បាត់ដំបង ៖ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានផ្តល់ថវិកា រួមនឹងគ្រឿងឧបភោគមួយចំនួន ដល់ លោក សោម សុជាតិ ជាប្រធានគម្រោងបោសសំអាតមីន និងជួយសង្គ្រោះជនពិការ ដោយសារមីននៅខេត្តបាត់ដំបង ដែលបានរងគ្រោះដោយសារការផ្ទុះឌុយសាកទូរស័ព្ទ(ឆ្នាំងសាកទូរស័ព្ទ) ជាទូរស័ព្ទប្រភេទIPhone កាលពីពេលថ្មីៗកន្លងទៅ។
កាលពីថ្ងៃទី២៥ ខែកុម្ភៈ ឆ្នាំ២០១៩ កន្លងថ្មីៗនេះ លោកបណ្ឌិត ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងសហការី បានអញ្ជើញចុះសួរសុខទុក្ខ និងពាំនាំយកអំណោយមនុស្សធម៌ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូន លោក សោម សុជាតិ ប្រធានគម្រោងបោសសំអាតមីន និងជួយសង្គ្រោះជនពិការដោយសារមីនខេត្តបាត់ដំបង ដែលបានរងគ្រោះដោយសារការផ្ទុះឌុយសាកទូរស័ព្ទ(ឆ្នាំងសាកទូរស័ព្ទ)ជាទូរស័ព្ទប្រភេទIPhone បណ្តាលឲ្យពិកាដៃម្ខាង កំពុងសម្រាកព្យាបាលនៅមន្ទីរពេទ្យពោធិ៍ពីរ ក្រុងបាត់ដំបង។
ក្នុងឱកាសនោះដែរ លោកបណ្ឌិត ប៊ុត គឹមស៊ាន តំណាងឲ្យ សម្ដេចកិត្តិព្រឹទ្ធបណ្ឌិត ក៏បានពាំនាំប្រសាសន៍ផ្ដាំផ្ញើសួរសុខទុក្ខ ដោយក្តីអាណិតអាសូរ និងសោកស្ដាយពីសំណាក់ សម្ដេចកិត្តិព្រឹទ្ធបណ្ឌិត ចំពោះឧបទ្ទវហេតុ ដែលកើតមានឡើងចំពោះ លោក សោម សុជាតិ ក្នុងការបូជាកម្លាំងកាយចិត្តអង់អាចក្លាហានតស៊ូក្នុងការដោះមីន ជួយសង្គ្រោះប្រជាពលរដ្ឋកន្លងមក និងបានអំពាវនាវឲ្យប្រជាពលរដ្ឋទាំងអស់ឲ្យប្រុងប្រយ័ត្នចំពោះការប្រើប្រាស់ទូរស័ព្ទកុំឲ្យកើតមានហេតុការណ៍អាក្រក់បែបនេះទៀត។
នៅក្នុងដំណើរសួរសុខទុក្ខដល់មន្ត្រីស៊ីម៉ាក់នេះ តាមរយៈលោកបណ្ឌិត ប៊ុត គឹមស៊ាន សម្ដេចកិត្តិព្រឹទ្ធបណ្ឌិត បានលើកទឹកចិត្តឧបត្ថម្ភនូវថវិកាចំនួន១០លានរៀល រួមនឹងមានគ្រឿងឧបភោគមួយចំនួនទៀតមានដូចជា ទឹកសុទ្ធ២កេស,ទឹកដោះគោឆៅ២ឡូត៍ផងដែរ។ តបចំពោះគុណូបការៈដ៏ថ្លៃថ្លារបស់ សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន លោក សោម សុជាតិ ជាជនរងគ្រោះ រួមនឹងភរិយា ក៏បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏ថ្លៃថ្លារបស់សម្តេច ដែលជានិច្ចកាល តែងតែគិតគូរពីសុខទុក្ខ និងផលលំបាករបស់បងប្អូនប្រជាពលរដ្ឋ ប្រកបដោយទឹកចិត្តមនុស្សធម៌ ជាពិសេសមន្ត្រីស៊ីម៉ាក់ ដូចរូបលោកផ្ទាល់តែម្តង។
ក្រៅពីផ្តល់អំណោយជូនដល់មន្ត្រីស៊ីម៉ាក់ ដែលកំពុងសម្រាកព្យាបាលក្នុងមន្ទីរពេទ្យពោធិ៍ពីរ លោកគ្រូពេទ្យដែលបានប្រចាំការនៅទីនោះចំនួន៨នាក់ ក៏ទទួលបានសារុង១ និងថវិកា២ម៉ឺនរៀល ក្នុងម្នាក់ៗផងដែរ៕
Source: Kampuchea Thmey Daily
0 Comments