លេចមុខ​លោក សំ វ៉ាន់​ដេ​ត អតីត​គ្រូបង្វឹក​ព្រះខ័ន​រាជ​ស្វាយរៀង ធ្វើការ​ជាមួយ​ក្រុម​អាស៊ី​អឺរ៉ុប

លេចមុខ​អតីត​គ្រូ​បង្គោល​ព្រះខ័ន​រាជ​ស្វាយរៀង លោក សំ វ៉ាន់​ដេ​ត ឈរ​ដឹកនាំ​ក្លិប​បាល់ទាត់​អាស៊ី​អឺរ៉ុប​យូ​ណាយ​ធី​ត នៅ​រសៀល​ថ្ងៃ​ពុធ ថ្មីៗ​នេះ ក្នុងជំនួប​មិត្តភាព​កម្ដៅ​សាច់ដុំ​រវាង អាស៊ី​អឺរ៉ុប​យូ​ណាយ​ធី​ត ជាមួយនឹង​ក្លិប​ចាស់​គឺ​ព្រះខ័ន​រាជ​ស្វាយរៀង លើ​ទីលាន​កីឡដ្ឋាន AEU Sport Park​។



ប្រភព​មកពី​ក្បាលម៉ាស៊ីន​របស់​ក្លិប​អាស៊ី​អឺរ៉ុប បាន​បញ្ជាក់​ថា ​ដំណើរ​ទៅដល់​របស់​លោក សំ វ៉ាន់​ដេ​ត គឺ​ក្នុងនាម​ជា​គ្រូ​បច្ចេកទេស ហើយ​ជា​អ្នកស្ម័គ្រចិត្ត​ប៉ុណ្ណោះ មិន​ប៉ះពាល់​ដល់​តំណែង​គ្រូបង្វឹក​បច្ចុប្បន្ន​របស់​លោក សុក វាសនា នោះទេ​។ ប្រភព​បាន​បន្ត​ថា «​តាមពិត​លោក សំ វ៉ាន់​ដេ​ត គាត់​កំពុងតែ​ចូល​សិក្សា​វគ្គ​គ្រូបង្វឹក​កម្រិត AFC A License ដែល​តម្រូវ​ឲ្យ​សិក្ខាកាម​នីមួយៗ​មាន​ក្លិប​ឈរជើង​ត្រឹមត្រូវ ទើប​អាច​បញ្ចប់​វគ្គ​នេះ​ដោយ​ជោគជ័យ​។ ដូច្នេះ​លោក សំ វ៉ាន់​ដេ​ត ក៏​ស្ម័គ្រចិត្ត​ជួយ​ក្លិប​យើង​តែម្តង​»​។ ការងារ​របស់លោក សំ វ៉ាន់​ដេ​ត សហការ​ជាមួយ​ក្លិប​អាស៊ី​អឺរ៉ុប គឺមាន​រយៈពេល​១​ឆ្នាំ​។

​លោក សំ វ៉ាន់​ដេ​ត ដែល​កំពុងតែ​កាន់​អាជ្ញា​ប័​ណ្ឌ AFC B License បាន​ចាក​ចេញពី​ក្លិប​ព្រះខ័ន​រាជ​ស្វាយរៀង នៅ​ដើមឆ្នាំ​២០១៨ ដោយហេតុ​ផល​ថា ​លោក​ត្រូវ​បំពេញ​ការសិក្សា​ក្នុង​វគ្គ​គ្រូបង្វឹក​បាល់ទាត់​កម្រិត AFC A License អោយ​រួចរាល់​សិន​។ ក្រោយ​ការ​ចាកចេញ​របស់លោក សំ វ៉ាន់​ដេ​ត ក្លិប​ព្រះខ័ន​រាជ​ស្វាយរៀង បាន​យក​លោក Conor Nestor សញ្ជាតិ​អៀរ​ឡង់ មកកាន់​ការងារ​ជំនួស​។



លោក សំ វ៉ាន់​ដេ​ត បាន​ចូលខ្លួន​ធ្វើជា​គ្រូធំ​ប្រចាំ​ក្លិប​ព្រះខ័ន​រាជ​ស្វាយរៀង តាំងពី​ឆ្នាំ​២០១២ រហូតដល់​ឆ្នាំ​២០១៧ ហើយ​ក្នុងពេលនោះ​លោក​ធ្លាប់បាន​លើក​ពានរង្វាន់​មួយចំនួន​ជាមួយ​ក្រុម​ដូចជា​ឈ្នះ​ជើងឯក​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១៣ ហើយ​ឈ្នះ​ពានរង្វាន់​សម្តេច​តេ​ជោ ហ៊ុន សែន នៅ​ឆ្នាំ​២០១២,២០១៥ និង​២០១៧ ខណៈ​លោក​ក៏​ធ្លាប់​ដឹកនាំ​ក្រុម​ឈ្នះ​ជើងឯក​រង​ពានរង្វាន់ BTV Cup នៅ​វៀតណាម ក្នុង​ឆ្នាំ​២០១២​និង​២០១៤ ផងដែរ​៕

Source: Kampuchea Thmey Daily