ឆ្នាំ២០១៩ ថា ការបណ្តុះបណ្តាលដល់នាយកសាលានេះ គឺដើម្បីឲ្យពួកគាត់ទទួលបាននូវចំណេះដឹងថ្មីៗទាក់ទិននឹងបំណិន និងបទពិសោធន៍ផ្សេងៗដែលឈានទៅការផ្លាស់ប្ដូរឥរិយាបថ ទាំងការគ្រប់គ្រង និងដឹកនាំសាលារៀនឲ្យកាន់តែល្អប្រសើរឡើង។
ជាមួយគ្នានេះដែរ នឹងជួយឲ្យពួកគាត់ក្លាយទៅជាអ្នកដឹកនាំសាលារៀនបែបសតវត្សរ៍ទី២១ ដែលអាចនាំយកចំណេះដឹងសកលទៅកាន់សាលារៀន និងអនុវត្តន៍ពិតៗ បង្កើតភាពជាម្ចាស់សមាគមក្នុងការអភិវឌ្ឍសាលារៀន និងរៀបចំយុវជនក្លាយជាធនធាននៅក្នុងពិភពចំណេះដឹង និងសេដ្ឋកិច្ចនិងជាពលរដ្ឋ ជាសាកលផងដែរ។
ទន្ទឹមនឹងនេះដែរ លោក រស់ សុវាចា បានឲ្យដឹងទៀតថា ក្រសួងអប់រំ ក៏បានបណ្ដុះបណ្ដាលដល់គ្រូបង្រៀនកម្រិតមធ្យមសិក្សា ដើម្បីលើកកម្ពស់សមត្ថភាព ទាក់ទងនឹងចំណេះដឹងលើមុខវិជ្ជាឯកទេស វិធីសាស្ត្របង្រៀនថ្មីៗ និងការស្រាវជ្រាវបែបវិធានថ្នាក់រៀន ព្រមទាំងជំនាញសតវត្សរ៍ទី២១។
លោក មាស ឆពណ្ណ នាយកសាលាបឋមសិក្សាព្រះនរោត្តមបានឲ្យដឹងកាលពីថ្ងៃទី៧កុម្ភៈថា វាគឺជាគំនិតដ៏ល្អជាទីបំផុត ដែលក្រសួងបានបង្កើតកម្មវិធីបណ្ដុះបណ្ដាលដល់នាយកសាលា ព្រោះថានឹងជួយឲ្យនាយកសាលាមានចំណេះដឹងខ្ពង់ខ្ពស់ក្នុងការចេះពីរបៀបដឹកនាំសាលា សិស្សគ្រូ ហេដ្ឋារចនាសម្ព័ន្ធ បរិស្ថាន និងថវិកាក្នុងសាលា ប្រកបដោយប្រសិទ្ធភាពខ្ពស់។ មិនតែប៉ុណ្ណោះ នឹងជួយឲ្យនាយកសាលាមានគំនិតច្នៃប្រឌិត និងធ្វើអ្វីថ្មីៗបន្ថែមទៀតក្នុងការអភិវឌ្ឍន៍សាលារបស់ខ្លួនឲ្យកាន់តែរីកចម្រើនសម្រាប់ជាផលប្រយោជន៍ដល់សិស្ស និងសហគមន៍ទាំងមូល។
ក្រសួងអប់រំ យុវជន និងកីឡា បានរៀបចំកម្មវិធីលើកកម្ពស់គុណវុឌ្ឍិគណៈគ្រប់គ្រងសាលារៀនជំនាន់ទី១ និងគ្រូបង្រៀនជំនាន់ទី២ កាលពីថ្ងៃទី៣ ខែកុម្ភៈ ឆ្នាំ២០១៩ នៅមជ្ឈមណ្ឌលសហប្រតិបត្តិការកម្ពុជាកូរ៉េ ដែលមានការចូលរួមពីគរុនិស្សិតចំនួន៧៦៦នាក់ និងនាយកសាលាចំនួន១៥០នាក់ផងដែរ។
លោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងពិធីបើកបវេសនកាល «កម្មវិធីលើកកម្ពស់គុណវុឌ្ឍិគណៈគ្រប់គ្រងសាលារៀន» ថាកម្មវិធីនេះ នឹងចូលរួមកាន់តែសកម្ម ក្នុងការពង្រឹងវិស័យអប់រំនៅកម្ពុជា និងបានជួយឲ្យគរុនិស្សិតមានចំណេះដឹងជ្រៅជ្រះ មានបំណិនវិជ្ជាជីវៈ កាន់តែច្បាស់លាស់ និងមានគោលដៅជីវិតរឹងមាំខ្លាំងក្លាថែមទៀត។
លោកបណ្ឌិត ហង់ ជួនណារ៉ុន បានបន្តថា កម្មវិធីលើកកម្ពស់គុណវុឌ្ឍិគណៈគ្រប់គ្រងសាលារៀន បានបង្កើតឡើងដើម្បីជាការពង្រឹងសមត្ថភាពខ្លួនឯង និងសម្រាប់ជាការពង្រឹងដល់ការដឹកនាំ និងបង្រៀននៅក្នុងសាលារៀន។
ជាមួយគ្នានោះ លោកបណ្ឌិត ហង់ ជួនណារ៉ុន បានថ្លែងអរគុណដល់ លោកគ្រូ អ្នកគ្រូ ដែលបានខិតខំប្រឹងប្រែងផ្តល់ចំណេះដឹងជូនសិស្សានុសិស្ស និងចូលរួមធ្វើឲ្យវិស័យអប់រំ នៅកម្ពុជា កាន់តែមានភាពល្អប្រសើរជាងមុន។
គួរបញ្ជាក់ថា កម្មវិធីលើកកម្ពស់គុណវុឌ្ឍិគ្រូបង្រៀនទទួលបណ្ដុះបណ្ដាលដោយមហាវិទ្យាល័យអប់រំ មហាវិទ្យាល័យវិទ្យាសាស្ត្រ និងមហាវិទ្យាល័យសង្គមសាស្ត្រ និងមនុស្សសាស្ត្រ នៃសាកលវិទ្យាល័យភូមិន្ទភ្នំពេញពេញ។ ចំណែក កម្មវិធីលើកកម្ពស់គុណវុឌ្ឍិគណៈគ្រប់គ្រងសាលារៀនទទួលបណ្ដុះបណ្ដាលដោយមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ៕
Source: Kampuchea Thmey Daily
0 Comments