ភ្នំពេញ ៖ ស្ត្រីម្នាក់ បានមកលោតទឹកសម្លាប់ខ្លួន ពីលើស្ពានជ្រោយចង្វាថ្មី ធ្លាក់ចូលទៅក្នុងទឹកបានសម្រេច តែត្រូវអ្នកនេសាទជួយស្រង់សង្គ្រោះទាន់ កាលពីវេលាម៉ោងប្រមាណ៤រសៀល ថ្ងៃទី១២ខែកុម្ភៈ ឆ្នាំ២០១៩ នៅគល់ស្ពានជ្រោយចង្វាខាងកើត ក្នុងភូមិដើមគរ សង្កាត់ជ្រោយចង្វា ខណ្ឌជ្រោយចង្វា។
ស្ត្រីមានវិបត្តិរូបនោះ ត្រូវបាននាងប្រាប់ឲ្យដឹងថា ឈ្មោះ ស្រី មុំ អាយុ៣០ឆ្នាំ មុខរបរ កម្មករ សំណង់ មានលំនៅស្នាក់ម្តុំផ្សារដើមគរ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញស្ត្រីរូបនោះ ធ្វើដំណើរឡើងស្ពានពីទិសខាងលិចទៅកើត។ នៅពេលមកដល់ កណ្ដាលស្ពាន ក៏បានលោតចុះទៅក្នុងទន្លេតែម្តង។
ភ្លាមៗ ពុំមានអ្នកដំណើរណាចាប់អារម្មណ៍ឡើយ។ បន្ទាប់ពីលោតសម្លាប់ខ្លួន គេឃើញស្ត្រីរូបនោះ អណ្តែតឡើងហែលទឹក ហើយត្រូវបានអ្នកស្ទូចត្រី ហៅទូកនេសាទចេញទៅជួយស្រង់សង្គ្រោះនាំយកមកគល់ស្ពានខាងកើត។ នៅចំពោះមុខនគរបាលស្ត្រីរូបនោះបានឲ្យដឹងថា នាងពុំចង់រស់នៅឡើយ ដោយធុញទ្រាន់នឹងជីវិត។
ទោះបីជាយ៉ាងណា នាងពុំបានឲ្យដឹងពីមូលហេតុអ្វីច្បាស់នោះទេ បានជាធ្វើឲ្យនាងគិតខ្លីបែបនេះ។នៅពេលសួរនាំ នគរបាលមានការសង្ស័យ នារីរូបនោះមានសតិមិនស្រូវប្រក្រតី។
គួររំលឹកថា នេះជាថ្ងៃទី៣ បន្ទាប់ពីមានស្ត្រីមានវិបត្តិបានធ្វើដំណើរមកលោតទឹកសម្លាប់ខ្លួន កាលពីថ្ងៃទី១០ និងថ្ងៃទី១១កុម្ភៈ នារីម្នាក់ បានធ្វើដំណើរមកលោតទឹកសម្លាប់ខ្លួន២ថ្ងៃជាប់គ្នានោះ ពុំបានសម្រេចឡើយ ហើយស្ត្រីខាងលើនេះ លោតបានសម្រេច តែមិនស្លាប់ឡើយ៕
Source: Kampuchea Thmey Daily
0 Comments