ភ្នំពេញ ៖ សម្តេចព្រះមហាក្សត្រី នរោត្តមមុនី្ននាថសីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល បានអំពាវនាវឲ្យមាតាបិតាអាណាព្យាបាលទាំងអស់ចូលរួមបង្កើនការអប់រំដល់កូនចៅរបស់ខ្លួន ដើម្បីលើកកម្ពស់សីលធម៌ និង វប្បធម៌អហិង្សា ក្នុងគ្រួសារ ដើម្បីលើកស្ទួយទំនៀមទម្លាប់ប្រពៃណីជាតិខ្មែរឲ្យកាន់តែផូរផង់ថែមទៀត។
យោងតាមព្រះរាជសារដែលបានផ្ញើជួនប្រជារាស្ត្រ នៅក្នុងឱកាសទិវាអន្តរជាតិនារី ៨មីនា ឆ្នាំ២០១៩នេះ សម្ដេចម៉ែ បានមានព្រះរាជបន្ទូល ដោយណែនាំដល់មាតាបិតាអាណាព្យាបាលទាំងអស់ ត្រូវអប់រំទូន្មានប្រៀនប្រដៅកូនចៅឲ្យក្លាយជាកូនល្អ សិស្សល្អ និងពលរដ្ឋល្អ និងជៀសឆ្ងាយពីគ្រឿងញៀន គ្រឿងស្រវឹង និងអំពើអបាយមុខផ្សេងៗក្នុងសង្គម។
ជាងនេះទៅទៀត ត្រូវអប់រំកូនចៅឲ្យប្រកាន់ខ្ជាប់នូវសីលធម៌ សុជីវធម៌ ដើម្បីរួមចំណែកអនុវត្តគោលនយោបាយភូមិ/ឃុំមានសុវត្ថិភាព ដើម្បីរក្សាសុខសន្តិភាពសុវត្ថិភាពសណ្ដាប់ធ្នាប់សង្គម សាមគ្គីជាធ្លុងមួយ ព្រមទាំងរក្សាសេចក្ដីថ្លៃថ្នូរសំដៅឈានឆ្ពោះទៅរកភាពសម្បូរសប្បាយ និងសុខដុមរមនាជារៀងរហូត។
នៅក្នុងព្រះរាជសារនោះ សម្តេចម៉ែ បានសម្តែងនូវការកោតសរសើរចំពោះ សម្តេចនាយករដ្ឋមន្ត្រីហ៊ុន សែន ដែលបានខិតខំបំពេញភារកិច្ច ដើម្បីជាឧត្តមប្រយោជន៍ជាតិ មាតុភូមិ និង ប្រជារាស្ត្រកម្ពុជា។
ជាមួយគ្នានេះដែរ សម្ដេចម៉ែ ក៏បានកោតសរសើរចំពោះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែនដែលជាអ្នកដឹកនាំដ៏ឆ្នើម និងជាគំរូដ៏ល្អដែលបានលះបង់កម្លាំងកាយចិត្ត ក្នុងសកម្មភាពរបស់កាកបាទក្រហមកម្ពុជា និងបានខិតខំលើកកម្ពស់សីលធម៌សង្គមតម្លៃស្ត្រី និងគ្រួសារខ្មែរឲ្យមានកិត្តិយសនិងសេចក្ដីថ្លៃថ្នូរក្នុងសង្គម។
ថ្លែងនៅក្នុងពិធីអបអរទិវាអន្តរជាតិនារី ៨មីនា ឆ្នាំ២០១៩ នៅព្រឹកថ្ងៃទី២៨កុម្ភៈនេះ នៅទីស្តីការក្រសួង លោកជំទាវ ស៊ើង សរសុចិត្តា រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានគាំទ្រទាំងស្រុងនូវព្រះរាជសាររបស់ សម្ដេចម៉ែ ព្រោះជួយឲ្យកូនចៅដែលជាក្មេងជំនាន់ក្រោយក្លាយជាពលរដ្ឋល្អ រស់នៅដោយសេចក្ដីថ្លៃថ្នូរ និងថ្កុំថ្កើងនៅក្នុងសង្គម។
លោកស្រីបានបន្តថា «ចាសទាក់ទងនឹងព្រះរាជសារសម្ដេចម៉ែ លោកសូមសំណូមពរឲ្យមាតាពិសេសស្ត្រីទាំងអស់ គឺសូមចូលរួមអប់រំទូន្មានប្រៀនប្រដៅដល់កូនចៅឲ្យដើរតួនាទីជាកូនល្អ សិស្សល្អ និងពលរដ្ឋល្អ ក្នុងនោះជៀសឲ្យផុតពីគ្រឿងញៀនគ្រឿងស្រវឹង និងអំពើហិង្សា ដើម្បីចូលរួមទាំងអស់គ្នា កសាងនូវប្រទេសជាតិ ហើយដើម្បីឲ្យយុវជនក្លាយជាទំពាំងស្នងឫស្សី»។
លោកស្រីបានបន្តថា ព្រះរាជសារនេះ គឺពិតជាសមស្របទៅនឹងសម័យកាលនេះ ដោយសារតែបច្ចុប្បន្នបញ្ហាគ្រឿងញៀន គឺជាក្តីបារម្ភយ៉ាងខ្លាំងរបស់រាជរដ្ឋាភិបាល ព្រោះគ្រឿងញៀននេះបានបំផ្លាញធនធានមនុស្ស និងសង្គមជាតិ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឲ្យស្ត្រី ត្រូវបន្តយកចិត្តទុកដាក់លើកកម្ពស់សមត្ថភាព ចំណេះ ជំនាញវិជ្ជាជីវៈបន្ថែម ដើម្បីចូលរួមកសាងគ្រួសារមួយប្រកបដោយសុភមង្គល ក៏ដូចជាអភិវឌ្ឍប្រទេសជាតិឲ្យកាន់តែរីកចម្រើន។
គួរបញ្ជាក់ថា ទិវាអន្តរជាតិនារី ៨មីនា ឆ្នាំ២០១៩ ដែលជាខួបលើកទី១០៨នេះ ធ្វើឡើង ក្រោមប្រធានបទលើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស៕
Source: Kampuchea Thmey Daily
0 Comments