អូស្ត្រាលី​ចោទប្រកាន់​រដ្ឋាភិបាល​បរទេស​អំពី​ការវាយប្រហារ​តាម​អ៊ីនធឺណិត​លើ​សមាជិកសភា

នៅ​ថ្ងៃ​ចន្ទ ប្រទេស​អូស្ត្រាលី​បាន​និយាយថា “​បុគ្គល​ដែល​បណ្តុះបណ្តាល​ដោយ​រដ្ឋ​” បានធ្វើការ Hack គណបក្សនយោបាយ​ធំៗ​និង​សភា​របស់​ប្រទេស​នេះ​, ត្រឹមតែ​ប៉ុន្មាន​សប្តាហ៍​ប៉ុណ្ណោះ​មុនពេល​មានការ​បោះឆ្នោត​ដ៏​តានតឹង​មួយ​។​

លោកនាយក​រដ្ឋមន្ដ្រី Scott Morrison បាន​ប្រាប់​សមាជិកសភា​ថា ភ្នាក់ងារ​សន្តិសុខ​ដែល​កំពុង​សម្លឹងមើល​ការ hack ក៏បាន​ដឹងផង​ដែរ​ថា បណ្តាញ​នៃ​គណបក្សនយោបាយ​មួយចំនួន​ដូចជា​គណបក្ស​សេរីនិយម គណបក្ស​ការងារ​និង​គណបក្ស​ជាតិ​ក៏​រង​ផលប៉ះពាល់​ផងដែរ​។​

លោក​បាន​និយាយ​ដោយ​មិន​លើកឡើង​អំពី​ប្រទេស​ជាក់លាក់​ណាមួយ​ថា “​អ្នកជំនាញ​ផ្នែក​អ៊ីនធឺណិត​របស់​យើង​ជឿជាក់ថា បុគ្គល​ដែល​បណ្តុះបណ្តាល​ដោយ​រដ្ឋ​គឺជា​អ្នកទទួលខុសត្រូវ​ចំពោះ​សកម្មភាព​ដ៏​គ្រោះថ្នាក់​នេះ​”​។​

លោក​បាន​និយាយទៀតថា “​ទីភ្នាក់ងារ​សន្តិសុខរ​បស់​យើង​បាន​រកឃើញ​សកម្មភាព​នេះហើយ​បាន​ចាត់វិធានការ​យ៉ាង​ម៉ឺងម៉ាត់​ដើម្បី​ប្រឈមមុខ​នឹង​បញ្ហា​នេះ​។ ពួកគេ​កំពុង​ធានា​សន្តិសុខ​ចំពោះ​ប្រព័ន្ធ​ទាំងនេះ​និង​ការពារ​អ្នកប្រើប្រាស់​”​។​

កាលពី​ដើមខែ​នេះ អាជ្ញាធរ​បាន​រាយការណ៍​អំពី​ឧបទ្ទវហេតុ​សន្តិសុខ​មួយ​នៅលើ​បណ្តាញ​កំ​ព្យូ​ទ័​រ​សភា​ដែលជា​ហេតុ​បង្ខំ​ឲ្យ​អ្នកប្រើប្រាស់​រួមទាំង​នាយករដ្ឋមន្ត្រី​និង​គណៈរដ្ឋមន្ត្រី​ផងដែរ​ត្រូវ​ផ្លាស់ប្តូរ Password និង​ចាត់វិធានការ​សន្តិសុខ​ផ្សេងទៀត​។​

ទីភ្នាក់ងារ Australian Signals Directorate បាន​បញ្ជាក់ថា ខ្លួន​កំពុងធ្វើការ​ជាមួយ​សភា​ដើម្បី​ឆ្លើយតប​នឹង​ការវាយប្រហារ​នេះហើយ​ផ្តល់​សញ្ញា​ថា បុគ្គល​សម័យ​ទំនើប​ត្រូវបាន​គេ​សង្ស័យថា​ជា​អ្នក​ចាប់ផ្តើម​។​

ការរំពឹងទុក​បាន​ផ្តោតទៅលើ​ប្រទេស​ចិន​ថ្វីបើ​គ្មាន​ការចង្អុល​ជា​ផ្លូវ​ការដាក់​ទីក្រុង​ប៉េកាំង​ក៏ដោយ​។​
​ប្រជាជន​អូស្ត្រាលី​ត្រូវបាន​គេ​រំពឹងថា​នឹង​ទៅ​បោះឆ្នោត​នៅ​ពាក់កណ្តាល​ខែឧសភា​ដោយ​បង្កើន​នូវ​ការរំពឹងទុក​ដែលថា ពួក Hacker អាច​ព្យាយាម​ដើម្បី​ជះឥទ្ធិពល​លើ​លទ្ធផល​នៃ​ការបោះឆ្នោត​៕ AFP

​

Source: Kampuchea Thmey Daily