បាត់ដំបង ៖ កសិផលម្រេចខ្មៅ ( ម្រេចស្ងួត ) ក្នុងខេត្តបាត់ដំបង បានចុះថ្លៃយ៉ាងគំហុកនៅលើទីផ្សារ ស្ទើរតែធ្វើឲ្យប្រជាពលរដ្ឋដែលជាម្ចាស់ចម្ការម្រេចលក់ផ្ទះសម្បែង និងលក់ដីកេរ្តិ៍អាករ ដើម្បីបង់លុយឲ្យធនាគារ ដោយសារតែពួកគាត់បានបង្វិលលុយទាំងនេះយកមកប្រកបមុខរបរដាំដំណាំម្រេច។
ស្ត្រីម្នាក់ ឈ្មោះ សុខ ប៊ីន អាយុ៣១ឆ្នាំ រស់នៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង បានរៀបរាប់ថា រូបគាត់ និងបងប្អូន នាំគ្នាដាំដំណាំម្រេចនេះអស់រយៈពេល២ ទៅ៣ឆ្នាំហើយ ពិសេសគឺអ្នកស្រុកសំឡូតភាគច្រើន បានប្រកបមុខរបរនេះដូចគ្នា។
គាត់បានបន្តថា នៅឆ្នាំនេះ អ្នកដាំដំណាំម្រេចកំពុងតែលង់ខ្លួនហើយ ដោយសារតែម្រេចខ្មៅ ( ម្រេចស្ងួត ) មានការធ្លាក់ថ្លៃយ៉ាងខ្លាំង បើប្រៀបធៀបទៅនឹងឆ្នាំកន្លងទៅ គឺធ្លាក់ចុះពាក់កណ្ដាល បច្ចុប្បន្ននេះប្រជាពលរដ្ឋមួយចំនួន នៅក្នុងស្រុកសំឡូតកំពុងប្រកាសលក់ដីខ្លះៗហើយ ដើម្បីប្រមែប្រមូលលុយកាក់បង់ឲ្យធនាគារដែលខ្លួនបានយកមកប្រកបមុខរបរនេះ។
ដោយឡែកស្ត្រី ឈ្មោះ តេង សោភា អាយុ៣៧ឆ្នាំ រស់នៅភូមិស៊ុង១ ឃុំស៊ុង ស្រុកសំឡូត ដូចគ្នា បាននិយាយថា នៅស្រុកសំឡូត សឹងតែ៩៩ភាគរយទៅហើយ ដែលប្រកបមុខរបរដាំដើមម្រេចនេះ ដោយគ្រាន់តែតិច និង ច្រើនតែប៉ុណ្ណោះ។
ដោយឡែកចំពោះរូបគាត់បានដាំដើមម្រេចបាន១.៥០០ជន្លង់ គឺពីឆ្នាំមុន តម្លៃម្រេចស្ងួតលេខ១ បានដល់ទៅ១៤.០០០រៀល ក្នុង១គីឡូក្រាម និងចុះជាបណ្ដើរ រហូតដល់ចុងដៃ គឺនៅសល់ត្រឹម ១០.៩០០រៀល ដោយមានឈ្មួញខ្មែរជាអ្នកចុះប្រមូលទិញ ហើយបញ្ជូនទៅឲ្យមេឈ្មួញវៀតណាម និងឈ្មួញថៃ។ លុះមកដល់ឆ្នាំនេះ តម្លៃម្រេចលេច១ ចាប់ពីដើមដៃ បានមិនដល់១០.០០០រៀលផង ហើយបច្ចុប្បន្ននេះ គឺនៅដល់ត្រឹម៧.៥០០រៀលតែប៉ុណ្ណោះ គឺមានន័យថា ធ្លាក់ថ្លៃស្ទើរពាក់កណ្ដាល បើប្រៀបធៀបពីឆ្នាំមុន។
បច្ចុប្បន្ននេះ ប្រជាកសិករដែលប្រកបមុខរបរដាំដំណាំម្រេចនេះ បានសំណូមពរដល់ប្រមុខរាជរដ្ឋាភិបាល ពិសេសគឺក្រសួងពាក់ព័ន្ធ មេត្តាធ្វើយ៉ាងណាជួយរកទីផ្សារម្រេចស្ងួតនេះផង ព្រោះអីពលរដ្ឋមួយចំនួនកំពុងប្រកាសលក់ដីបណ្តើរៗហើយ ដើម្បីដោះបំណុលធនាគារ ព្រោះអីតម្លៃនេះវាខាតទាំងស្រុងតែម្ដង។ ចំណែកម្រេចខ្ចីបច្ចុប្បន្ន គឺនៅថេរត្រឹម ៣.៥០០រៀល៕
Source: Kampuchea Thmey Daily
0 Comments