ភ្នំពេញ ៖ ប្រមុខរដ្ឋាភិបាលសម្ដេចតេជោ ហ៊ុន សែន បានស្នើឲ្យក្រុមប្រឹក្សាអភិវឌ្ឍន៍កម្ពុជា (CDC) និងស្ថាប័នពាក់ព័ន្ធរៀបចំវេទិកាពិភាក្សារវាងរាជរដ្ឋាភិបាលនិងវិស័យឯកជនឲ្យបាននៅក្នុងខែមិនាខាងមុខនេះ ដើម្បីពិនិត្យមើលអំពីបញ្ហាកំណែទម្រង់ ដែលត្រូវប្រកាន់យកដើម្បីជំរុញល្បឿនកំណើនសេដ្ឋកិច្ចរបស់កម្ពុជា។
ថ្លែងនៅក្នុងពិធីបិទសន្និបាតបូកសរុបការងារក្រសួងមហាផ្ទៃឆ្នាំ ២០១៨ និង លើកទិសដៅឆ្នាំ ២០១៩ សម្ដេចតេជោ ហ៊ុន សែន បានជំរុញឲ្យក្រុមប្រឹក្សាអភិវឌ្ឍន៍កម្ពុជារៀបចំវេទិការាជរដ្ឋាភិបាលនិងវិស័យឯកជននៅក្នុងខែមិនាខាងមុខនេះ។
សម្តេចតេជោនាយករដ្ឋមន្ត្រីមានប្រសាសន៍ថា «ខ្ញុំសូមស្នើឲ្យក្រុមប្រឹក្សាអភិវឌ្ឍន៍កម្ពុជា និងផ្នែកពាក់ព័ន្ធរៀបចំវេទិការាជរដ្ឋាភិបាល និងវិស័យឯកជននៅក្នុងខែមីនាខាងមុខនេះដើម្បីយើងពិភាក្សាបន្ថែម ទៀតទៅលើបញ្ហាទាក់ទងនឹងកំណែទម្រង់ដែលយើងត្រូវប្រកាន់យកដើម្បីជំរុញល្បឿនកំណើនសេដ្ឋកិច្ចរបស់យើង»។
វេទិកាពិភាក្សារវាងរាជរដ្ឋាភិបាលនិងវិស័យឯកជននៅពេលខាងមុខ គឺផ្តោតសំខាន់ទៅលើកំណែទម្រង់ស៊ីជម្រៅ ដែលរាជរដ្ឋាភិបាលត្រូវប្រកាន់យកដើម្បីភាពប្រកួតប្រជែងរបស់កម្ពុជា ហើយក៏ជាការឆ្លើយតបនឹងស្ថានភាពដែលកម្ពុជាអាចនឹងត្រូវដកការអនុគ្រោះពន្ធ EBA ជាបណ្ដោះអាសន្ននាពេលខាងមុខពីសហភាពអឺរ៉ុប។
ថ្មីៗកន្លងទៅនេះរាជរដ្ឋាភិបាលកម្ពុជាបានកំពុងតែចាត់វិធានការកែទម្រង់មុតស្រួច និង ស៊ីជម្រៅសំដៅសំដៅកែលម្អនិងលើកស្ទួយភាពប្រកួតប្រជែងរបស់កម្ពុជាពិសេសវិធានការសម្រួលពាណិជ្ជកម្ម និងកាត់បន្ថយថ្លៃនៃការធ្វើធុរកិច្ចជាអាទិ៍រាជរដ្ឋាភិបាលបានលុបបំបាត់នូវវិញ្ញាបនប័ត្រប្រភពដើមទំនិញ (CO ) ការកែសម្រួលមុខនាទីរបស់កាំកុងត្រូលចេញពីការត្រួតពិនិត្យទំនិញនាំចេញ-នាំចូល ,ការរំសាយអង្គភាពកាំសាប ,ការកាត់បន្ថយថ្លៃស្កេនកុងតឺន័រ និង ថ្លៃសេវាមួយចំនួនទៀត ការកែលម្អសេវាអ្នកជាប់ពន្ធ ការលើកទឹកចិត្តផ្នែកសារពើពន្ធដល់សហគ្រាសធុនតូច និងមធ្យម និងវិធានការសំខាន់ៗជាប្រព័ន្ធជាច្រើនទៀត ដែលសហគមន៍ធុរកិច្ចបានរកឃើញ ព្រមទាំងនឹងបានទទួលផលប្រយោជន៍ជាក់ស្តែងបន្ថែមជាបន្តបន្ទាប់។ ជាមួយនឹងការកែទម្រង់មុតស្រួចនិងស៊ីជម្រៅដែលបាន និងកំពុងអនុវត្ត ហើយនិងបន្តដាក់ចេញជាបន្តបន្ទាប់ទៀតនេះកម្ពុជាជឿជាក់ថា បរិយាកាសវិនិយោគនៅកម្ពុជានឹងមានសភាពរឹតតែប្រសើរឡើង ដែលនឹងផ្តល់នូវភាពទាក់ទាញកាន់តែខ្លាំងសម្រាប់វិនិយោគិននិងធុរជន ទាំងក្នុងនិងក្រៅប្រទេស។ ការលើកកម្ពស់ភាពប្រកួតប្រជែងពិសេសតាមរយៈការកាត់បន្ថយថ្លៃនៃការធ្វើធុរកិច្ច ការបង្កើនប្រសិទ្ធភាព នៃកិច្ចសម្រួលពាណិជ្ជកម្ម និង ការកែលម្អឲ្យកាន់តែប្រសើរឡើងថែមទៀតនូវបរិយាកាសធុរកិច្ច ជាទូទៅ និងជួយឲ្យវិនិយោគិននិងធុរជនទាំងឡាយអាចរកចំណេញបានសមរម្យនៅក្នុងការធ្វើកិច្ចប្រតិបត្តិការអាជីវកម្មរបស់ខ្លួន ដើម្បីបម្រើទីផ្សារទាំងក្នុងប្រទេសនិងក្រៅប្រទេសទោះបីជាត្រូវបង់ពន្ធទៅវិញទៅមកក៏ដោយ ហើយបន្តចូលរួមចំណែកដល់ការលើកស្ទួយកំណើនសេដ្ឋកិច្ចជាតិ បង្កើតការងារជូនដល់ពលករ និងលើកកម្ពស់ជីវភាពរស់នៅរបស់ប្រជាជនកម្ពុជា។
សម្ដេចតេជោ ហ៊ុន សែនក៏បានសង្កត់ធ្ងន់ពីភាពចាំបាច់ដែលកម្ពុជាត្រូវតែធ្វើកំណែទម្រង់ស៊ីជម្រៅ ដើម្បីឲ្យកម្ពុជាអាចលក់ផលិតផលដោយភាពប្រកួតប្រជែងលើទីផ្សារអន្តរជាតិ ទោះគ្មានការអនុគ្រោះពីសហភាពអឺរ៉ុបក៏ដោយ៕
Source: Kampuchea Thmey Daily
0 Comments