ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) កាលពីព្រឹកថ្ងៃទី១៨ ខែកុម្ភៈ ឆ្នាំ២០១៩ បានបើកកម្មវិធីបណ្តុះបណ្តាលស្តីពី ការស្រង់ស្ថិតិប្រជាពលរដ្ឋប៉ាន់ស្មាន និងការចុះឈ្មោះបោះឆ្នោត ឆ្នាំ២០១៩ និងការចុះឈ្មោះបោះឆ្នោត និងការចុះបញ្ជីគណបក្សនយោបាយ ឈរឈ្មោះបោះឆ្នោត សម្រាប់ការបោះឆ្នោត ជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រមប្រឹក្សាខណ្ឌ អាណត្តិទី៣ ឆ្នាំ២០១៩។
កម្មវិធីបណ្តុះបណ្តាលនោះ រៀបចំធ្វើឡើងក្រោមអធិបតីភាពលោក ម៉ុក ដារ៉ា អគ្គលេខាធិការរង គ.ជ.ប ហើយកម្មវិធីនេះមានរយៈពេល២ថ្ងៃ ដោយចាប់ពីថ្ងៃទី១៨ ដល់ថ្ងៃទី១៩ ខែកុម្ភៈ ឆ្នាំ២០១៩ នៅសាលសន្និសីទ គ.ជ.ប ដោយមានសិក្ខាកាមចូលរួមប្រមាណ១២០នាក់ ដែល ជាមន្ត្រីលេខាធិការដ្ឋានរាជធានី ខេត្តរៀបចំការបោះឆ្នោត មន្ត្រីគណៈកម្មការរាជធានី ខេត្ត រៀបចំ ការបោះឆ្នោត តំណាងគណបក្សនយោបាយចំនួន១២ និងសមាគម អង្គការមិនមែនរដ្ឋាភិបាលចំនួន១៤ តំណាងក្រសួងមហាផ្ទៃ និងក្រសួងព័ត៌មាន។
ថ្លែងទៅកាន់វគ្គបណ្តុះបណ្តាល លោក ម៉ុក ដារ៉ា បានលើកឡើងថា គ្រូបង្គោល គ.ជ.ប ត្រូវធ្វើការបណ្តុះបណ្តាលលើប្រធានបទចំនួន៦ រយៈពេល២ថ្ងៃ(ថ្ងៃទី១៨-ថ្ងៃទី១៩ ខែកុម្ភៈ ឆ្នាំ២០១៩) រួមមាន ទី១. សេចក្តីណែនាំស្តីពីការស្រង់ស្ថិតិប្រជាពលរដ្ឋប៉ាន់ស្មាន ទី២. ផែនការណែនាំស្តីពីការស្រង់ស្ថិតិប្រជាពលរដ្ឋប៉ាន់ស្មាន ការិយាល័យចុះឈ្មោះបោះ ឆ្នោត និងការទទួលខុសត្រូវរបស់ប្រធានក្រុមប្រឹក្សាឃុំ សង្កាត់ក្នុងការចុះឈ្មោះ បោះឆ្នោត ទី៣. នីតិវិធីនៃការចុះឈ្មោះបោះឆ្នោត ការរៀបចំ និងការបញ្ជូនបញ្ជីឈ្មោះមក គ.ជ.ប ការរៀបចំការបញ្ជូន និងការបិទផ្សាយបញ្ជីបោះឆ្នោតដំបូង ទី៤. ការដាក់ ការទទួល និងការដោះស្រាយពាក្យបណ្តឹងទាក់ទងនឹងបញ្ជីបោះឆ្នោតដំបូង ទី៥. ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ និងការដោះស្រាយពាក្យបណ្តឹង និង៦. ការណែនាំអំពីការផ្សព្វផ្សាយបន្តនៅរាជធានី ខេត្តស្តីពីការចុះឈ្មោះបោះឆ្នោត។
សូមជម្រាបជូនថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ចាប់ពីថ្ងៃទី០១ ដល់ថ្ងៃទី២២ ខែឧសភា ឆ្នាំ២០១៩ និងការបោះឆ្នោតជ្រើសរើសក្រុមប្រឹក្សា ប្រព្រឹត្តទៅនៅថ្ងៃ ទី២៦ ខែឧសភា ឆ្នាំ២០១៩៕
Source: Kampuchea Thmey Daily
0 Comments