ភ្នំពេញ ៖ ថ្លែងនៅក្នុងពីពិធីបិទសន្និបាតការងាររបស់ក្រសួងមហាផ្ទៃឆ្នាំ ២០១៨ និង ទិសដៅឆ្នាំ ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើថាបញ្ហាសហភាពអឺរ៉ុបកំណត់ថ្លៃយកពន្ធអង្ករកម្ពុជាគឺមិនជាប់ពាក់ព័ន្ធនឹងប្រព័ន្ធអនុគ្រោះពន្ធ(Everything But Arms) លើកម្ពុជាឡើយ។
ថ្លែងចំពោះមុខថ្នាក់ដឹកនាំរាជរដ្ឋាភិបាលនិងក្រសួងមហាផ្ទៃនារសៀលថ្ងៃទី ១៤ ខែ កុម្ភៈ សម្ដេច តេជោ ហ៊ុន សែន បានពន្យល់ថាបញ្ហាពន្ធអង្ករនេះ គឺវាកើតចេញពីការប្រកួតប្រជែងទីផ្សារអង្កររបស់កម្ពុជា ជាមួយប្រទេសអេស្ប៉ាញនិងអ៊ីតាលីប៉ុណ្ណោះ។ ដោយសារតែបញ្ហានេះហើយ ទើបធ្វើឲ្យប្រទេសនៅអឺរ៉ុបទាំងពីរដែលប្រកួតប្រជែងទីផ្សារអង្ករចាញ់កម្ពុជា តែងតែរកវិធីឲ្យសហភាពអឺរ៉ុបគិតពន្ធអង្ករពីកម្ពុជាបែបនេះ។
សម្តេចតេជោនាយករដ្ឋមន្ត្រីបានមានប្រសាសន៍ថា «បើនិយាយពីបញ្ហាអង្ករ មិនមែនជាបញ្ហា EBA នោះទេ។ អង្ករវាជាបញ្ហាប្រកួតប្រជែងរវាងអង្ករអ៊ីតាលី អេស្ប៉ាញ ជាមួយអង្ករដែលទៅពីកម្ពុជា។ រឿងនេះវាកើតប៉ុន្មានឆ្នាំរួចមកហើយអ៊ីតាលីនិងអេស្ប៉ាញគេផលិតអង្កររបស់គេ។ លក់មិនដាច់ ដោយសារអង្កររបស់កម្ពុជាវាឆ្ងាញ់។ ដូច្នេះហើយបានជាគេទប់ស្កាត់អង្កររបស់កម្ពុជា ឲ្យអង្កររបស់កម្ពុជាបង់ពន្ធ»។
ទោះជាមានបញ្ហានេះក្តី ក៏សម្ដេចតេជោ ហ៊ុន សែន នៅតែហ៊ានអះអាងថា ការយកពន្ធនេះវាមិនប៉ះពាល់ដល់ការនាំចេញអង្កររបស់កម្ពុជានិងជីវភាពកសិករក្នុងស្រុកឡើយ ពោលគឺអ្នកដែលរងផលប៉ះពាល់នោះគឺជាពលរដ្ឋខ្មែររស់នៅតំបន់អឺរ៉ុបនិងពលរដ្ឋដែលគាំទ្ររសជាតិអង្កររបស់កម្ពុជាប៉ុណ្ណោះ។
សម្តេចតេជោមានប្រសាសន៍ថា «ប៉ុន្ដែអ្នករងគ្រោះពិតប្រាកដមិនមែនកសិករកម្ពុជាតែម្នាក់ឯងទេគឺខ្មែរនៅអឺរ៉ុបដែលធ្លាប់ស៊ីអង្ករខ្មែរគឺជាអ្នកបង់ថ្លៃទេ។ សូមកុំភាន់ច្រឡំ។ បងប្អូនខ្មែរនៅបរទេសទាំងឡាយអង្ករកម្ពុជាមិនអាចនាំទៅអឺរ៉ុបតាមរយៈដែលគ្មានការបង់ពន្ធមិនមែនមកពីបញ្ហានយោបាយទេ បណ្ដាលមកពីការទាមទាររបស់អ៊ីតាលី និងអេស្ប៉ាញ។ ដើម្បីអង្ករអេស្ប៉ាញនិងអ៊ីតាលី លក់ដាច់គេត្រូវវាយពន្ធលើអង្ករកម្ពុជាឲ្យវាថ្លៃជាង។ ប៉ុន្ដែអ្នកណាអ្នករងគ្រោះបើសិនអង្ករកម្ពុជាត្រូវវាយពន្ធចូល? អ្នកដែលរងគ្រោះគឺអ្នកដែលទទួលទាននៅអឺរ៉ុបអ្នកទទួលទាននៅអឺរ៉ុបមានមួយភាគជាជនជាតិកម្ពុជានោះឯង។ អញ្ចឹងត្រូវបង់ថ្លៃទៅ។ នោះហើយជាអ្វីដែលមនុស្សមួយចំនួនចង់បាន។ ទីចុងបំផុតគឺធ្វើបាបខ្លួនឯង។ បារាំង ឬបរទេស គេស៊ីដំឡូង នំប៉័ងតើ។ ខ្មែរ និងពួកអាស៊ីទេតើស៊ីបាយ។ អញ្ចឹងអង្ករធ្លាប់តែទិញថោក (ប្រែជាត្រូវ)ទិញអង្ករថ្លៃទៅ។ សូមកុំភ្លេចកាលណាតែមានការវាយពន្ធការខូចខាតមិនមែនមានតែនៅកម្ពុជាទេ។ ពាក់កណ្ដាលម្នាក់។ អ្នកប្រើប្រាស់ចុងក្រោយជាអ្នកបង់ថ្លៃទាំងអស់។ ឧទាហរណ៍ថា ពីមុនអាវមួយតំលៃ ១០០ដុល្លារ ប៉ុន្ដែត្រូវវាយពន្ធ ១០ដុល្លារ អញ្ចឹងពីមុនអ្នកធ្លាប់ទិញនៅអឺរ៉ុបតម្លៃ ១០០ ពេលដែលមានការវាយពន្ធហើយត្រូវទិញតម្លៃ ១១០ ដុល្លារ។ ដូច្នេះអ្នកប្រើចុងក្រោយទេដែលទទួលរងការខូចខាត»។
សម្រាប់ការប្រកួតប្រជែងក្នុងការនាំចេញអង្ករទៅកាន់ទីផ្សារក្រៅប្រទេសសម្តេចតេជោនាយករដ្ឋមន្ត្រីបានសង្កត់ធ្ងន់ថា «សម្រាប់យើងត្រូវខិតខំធ្វើយ៉ាងណាឲ្យថ្លៃដើមនៃការផលិតរបស់កម្ពុជាមានការចុះថោកដើម្បីឲ្យធុរជនទាំងឡាយដែលធ្វើកិច្ចការនៅកម្ពុជានេះទទួលបានផលចំណេញ និងមានលទ្ធភាពបង់ពន្ធសម្រាប់ចូលទីកាន់ទីផ្សារអឺរ៉ុប»។
កម្ពុជាបាននាំចេញអង្ករទៅទីផ្សារអន្តរជាតិជាង៥៩,៦ម៉ឺនតោនតែប៉ុណ្ណោះនៅខែមករា ឆ្នាំ២០១៩ នេះ។ តួលេខនាំចេញនេះបានធា្លក់ចុះ៥ភាគរយបើធៀបទៅនឹងរយៈពេលគ្នា កាលឆ្នាំ២០១៨ មានជាង៦២,២ម៉ឺនតោន។ នេះបើតាមរបាយការណ៍លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្កររបស់ក្រុមការងារផ្នែកស្រូវ-អង្ករនៃវេទិការាជរដ្ឋាភិបាល-ផ្នែកឯកជន(SOWS-REF)។
ក្នុងរបាយការណ៍នាំចេញអង្ករទៅលក់នៅទីផ្សារអន្តរជាតិឆ្នាំ២០១៨ កម្ពុជានាំចេញទៅលក់បានជាង ៦២ម៉ឺនតោនថយចុះ១,៥ភាគរយបើធៀបនឹងការនាំចេញ ៦៣ម៉ឺនតោនកាលពីឆ្នាំ២០១៧។
របាយការណ៍ដដែលបានឲ្យដឹងថាអង្ករកម្ពុជាដល់ទៅជិត ២៧ម៉ឺនតោនត្រូវបាននាំចូលទៅកាន់ទីផ្សារសហគមន៍អឺរ៉ុបដែលធ្វើឲ្យអឺរ៉ុបក្លាយជាទីផ្សារធំបំផុតសម្រាប់អង្ករកម្ពុជាមានចំណែកដល់ទៅជាង ៤៣ភាគរយនៃតួលេខអង្ករកម្ពុជានាំចេញទៅទីផ្សារអន្តរជាតិ។
សូមរម្លឹកជូនថា សហភាពអឺរ៉ុបចាប់ផ្តើមគិតពន្ធលើអង្ករកម្ពុជាសម្រាប់រយៈពេល៣ឆ្នាំជាប់គ្នា ចាប់ពីថ្ងៃទី១៨ ខែមករា ឆ្នាំ២០១៩ តទៅ។ ឆ្នាំទីមួយតម្លៃពន្ធចំនួន១៧៥អឺរ៉ូ (ប្រហែល២០០ដុល្លារ) ក្នុងអង្ករ១តោន, តម្លៃ១៥០អឺរ៉ូ (ប្រហែល១៧០ដុល្លារ) ក្នុងអង្ករ១តោន នៅឆ្នាំទីពីរ និងចុះមកត្រឹម១២៥អឺរ៉ូ (ប្រហែល១៤២ដុល្លារ) ក្នុងអង្ករ១តោន នៅឆ្នាំទីបី៕
Source: Kampuchea Thmey Daily
0 Comments