ភ្នំពេញ ៖ កាលពីរសៀលថ្ងៃទី០៥ ខែកុម្ភៈ ឆ្នាំ២០១៩ កម្លាំងជំនាញ នៃការិយាល័យស្រាវជ្រាវជ្រាវបទល្មើសព្រហ្មទណ្ឌកងរាជអាវុធហត្ថ រាជធានីភ្នំពេញ បានបញ្ជូនក្រុមចោរឆក់ និងគូកន សរុប ០៨នាក់ ទៅកាន់តុលាការ ដើម្បីធ្វើការផ្ដន្ទាទោសតាមច្បាប់។
មន្ត្រីអាវុធហត្ថប្រាប់ឲ្យដឹងថា ជនសង្ស័យ ទី១.ឈ្មោះ វ៉ា មករា ភេទប្រុស អាយុ១៩ឆ្នាំ ត្រូវបានកម្លាំងល្បាតអាវុធហត្ថខណ្ឌដូនពេញ ឃាត់ខ្លួនបាននៅចំណុចមុខអគារកូរ៉េ ផ្លូវព្រះសីហនុ សង្កាត់ទន្លេបាសាក់ ខណ្ឌចំការមន នាវេលាម៉ោង១៤និង០០នាទី ថ្ងៃទី០១ ខែកុម្ភៈ ឆ្នាំ២០១៩ បន្ទាប់ពី ជនសង្ស័យបានធ្វើសកម្មភាពឆក់កាបូបជនរងគ្រោះជាជនជាតិចិន បានសម្រេច។
ចំណែកជនសង្ស័យ០៧នាក់ទៀត ត្រូវបានអាវុធហត្ថខណ្ឌព្រែកព្នៅ សហការជាមួយកម្លាំងជំនាញការិយាល័យបទល្មើសព្រហ្មទណ្ឌអាវុធហត្ថរាជធានីភ្នំពេញ និងអាវុធហត្ថខណ្ឌសែនសុខ ធ្វើការស្រាវជ្រាវ ឃាត់ខ្លួនបានជាមួយគ្នា កាលពីថ្ងៃទី០១ ខែកុម្ភៈ ឆ្នាំ២០១៩ បន្ទាប់ពីសមត្ថកិច្ចទទួលពាក្យបណ្ដឹងពីជនរងគ្រោះ០២នាក់ លើករណីឆក់កាបូបនៅមហាវិថី ឈ្នះ ឈ្នះ ភូមិកប់ស្រូវតូច សង្កាត់គោករកា ខណ្ឌព្រែកព្នៅ នាថ្ងៃទី៣០ ខែមករា ឆ្នាំ២០១៩ និង ករណីគាស់ផ្ទះ នៅភូមិត្រពាំងវែង សង្កាត់គោករកា ខណ្ឌព្រែកព្នៅ នាថ្ងៃទី២៩ ខែមករា ឆ្នាំ២០១៩។
១.ឈ្មោះ ឈិន ឈី ភេទប្រុស អាយុ២៤ឆ្នាំ
២.ឈ្មោះ ជា ប៉ែត ភេទប្រុស អាយុ២៥ឆ្នាំ
៣.ឈ្មោះ ណៃ ហុង ភេទប្រុស អាយុ២៥ឆ្នាំ
៤.ឈ្មោះ វៃ ល័ក្ខ ភេទស្រី អាយុ២៦ឆ្នាំ
៥.ឈ្មោះ កើត ស្រីនាង ភេទស្រី អាយុ១៨ឆ្នាំ
៦.ឈ្មោះ ភា ណាផាត់ ហៅពន្លក ភេទប្រុស អាយុ១៧ឆ្នាំ
៨.ឈ្មោះ ឆាយ ង៉ូវចៃ ភេទប្រុស អាយុ១៦ឆ្នាំ
ក្រោយពីបានធ្វើការសាកសួរ តាមវិធានការជំនាញរួច ជនសង្ស័យ ឈ្មោះ ឈិន ឈី ភេទប្រុស និង ឈ្មោះ ជា ប៉ែត ភេទប្រុស បានសារភាពថា ពួកគេពិតជាបានធ្វើសកម្មភាពឆក់កាបូបខាងលើ ពិតប្រាកដមែន។ រីឯឈ្មោះ ណៃ ហុង ភេទប្រុស ក៏បានសារភាពដែលថា រូបខ្លួន និង ឈ្មោះ ឈិន ឈី បានធ្វើសកម្មភាពគាស់ផ្ទះខាងលើជាមួយគ្នាផងដែរ។ ឈ្មោះ វៃ ល័ក្ខ ភេទស្រី និង ឈ្មោះ កើត ស្រីនាង ភេទស្រី ត្រូវជាសង្សាររបស់ ឈ្មោះ ឈិន ឈី និង ឈ្មោះ ជា ប៉ែត បានឆ្លើយថា ខ្លួន ក៏បានដឹងថាមិត្តប្រុសរបស់ពួកនាង គឺជាចោរ ដែលតែងតែធ្វើសកម្មភាពឆក់ និង លួចជាញឹកញាប់។
ដោយឡែក ឈ្មោះ ឆាយ ង៉ូវចៃ ភេទប្រុស និង ឈ្មោះ ភា ណាផាត់ ភេទប្រុស បានឆ្លើយថា ពួកខ្លួនទាំង០២នាក់ ពុំបានធ្វើសកម្មភាពឆក់ ឬ គាស់ផ្ទះ ទេ ប៉ុន្តែពួកខ្លួន បានចូលរួមប្រើប្រាស់គ្រឿងញៀនជាមួយក្រុមខាងលើ។
ក្រោយពីបានធ្វើការតេស្តពិសោធន៍រកសារធាតុញៀនលើជនសង្ស័យទាំង០៧នាក់ ឃើញថាមានសារធាតុញៀនទាំងអស់៕
Source: Kampuchea Thmey Daily
0 Comments