រតនគិរី ៖ មានមនុស្ស២នាក់ បានរងរបួសធ្ងន់ បន្ទាប់ពីបើកបរម៉ូតូ ទៅបុកជាមួយរថយន្តដែលចតនៅស្ងៀម។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២និង៥៥នាទីរសៀល ថ្ងៃពុធ ៩កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែកុម្ភៈ ឆ្នាំ២០១៩កន្លងទៅ នៅលើដងផ្លូវជាតិលេខ៧៨A ស្ថិតក្នុងភូមិ៤ សង្កាត់កាចាញ ក្រុងបានលុង ខេត្តរតនគិរី។
សមត្ថកិច្ចនគរបាលបានឲ្យដឹងថា រថយន្តមួយគ្រឿងម៉ាកហ៊ីយ៉ាន់ដាយ ពណ៌ខៀវ លាយស ពាក់ស្លាកលេខ កំពង់ចាម ៣A-៣១៣៥ បើកបរ ដោយឈ្មោះ ហិន ធី ភេទប្រុស អាយុ៣៥ឆ្នាំ ជនជាតិខ្មែរ មានទីលំនៅ ភូមិអង្គបាន ឃុំអង្គបាន ស្រុកកងមាស ខេត្តកំពង់ចាម។
ចំណែកអ្នកបើកបរម៉ូតូ ម៉ាកហុងដាឌ្រីម សេ១២៥ ស៊េរី២០១៦ ពណ៌ខ្មៅ ពាក់ស្លាកលេខ រតនគីរី១C -០៩២៥ មានឈ្មោះ ជា និមល ភេទស្រី អាយុ២៧ឆ្នាំ ជនជាតិខ្មែរ មុខរបរកម្មករទឹកសុទ្ធ បានរងរបួសធ្ងន់ អ្នករួមដំណើរមាន ឈ្មោះ ជា បញ្ញា ភេទប្រុស អាយុ៤ឆ្នាំ ត្រូវជាកូន រងរបួសធ្ងន់ មានទីលំនៅភូមិ២ សង្កាត់កាចាញ ក្រុងបានលុង ខេត្តរតនគិរី។
បច្ចុប្បន្ន ជនរងគ្រោះទាំង២នាក់ ត្រូវបានដឹកយកទៅព្យាបាល នៅមន្ទីរពេទ្យបង្អែកខេត្ត។ ចំណែកវត្ថុតាងរថយន្ត និងម៉ូតូយកទៅរក្សាទុក នៅការិយាល័យចរាចរណ៍ នៃស្នងការដ្ឋាននគរបាលខេត្តដើម្បីធ្វើការដោះស្រាយគ្នានៅពេលក្រោយ៕
Source: Kampuchea Thmey Daily
0 Comments