រតនគិរី ៖ យុវជនម្នាក់ បានរងរបួសធ្ងន់ ក្នុងករណីគ្រោះថ្នាក់ចរាចរណ៍ រវាងរថយន្ត បុកម៉ូតូ ក្នុងទិសដៅបញ្ច្រាសគ្នា។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៧និង២០នាទីយប់ ថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ២០១៩ នៅចំណុចមុខមន្ទីរភូមិបាលស្រុកបរកែវ តាមបណ្ដោយផ្លូវជាតិលេខ៧៨A" ផ្លូវទៅស្រុកអណ្ដូងមាស" ស្ថិតនៅក្នុងភូមិមួយ "បរកែវចាស់" ឃុំឡាមិញ ស្រុកបរកែវ ខេត្តរតនគិរី។
មន្ត្រីនគរបាលស្រុកបរកែវបានឲ្យដឹងថា អ្នកបើកបរម៉ូតូ ឈ្មោះ សៀង ម៉េងស្រេង ភេទប្រុស អាយុ១៧ឆ្នាំ ជនជាតិខ្មែរ រងរបួសធ្ងន់ មានទីលំនៅភូមិ/ឃុំកើតហេតុខាងលើ ជិះម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ រតនគីរី ១B-១៨៤៩។
ក្រោយកើតហេតុ សមត្ថកិច្ចមូលដ្ឋាន បានចុះមកអន្តរាគមន៍ ធ្វើការវាស់វែង និងដឹកបញ្ជូនជនរងគ្រោះទៅមន្ទីរពេទ្យស្រុកបរកែវ ដើម្បីសង្គ្រោះ។
ចំណែកអ្នកបើកបររថយន្ត ម៉ាកសាំយុង ពណ៌សំបកឪឡឹក គ្មានស្លាកលេខ បានរត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ។
បច្ចុប្បន្ន វត្ថុតាងទាំងពីរគ្រឿង ត្រូវបានសមត្ថកិច្ចមូលដ្ឋានរឹបអូសយកមករក្សាទុកនៅអធិការដ្ឋាននគរបាលស្រុកបរកែវ ដើម្បីធ្វើការដោះស្រាយនៅពេលក្រោយ៕
Source: Kampuchea Thmey Daily
0 Comments