ពលរដ្ឋខេត្តប៉ៃលិន ថ្លែងអំណរគុណដល់ក្រុមការងារគ្រូពេទ្យស្ម័គ្រចិត្ត លោកជំទាវ បាន ស្រីមុំ និងស្នើសុំបន្តការពិនិត្យ និងព្យាបាលជំងឺជាបន្តទៀត

ប៉ៃលិន ៖ រយៈពេលពីរថ្ងៃ គឺថ្ងៃទី១៦ និង១៧ ខែកុម្ភៈ ឆ្នាំ២០១៩ នៃការចុះពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ របស់ក្រុមគ្រូពេទ្យស្ម័គ្រចិត្ត លោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន ត្រូវបានប្រជាពលរដ្ឋលើកឡើងថា គឺជាការព្យាបាលជំងឺ ដោយមិនប្រកាន់វណ្ណៈ ជាតិ សាសន៍ ពណ៌សម្បុរ និងសញ្ជាតិឡើយ សំខាន់ឲ្យតែប្រជាពលរដ្ឋ ដែលមានជំងឺគឺព្យាបាលទាំងអស់ ដោយមិនយកកម្រៃសេវាទៀតផង។

នៅក្នុងរយៈពេលពីរថ្ងៃនេះដែរ គេសង្កេតឃើញវត្តមាននាយឧត្ដមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់កណ្តាល ចុះជួយខេត្តប៉ៃលិន ព្រមទាំងថ្នាក់ដឹកនាំខេត្ត ,ថ្នាក់ដឹកនាំមន្ទីរជុំវិញខេត្ត ,ក្រុមការងារស.ស.យ.ក ខេត្ត និងបងប្អូនប្រជាពលរដ្ឋយ៉ាងច្រើនកុះករ។

បើតាមប្រជាពលរដ្ឋ រស់នៅស្រុកសាលាក្រៅ និងក្រុងប៉ៃលិន បានលើកឡើងថា ៖ ពួកគាត់ពិតជា មានសេចក្ដីត្រេកអរយ៉ាងខ្លាំង និងសូមថ្លែងអំណរគុណ ឯកឧត្ដម អ៊ី ឈាន និងលោកជំទាវ បាន ស្រីមុំ ដែលបានដឹកនាំក្រុមគ្រូពេទ្យស្ម័គ្រចិត្ត មកចុះជួយព្យាបាលជំងឺ ជូនប្រជាពលរដ្ឋនៅខេត្តប៉ៃលិន ហើយក៏សូមជូនពរ ឲ្យឯកឧត្ដម លោកជំទាវ និងក្រុមការងារគ្រូពេទ្យស្ម័គ្រចិត្តទាំងអស់ ជួបប្រទះតែសេចក្ដីសុខ គ្រប់ប្រការ និងជៀសឆ្ងាយពីជំងឺតម្កាត់ទាំងឡាយ។

ជាមួយគ្នានេះ ពួកគាត់ ក៏បានស្នើ សូមឲ្យក្រុមគ្រូពេទ្យស្ម័គ្រចិត្តរបស់ លោកជំទាវ បាន ស្រីមុំ បន្ត ចុះមកពិនិត្យ និងព្យាបាលជំងឺ ជូនប្រជាពលរដ្ឋឲ្យបានញឹកញាប់បំផុតផងដែរ។

ក្នុងឱកាស នៃការចុះពិនិត្យ និងព្យាបាលជំងឺជូនប្រជាពលរដ្ឋនេះដែរ នាយឧត្ដមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់កណ្តាល ចុះជួយខេត្តប៉ៃលិន មានប្រសាសន៍លើកឡើងថា កត្តាសុខសន្តិភាព នាពេលសព្វថ្ងៃនេះ កើតចេញពីថ្នាក់ដឹកនាំកំពូល ដែលមាន សម្ដេចតេជោ ហ៊ុន សែន ប្រមុខដឹកនាំប្រទេស ហើយក្រុមគ្រូពេទ្យស្ម័គ្រចិត្ត ដែលមាននៅពេលនេះ ក៏កើតចេញមកពីប្រទេសមានសុខសន្តិភាព ដូច្នេះយើងទាំងអស់ ត្រូវតែរួមគ្នាថែរក្សាសុខសន្តិភាព និងស្ថិរភាព តាមគោលនយោបាយ ឈ្នះ ឈ្នះ របស់ សម្ដេចតេជោ ហ៊ុន សែន ឲ្យបានគង់វង្ស។

នាយឧត្ដមសេនីយ៍ ប្រធានក្រុមការងារចុះជួយខេត្តប៉ៃលិន មានប្រសាសន៍បន្តថា ការចុះពិនិត្យ និងព្យាបាលជំងឺជូនប្រជាពលរដ្ឋនេះ គឺជាស្មារតីមនុស្សធម៌សុទ្ធសាធ ដែលស្ដែងចេញពីសេចក្តីស្រឡាញ់បងប្អូន ប្រជាពលរដ្ឋ ក្នុងនាមជាឈាមជ័រ ខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយចំណែក។

បន្ថែមលើនេះ លោក និងក្រុមគ្រូពេទ្យទាំងអស់ ដែលមានវត្តមាននៅទីនេះ សូមប្ដេជ្ញាបន្តចុះជួយព្យាបាល ជូនប្រជាពលរដ្ឋជាបន្តទៀត ព្រោះចង់ឃើញប្រជាពលរដ្ឋមានសុខភាពល្អ ចៀសឆ្ងាយពីជំងឺគ្រប់ៗគ្នាផងដែរ។

គួររំលឹកផងដែរថា ការពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ ដែលទទួលបានជោគជ័យ យ៉ាងត្រចះត្រចង់បែបនេះ គឺដោយសារមានការ ចង្អុលបង្ហាញពី លោកជំទាវ បាន ស្រីមុំ តំណាងរាស្ត្រ នៃកម្ពុជា ហើយនេះជាការពិនិត្យ និងព្យាបាលជំងឺ សម្រាប់អាណត្តិទី៦ លើកទី៥៦ ដោយក្នុងអាណត្តិទី៥ ការពិនិត្យ និងព្យាបាលជំងឺជូនប្រជាពលរដ្ឋ បានចំនួន៥៤លើក ដោយមានប្រជាពលរដ្ឋ មកពិនិត្យ និងព្យាបាលជំងឺចំនួន២៧៥៧២នាក់ ផងដែរ៕