ក្រុមបវរកញ្ញាឯកភពផែនដីអន្តរជាតិ ដែលមកពី៦០ប្រទេស នៅលើពិភពលោក បានមកដល់ទឹកដីព្រះរាជាណាចក្រ នាថ្ងៃទី២៤កុម្ភៈ

Cambodia News February 25, 2019

សៀមរាប ៖ ការមកដល់ នៃក្រុមបវរកញ្ញាឯកភពផែនដីនេះ ក្រោមការរៀបចំ និងដឹកនាំដោយក្រុមហ៊ុនមីស ផ្លេនិត អ៊ីនធើរណេសិនណល ឯ.ក (Miss Planet International ) ដែលមាន លោកស្រី ម៉ឹន ហាលីម៉ាស ជាអគ្គនាយិកា និងមានការគាំទ្រយ៉ាងពេញទំហឹងពីសំណាក់រាជរដ្ឋាភិបាលកម្ពុជា (ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ )។

ពេលមកដល់ខេត្តសៀមរាប តាមកម្មវិធី ដែលបានគ្រោងទុកក្រុមបវរកញ្ញា បានចូលរួមដាំកូនឈើទុកជាអនុស្សាវរីយ៍នៅបរិវេណវិទ្យាល័យសម្ដេចឪ ក្នុងក្រុងសៀមរាប ដែលសម្ដែងពីអត្ថន័យ នៃការស្រឡាញ់បរិស្ថានផងដែរ។

តាមរយៈលិខិតចុះថ្ងៃទី១៤ ខែកុម្ភៈ ឆ្នាំ២០១៩ របស់ក្រសួងទេសចរណ៍ បានឲ្យដឹងថា ក្រុមបវរកញ្ញាឯក មកប្រទេសកម្ពុជា គឺដើម្បីចូលរួមការប្រកួតបវរកញ្ញាឯកភពផែនដីអន្តរជាតិលើកទី១ ឆ្នាំ២០១៩ ដែលប្រព្រឹត្តទៅនៅថ្ងៃទី០២ ខែមីនា ឆ្នាំ២០១៩ខាងមុខ។

ផ្អែកតាមលិខិតនេះដែរ ក្រសួងទេសចរណ៍ ក៏បានរំពឹងយ៉ាងមុតមាំថា តាមរយៈព្រឹត្តិការណ៍ប្រកួតបវរកញ្ញាឯកភពផែនដីនេះ នឹងបានជួយធ្វើការផ្សព្វផ្សាយទៅដល់អន្តរជាតិ អំពីវិស័យទេសចរណ៍នៅកម្ពុជា និងសក្ដានុពលជាច្រើនទៀតដែលកម្ពុជាមាន៕