ព្រះសីហនុ ៖ លោក លឹម សមអឿន ជាមន្ត្រីយោធា និងជាអតីតអនុប្រធានភូមិ លេខ ១ សង្កាត់លេខ ១ ក្រុងព្រះសីហនុ ដែលប្រជាពលរដ្ឋប្ដឹងទម្លាក់ចេញពីតំណែងកន្លងមកនោះ នៅតែព្យាយាម សង់ផ្ទះរំលោភដីអូរ បិទពីមុខស្ពានឆ្លងអូរ ប្រជាពលរដ្ឋចំនួនប្រមាណ១៣០ គ្រួសារ រស់នៅក្នុងភូមិនៃសង្កាត់លេខ១ ក្រុងព្រះសីហនុ ក្នុងគោលបំណងយកដីចំណីអូរនោះ ធ្វើជាកម្មសិទ្ធិផ្ទាល់ខ្លួន បង្កភាពស្មុគស្មាញ រាំងស្ទះ ដល់ដំណើរការសាងសង់ស្ពាន របស់ប្រជាពលរដ្ឋ គ្រប់ពេលវេលា រកទីបញ្ចប់គ្មាន។
ជុំវិញបញ្ហាខាងលើនេះ កន្លងមក លោក លី ចិត្តយម មន្ត្រីអន្តរៈវិស័យសាលាខេត្តព្រះសីហនុ ធ្លាប់ដឹកនាំក្រុមការងារចុះមកពិនិត្យទីតាំងជាក់ស្តែង ដែលត្រូវសាងសង់ស្ពាន ឆ្លងអូរ ខាងលើ បានធ្វើការបញ្ជាក់ថា រឿងសាងសង់ផ្លូវ ស្ពានជារឿងសំខាន់ណាស់ដែលរាជរដ្ឋាភិបាលកំពុងយកចិត្តទុកដាក់ ហើយចំពោះ ដីអូរ គឺជាដីសាធារណៈរបស់រដ្ឋ មិនអាចឲ្យបុគ្គលណាម្នាក់វាតទីយកធ្វើជាកម្មសិទ្ធិ បានទេ បូករួមនឹងផ្លូវដែលមានស្រាប់ផងដែរ។
កាលនោះ ក្រុមការងារចម្រុះ ដែលដឹកនាំ ដោយ លោក ចិត្ត និយម ក៏បានធ្វើរបាយការណ៍ លំអិតដាក់ចូលទៅថ្នាក់ដឹកនាំខេត្ត ដើម្បីពិនិត្យ និងសម្រេចតាមផ្លូវច្បាប់ផងដែរ ជាលទ្ធផល ថ្នាក់ដឹកនាំខេត្តព្រះសីហនុ លោក យន្ត មីន ក៏បានសម្រេច ចេញ(សជណ) ឲ្យមន្ត្រីជំនាញពាក់ព័ន្ធនិង អាជ្ញាធរមូលដ្ឋាន ចុះពិនិត្យ ដើម្បីផ្តល់ការងាយស្រួល ដល់ប្រជាពលរដ្ឋ ក្នុងការសាងសង់ស្ពាន ឆ្លងអូរ ប៉ុន្តែរហូតមកដល់ពេលនេះ មានរយៈពេល ជិត៦ខែកន្លងមកហើយ មន្ត្រីជំនាញពាក់ព័ន្ធ ដែល ជាអ្នកធ្វើកិច្ចការនេះ ហាក់មិនបានយកចិត្តទុកដាក់អ្វីបន្តិចសោះ។ ចំណុចនេះ ស.បញ្ជាក់ឲ្យឃើញថា (សជណ)របស់ លោក យន្ត មីន អភិបាល នៃគណៈអភិបាលខេត្តព្រះសីហនុ ដូចមិនមានតម្លៃអ្វីបន្តិចសោះ ជាហេតុធ្វើឲ្យមន្ត្រីយោធា ឈ្មោះ លឹម សមអឿន ចេះតែមានឧកាសបន្តសកម្មភាពសាងសង់ផ្ទះលើដីអូរល្មើសច្បាប់ បាំងចំពីមុខចំណុចដែលប្រជាពលរដ្ឋកំពុងដំណើរការសាងសង់ស្ពាន។
ប្រជាពលរដ្ឋ ចំនួនប្រមាណ១៣០គ្រួសារ រងគ្រោះដោយសារ លោក លឹម សំអឿន សង់ផ្ទះ លើអូរ បិតផ្លូវបានធ្វើការបញ្ជាក់ថា (សជណ)របស់ ថ្នាក់ដឹកនាំ ខេត្តព្រះសីហនុ នោះ គឺតម្រូវឲ្យថ្នាក់ដឹកនាំ រដ្ឋបាលក្រុងព្រះសីហនុ ជាអ្នកធ្វើកិច្ចការនេះ ហើយ លោក អ៊ី សុខ ឡេង អភិបាល ក្រុងព្រះសីហនុ ក៏បាន ប្រគល់កិច្ចបន្តឲ្យទៅ លោក អៀម សារិន អភិបាលរង ក្រុងព្រះសីហនុ ដឹកនាំក្រុងការងារ ចុះអនុវត្តន៍ ហើយកន្លងមក លោក អៀម សារិន ក៏ធ្លាប់ដឹកនាំក្រុមការងារ ចុះទៅពិនិត្យ លើកិច្ចការនេះ ចំនួនប្រមាណ៣លើក រួចមកហើយ តែមិនទទួលបានល្អអ្វីសោះ គឺបានត្រឹមតែសន្យា ថា ថ្ងៃនេះ ថ្ងៃនោះ តែប៉ុណ្ណោះ ហើយរហូតមកដល់ថ្ងៃនេះ ការសន្យារបស់គាត់ មានរយៈពេលជិត ៦ខែមកហើយ លទ្ធផលគឺ សូន្យ។
ពាក់ព័ន្ធបញ្ហាខាងលើនេះ លោក អៀម សារិន អភិបាលរងក្រុង បានបញ្ជាក់ដោយបដិសេធ ថា រូបគាត់ មិនបានបញ្ជាពីថ្នាក់ដឹកនាំក្រុងព្រះសីហនុ ទទួលធ្វើកិច្ចការនេះទេ ពីព្រោះតំបន់នោះ ខុស (ស៊ូន) របស់គាត់ ប៉ុន្តែចំណុចសង្កាត់លេខ០១ តំបន់ខាងលើ បើតាមលោកដឹង គឺ លោក សន កុសល្យ អភិបាលរងក្រុងម្នាក់ទៀត ជាអ្នកទទួលខុសត្រូវ។
ដោយឡែក លោក លឹម សំអឿន ជាមន្ត្រីយោធា និងជាអតីតអនុប្រធានភូមិ លេខ ១ សង្កាត់លេខ ១ ក្រុងព្រះសីហនុ ដែលប្រជាពលរដ្ឋ ប្តឹងទម្លាក់ចេញ ពីតំណែង នោះ បានបញ្ជាក់ថា ស្ពានឆ្លងអូរមួយនេះ មិនអាចធ្វើការសាងសង់បានទេ ពីព្រោះ ស្ពាននេះ ធ្វើឆ្លង កាត់ដីកម្មសិទ្ធិរបស់គាត់ ដូចនេះ បើប្រជាពលរដ្ឋចង់ធ្វើលុះត្រាតែ ទិញដីរបស់គាត់ទើបបាន បើមិនអញ្ចឹងទេ មិនបានដាច់ខាត។
គួរបញ្ជាក់ផងដែរថា ស្ពានថ្មចាក់បេតុង ទំហំបណ្ដោយប្រវែង១៩ម៉ែត្រ និង ទទឹង ប្រវែង៤ម៉ែត្រ ខាងលើនេះ គឺជាស្ពាន ឆ្លងអូរ មួយសំខាន់ណាស់ តភ្ជាប់ត្រង់ ពីផ្លូវក្នុងភូមិ ទៅផ្លូវជាតិ លេខ០៤ ហើយ ថវិកាសាងសង់ស្ពាន គឺជាថវិការួមរបស់ប្រជាពលរដ្ឋ ក្នុងភូមិតែម្តង ដោយស្ពាននេះជាស្ពាន ប្រើប្រាស់ជាសាធារណៈ មិនមែនសម្រាប់បម្រើផលប្រយោជន៍បុគ្គលណាម្នាក់នោះឡើយ។
ជាមួយគ្នានេះ ប្រជាពលរដ្ឋ សូមធ្វើការអំពាវនាវទៅដល់ សម្ដេចតេជោ សូមជួយដល់ប្រជាពលរដ្ឋ បានសាងសង់ស្ពាន ឆ្លងអូរ នេះផង ពីព្រោះ បើរង់ចាំទៅលើចំណាត់ការ ថ្នាក់ដឹកនាំ ខេត្ត ឬក្រុង ព្រះសីហនុ ប្រជាពលរដ្ឋ ដូចគ្មានសង្ឃឹមនោះឡើយ៕
Source: Kampuchea Thmey Daily
0 Comments