ភ្នំពេញ ៖ នៅក្នុងកិច្ចប្រជុំសាមញ្ញលើកទី៥៧របស់ក្រុមប្រឹក្សាខណ្ឌច្បារអំពៅអាណត្តិទី២នាព្រឹកថ្ងៃទី២៨ ខែកុម្ភនេះ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានលើកឡើងថា (យើងទាំងអស់គ្នាត្រូវរួមគ្នាលុបបំបាត់នូវការប្រមូលផ្តុំជក់និងចែកចាយថ្នាំញៀនឲ្យអស់ក្នុងមូលដ្ឋាន)ទើបប្រជាពលរដ្ឋយើងលោកសប្បាយនិងស្ងប់ចិត្ត។
ការលើកឡើងរបស់លោកអភិបាលខណ្ឌច្បារអំពៅបន្ទាប់ពីរូបលោកបានទទួលនូវសំណូមពររបស់ប្រជាពលរដ្ឋ ដែលលោកស្នើសុំឲ្យលោកអភិបាលខណ្ឌច្បារអំពៅឲ្យលុបបំបាត់ឲ្យអស់ទើបប្រជាពលរដ្ឋសប្បាយចិត្ត។ ហើយការលើកឡើងរបស់ប្រជាពលរដ្ឋគឺខណៈពេលដែលលោកអភិបាលខណ្ឌច្បារអំពៅបានជួបសំណេះសំណាលជាមួយប្រជាពលរដ្ឋក្នុងវេទិកាសាធារណៈ។
លោកចេង មុនីរ៉ា បានមានប្រសាសន៍ទៀតថា បើសិនជាសមត្ថកិច្ចនិងអាជ្ញាធរយើងមិននាំគ្នាខិតខំបង្ក្រាបឲ្យអស់នូវមុខសញ្ញាចែកចាយ និង ប្រមូលផ្តុំជក់ថ្នាំញៀននោះទេ គឺអ្នករងគ្រោះធ្លាក់ទៅលើកូនចៅប្រជាពលរដ្ឋរបស់យើងតែម្តង។ ហើយគ្រួសារណាបើសិនជាមានសមាជិករបស់ខ្លួនមានជាប់ពាក់ព័ន្ធនូវសារជាតិញៀននោះ គឺគ្រួសារនោះនិងជួបនូវផលលំបាកដោយគេចមិនផុតឡើយ។
លោកអភិបាលខណ្ឌច្បារអំពៅបានបញ្ជាក់ទៀតថា មុខសញ្ញាចែកចាយនិងជក់ថ្នាំញៀនគឺនិងក្លាយជាមុខសញ្ញាចោរកម្មលួចទ្រព្យសម្បត្តិរបស់ប្រជាពលរដ្ឋនៅពេលដែលរូបគេពុំមានថវិកាយកទិញថ្នាំញៀនមកសេព។ ដូច្នេះបញ្ហាសន្តិសុខគឺយើងទាំងអស់គ្នាត្រូវរួមគ្នាលុបបំបាត់ឲ្យអស់នូវមុខសញ្ញាចោរកម្មឲ្យអស់ទើបមូលដ្ឋានយើងមានសេចក្តីសុខ។
គួរបញ្ជាក់ថា កិច្ចប្រជុំនេះក្រោមអធិបតីភាពលោកអ៊ុំ ម៉ារ៉េត ប្រធានក្រុមប្រឹក្សាខណ្ឌច្បារអំពៅនិងលោកចេង មុនីរ៉ា អភិបាលនៃគណៈអភិបាលខណ្ឌដោយមានការចូលរួមពីលោក លោកស្រីអភិបាលរង លោកអធិការ លោកមេបញ្ជាការកងរាជអាវុធហត្ថខណ្ឌលោក លោកស្រីចៅសង្កាត់ លោកមេភូមិទាំងអស់ក្នុងមូលដ្ឋានខណ្ឌច្បារអំពៅ៕
Source: Kampuchea Thmey Daily
0 Comments