កំពង់ឆ្នាំង ៖ រថយន្តតកន្ទុយ និងតទ្រុង ខុសលក្ខណៈបច្ចេកទេសចំនួន៥គ្រឿង ត្រូវបានសមត្ថកិច្ចចម្រុះខេត្ត ចាប់ឃាត់ទុក ព្រោះតែរថយន្តទាំងនេះដឹកទំនិញសំពីងសំពោងខុសលក្ខណៈបច្ចេកទេស ។
កិច្ចប្រតិបត្តិការ ចាប់ឃាត់រថយន្តដឹកសំពីងសំពោងខាងលើនេះ បានធ្វើឡើងនៅវេលាម៉ោង១យប់ ឈានចូលថ្ងៃទី១៥ ខែកុម្ភៈ ឆ្នាំ២០១៩ នៅក្នុងសង្កាត់ខ្សាម ក្រុងកំពង់ឆ្នាំង។
លោក កែវ ពៅ ប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានបញ្ជាក់ថា ក្រុមសមត្ថកិច្ចចម្រុះធ្វើការឃាត់ទុកនេះ គឺជារឿងតម្រូវ និងជាការអនុវត្តន៍តាមច្បាប់ ដោយតម្រូវឲ្យម្ចាស់រថយន្តធ្វើការកែតម្រូវ លុបបំបាត់ការកែច្នៃរថយន្តខុសលក្ខណៈបច្ចេកទេស។
ជាក់ស្ដែងដូចជា ៖ រថយន្តសាំយ៉ុង ត្រូវតែដោះកង់រថយន្តចំនួន២ផ្នែកខាងក្រោយ កាត់ទ្រុងខាងក្រោយចេញ និង រើទំនិញ ដែលដាក់លើដំបូលសំពីងសំពោងចេញ ចំណែករថយន្តដែលដឹកលើសកម្ពស់ ក៏ត្រូវឲ្យរើទំនិញចេញផងដែរ។ ចំណែកម្ចាស់រថយន្ត តម្រូវឲ្យធ្វើកិច្ចសន្យាបញ្ឈប់សកម្មភាពដឹកទំនិញល្មើសច្បាប់បន្តទៀត បើសិនប្រព្រឹត្តល្មើសពេលក្រោយទៀត គឺត្រូវអនុវត្តន៍ការផាកពិន័យឲ្យបានតឹងរ៉ឹងតាមផ្លូវច្បាប់ មិនលើកលែងនោះឡើយ។
លោក កែវ ពៅ បានឲ្យបញ្ជាក់ទៀតថា ក្រុមការងារលេខាធិការដ្ឋានសុវត្ថិភាពចរាចរណ៍ផ្លូវគោកខេត្តកំពង់ឆ្នាំង កន្លងមក បានអនុវត្តតាមតួនាទី និងភារកិច្ចរបស់ខ្លួនជាប្រចាំ ដើម្បីពង្រឹងការអនុវត្តច្បាប់ចរាចរណ៍ផ្លូវគោកឲ្យបានយ៉ាងម៉ឺងម៉ាត់ ដើម្បីទប់ស្កាត់ការដឹកទំនិញលើសទម្ងន់កំណត់ ការដឹកសំពីងសំពោង និងទប់ស្កាត់រថយន្តកែច្នៃខុសលក្ខណៈបច្ចេកទេស ដើម្បីរួមគ្នាកាត់បន្ថយគ្រោះថ្នាក់ចរាចរណ៍នៅក្នុងសង្គមជាតិ ដែលកំពុងមានការព្រួយបារម្ភ ឲ្យចុះ មកនៅកម្រិតទាប។ ហេតុនេះ សូមបងប្អូនប្រជាពលរដ្ឋជាម្ចាស់រថយន្តទាំងអស់ ចូលរួមអនុវត្តន៍ច្បាប់ឲ្យមានប្រសិទ្ធភាព៕
Source: Kampuchea Thmey Daily
0 Comments