បាត់ដំបង ៖ គំនរអុសដ៏ច្រើនសន្ធឹកសន្ធាប់ ដែលជាឈើខុសច្បាប់ ត្រូវបានអណ្តាតភ្លើងឆាបឆេះដោយមិនទាន់ដឹងមូលហេតុ ប៉ុន្តែត្រូវបានកម្លាំងសមត្ថកិច្ចទាំង២ ស្ថាប័នជួយអន្តរាគមន៍ពន្លត់ទាន់ពេលវេលា ដែលឈើអុសទាំងនេះ ត្រូវបានគេកាត់យកមកទុកសម្រាប់ដុតប្រើប្រាស់នៅក្នុងឡឥដ្ឋ។
បើតាមប្រភពប្រជាពលរដ្ឋបាននិយាយថា នៅវេលាម៉ោង ២ និង ៤០ នាទីរសៀល ថ្ងៃទី១៥ ខែ កុម្ភៈ ឆ្នាំ ២០១៩ នៅចំណុចភូមិបឹងព្រីង ឃុំព្រៃតូច ស្រុកមោងឫស្សី ខេត្តបាត់ដំបង មានករណីអគ្គិភ័យមួយ បានឆាបឆេះគំនរអុស ដែលគេទុកសម្រាប់ដុតក្នុង ឡឥដ្ឋ។
ប្រភពដដែលបានបន្តថា ឡឥដ្ឋចាងលើ គឺមាន ម្ចាស់ឈ្មោះ ទៀ ហ៊នី ភេទប្រុសអាយុ ៤៩ ឆ្នាំ មុខរបរ លក់ដូរ រស់នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ដោយដំបូងគេបានឃើញផ្សែងចាប់ផ្តើមហុយ ព្រមទាំងមានអណ្តាតភ្លើងឆាបឆេះឡើងតែម្តង។
ភ្លាមៗនោះដែរទាំងប្រជាពលរដ្ឋ ក៏ដូចជាសមត្ថកិច្ចមូលដ្ឋាន បានហៅរថយន្តពន្លត់អគ្គិភ័យរបស់អធិការដ្ឋាន ស្រុកមោងឫស្សី និងរថយន្តរបស់អធិការដ្ឋានស្រុកគាស់ក្រឡ អោយជួយចេញប្រតិបត្តិការ ដើម្បីសហការជួយបាញ់ពន្លត់ក្នុងការទប់ស្កាត់នូវការរាលដាលទៅលើលំនៅដ្ឋានរបស់ពលរដ្ឋ។
ជាក់ស្តែង ភ្លើងបានរលត់ទាំងស្រុង ដោយមានការ ខូចខាតឈើ អុស១ពំនូក ប្រហែល១៥ភាគរយ តែប៉ុណ្ណោះ ដោយប្រភពមួយចំនួនបានសន្និដ្ឋានជាបឋមថា អាចបណ្តាលមកពីការចោលកន្ទុយបារី ព្រោះទីតាំងនេះស្ថិតនៅជាប់នឹងវាលស្រែ ដែលពោរពេញដោយជញ្ជ្រាំង។
គួរបញ្ជាក់ដែរថា រយៈកាលកន្លងមក មន្ទីរឧស្សាហកម្ម និងសិប្បកម្ម តែងតែធ្វើការណែនាំដល់បណ្តាឡឥដ្ឋទាំងអស់ត្រូវកែប្រែពីការដុតឈើអុស ទៅជាការប្រើប្រាស់អង្កាមដុតយកថាមពលក្នុងការចម្អិនឥដ្ឋវិញ ដើម្បីការពារព្រៃឈើធម្មជាតិ ផ្ទុយទៅវិញឡឥដ្ឋខាងលើនៅតែបន្តការប្រើប្រាស់ឈើអុសដើម្បីដុតឥដ្ឋដដែល ដូច្នេះតើមន្ទីរជំនាញ ដែលបានត្រួតពិនិត្យ និងសិក្សាឡើងវិញ ដែរឬទេ អំពីបញ្ហានេះ ?៕
Source: Kampuchea Thmey Daily
0 Comments