ភ្នំពេញ ៖ បុរសម្នាក់ ឈ្មោះ អឹម ម៉ាប់ មុខរបរជាកម្មករ បានរងរបួសបែកក្បាល ដែលសាក្សីអះអាងថាមិនសង្ឃឹមរស់ ក្នុងករណីគ្រោះថ្នាក់ចរាចរណ៍ ហើយម្យ៉ាងទៀតជនរងគ្រោះមិនបានពាក់មួកការពារសុវត្ថិភាព ទើបធ្វើឲ្យធ្ងន់ធ្ងរបែបនេះ។
តាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅបានឲ្យកម្ពុជាថ្មីដឹងថា កាលពីវេលាម៉ោង២១និង៣០នាទីយប់ ថ្ងៃទី១៧កុម្ភៈនេះ ជនរងគ្រោះខាងបានបើកបរម៉ូតូម៉ាកស្កុបពី ពណ៌ស ពាក់ស្លាកលេខភ្នំពេញ1BE 50 13 បានធ្វើដំណើរលើផ្លូវលេខ៣៥១ ក្នុងភូមិតាង៉ូវ សង្កាត់និរោធ ខណ្ឌច្បារអំពៅ ទិសដៅពីត្បូងទៅជើង។ លុះមកដល់មុខផ្ទះលេខ២៨៨ ក៏ស្រាប់តែបុកជាមួយរថយន្តម៉ាកហាយឡឹនឌឺ ពាក់ស្លាកលេខភ្នំពេញ2V 56 71 ទិសដៅបញ្ច្រាសគ្នា បណ្តាលឲ្យជនរងគ្រោះដែលបើកបរម៉ូតូដួលបោកក្បាលសន្លប់បាត់មាត់បាត់.ក ព្រោះអាការៈរបួសធ្ងន់ធ្ងរពេក ហើយម្យ៉ាងទៀតជនរងគ្រោះពុំបានពាក់មួកការពារសុវត្ថិភាពនោះទេ។
លោកអធិការរងបន្តថា ដោយមានករណីគ្រោះថ្នាក់ចរាចរណ៍នេះ មានសភាពធ្ងន់ធ្ងរពេក នគរបាលខណ្ឌច្បារអំពៅ បានសម្រេចបញ្ជូនរថយន្ត និងម៉ូតូ ទៅដោះស្រាយនៅការិយាល័យនគរបាលចរាចរណ៍ផ្លូវគោករាជធានីភ្នំពេញ។
នេះគឺជាលទ្ធផល នៃការបើកបរម៉ូតូមិនពាក់មួកការពារសុវត្ថិភាព ដែលច្បាប់ចរាចរណ៍បានដាក់ចេញឲ្យអនុវត្តន៍ ប៉ុន្តែអ្នកបើកបរម៉ូតូមួយចំនួនមិនបានគោរពទេ តែដល់ជួបគ្រោះ ទើបស្តាយក្រោយ៕
Source: Kampuchea Thmey Daily
0 Comments